تويت
================================================== =
ياللي قعدت ف عرشك الممدود
ياللي قعدت ف عرشك الممدود
سنين و أيام
و ياما عقود تجر عقود
حاسب علي عرشك لا بيك يوم يقع
ما مسيره برده للتراب و الدود
ياللي قعدت في عرشك الممدود
نايم و بتفكر في وجبة غدا
مهموم ببطنك مش بهم العدا
مشغول بنقدك و بركوع الرعاع
اللي لقوا في حكمك ملاذ و متاع
و اللي علي أمرك إيمانهم ضاع
و اللي عشان خاطرك بقوا أتباع
شايلين ذنوب عرشك بزور و خداع
قالوا علي شعبك عبيد و جياع
و إن اللي فاض منهم أجير و مباع
حاقد علي حكمك ماليه الأطماع
قتلوا اللي قال لاءه
قتلوا قلوب صادقه
سجنوك مع عرشك في ويل و صراع
ياللي قعدت ف عرشك الممدود
العرش ليه أصبح طريق مسدود
و العدل ليه أصبح جدار مهدود
عمر الأذي للناس ما كان الجاه
و لا كل مِن موّت بأمره إله
و لا كل من يملك بماله معاه
و لا كل من علـّي في عرشه بقاه
و مهما يعلي بيه
فوق راسه يوم مهدود
ياللي قعدت ف عرشك الممدود
لا شبعت يوم من زاد
و لا ارتويت في يوم
و إن قمت من رقدتك
لازم تقوم مهموم
و أن فوقت من غفلتك
الظلم ليك موعود
و اللي اتأذي في دولتك
باصص عليك بجحود
و اللي اتنسي في عزّتك
فقره اليك مردود
ياللي قعدت ف عرشك الممدود
كل الشعوب كرهتك
و مفيش ما بيننا عهود
كل الأمم عرفتك
و لا يوم اليك هتعود
ياللي سفكت الحق يوم ما اهتدي
و دبحت كل الشعب زي العدا
خليتنا نقتل بعض من غير رضا
و زرعت كل الفتن
و بدأت كل المحن
و رفضت يمضي الزمن
و آمنت إنك زمن جديد إبتدا
ياللي قعدت ف عرشك الممدود
======================================
مشاهد من الميدان
فيه واحد قال علي حاجه
و واحد تاني جيه ماقالهاش
و فيه واحد كان كده رافض
عاش بيعاند راح فـ بلاش
قلبوكي يا ثوره رهان و مؤامره
مـِن باعك دي مايسواش
سايبين التور
داير متيور
ماسكين في معيز و جحاش
و اللي استعبط يتخبط
و يقول عاش المالك عاش
ملكك عاش في المستشفي
روح فيه إتشفي و ماتجيلناش
عاش ياما فـ الحق حلنجي
بس إتطور و بقي لومانجي
يللا وراه يا أستاذ نتاش
و شباب كان جاي ينادي
غني و قال حره يا بلادي
عهدنا نادي و بيه أنا بادي
و صوت الحق فيه مابيوطاش
و فيه واحد كان محتاج
عمليه كبيره و معملهاش
و جريح محتاج تصاريح
علشان يدخل أوضة الإنعاش
و أن عاش يقولوا له
إيه ده ؟ .... و إذاي ؟ ..... و منين ؟
طلقه يا غشاش ؟
دا إنت يا دوب عضّك كلب مؤدب
و اختفي جرحك باش
و فيه واحد جاب الكرو
و قال يا بليله تعالوا ببلاش
و فيه واحد لمّ زباله
و جي رمي زباله و ماشلهاش
عدي واحد سايب دقنه
قلنا يا رب دي مايجيلناش
قام جيه و قعد جمبينا
و بقي منينا و زينا عاش
و بقينا أحمد و ابو مينا
و خاله آمينه إديتله قماش
فصله يفطه و لوننا
كتبنا كلامنا اللي فـ ضمنايرنا
هدمنا جدار خوف كان محاصرنا
و هزمنا بجد الأوباش
و فيه واحد كان بيفتش
و يشوف كل بطايق الناس
زي الددبان ما بيربش
من ملاين جت بالأحساس
متبسم كان بيسلم
ع الأغراب زي الأصحاب
و أخوه كان عنده مرور
راح مره في دُورُه
و لسّه مجاش
و الأم كانت بتحضر حبة فول
و صينية جـُلاش
و أميره معاها الميّه
بتسقي العطشان و لا تنساش
و فيه واحد فوق دبابه
جاي يتصوّر ماتمشاش
مِن بره لبره و روح
دي كمان ريح لما مجاش
و اللي معاه حاجه جاب منها
اتبرع بيها و لا خباش
حتي الفكهاني جاب فاكهه
و ام حماده جابت الطبليه
قالت بسم الله و مارفضناش
لمتنا اللمه , و كلنا اللقمه
و كفـّت و لا قمناش
و عاهدنا بلادنا
نشدّ وتدها
و نتعب لها ببلاش
تعليق