شعراء العامية المصرية في الصالون الادبي 2

**يسري راغب** · 23-07-2011, 07:13

بيرم التونسي
---------------
ولد الشاعر الشعبي محمود بيرم التونسي في الإسكندرية في 4 مارس1893م، وسمي التونسي لأن جده لأبيه كان تونسياً قدم إلى مصر سنة 1833م، والتونسي لقب لصق به وبأفراد أسرته لكوْنهم من تونس أصلا، وهاجروا إلى الإسكندرية، وأقاموا فيها فكان أهلُ الحي يصفون الفرد منهم بالتونسي، فلحق بهم هذا اللقب كعادة الغريب حين يقيم في غير مدينته يلقبه الناس لقبًا ينسبه إلى بلده الأصلي.
وقد عاش طفولته في حي الأنفوشي بالسيالة، التحق بكُتّاب الشيخ جاد الله، ثم كره الدراسة فيه لما عاناه من قسوة الشيخ، فأرسله والده إلى المعهد الديني وكان مقره مسجد المرسي أبو العباس، توفى والده وهو في الرابعة عشرة من عمره، فانقطع عن المعهد وارتد إلى دكان أبيه ولكنه خرج من هذه التجارة صفر اليدين.
كان محمود بيرم التونسي ذكياً يحب المطالعة تساعده على ذلك حافظة قوية، فهو يقرأ ويهضم ما يقرؤه في قدرة عجيبة، بدأت شهرته عندما كتب قصيدته بائع الفجل التي ينتقد فيها المجلس البلدي في الإسكندرية الذي فرض الضرائب الباهظة وأثقل كاهل السكان بحجة النهوض بالعمران، وبعد هذه القصيدة انفتحت أمامه أبواب الفن فانطلق في طريقها ودخلها من أوسع الأبواب.
أصدر مجلة المسلة في عام 1919م وبعد إغلاقها أصدر مجلة الخازوق ولم يكن حظها بأحسن من حظ المسلة. نفي إلى تونس التي يحمل جنسيتها بسبب مقالة هاجم فيها زوج الأميرة فوقية ابنة الملك فؤاد، ولكنه لم يطق العيش في تونس لما شهده من قمع من المستعمر الفرنسي فسافر إلى فرنسا ليعمل حمّالاً في ميناء مرسيليا لمدة سنتين، وبعدها استطاع أن يزوّر جواز سفر له ليعود به إلى مصر، فيعود إلى أزجاله النارية التي ينتقد فيها السلطة والاستعمار آنذاك، ولكن يلقى عليه القبض مرة أخرى لتنفيه السلطات إلى فرنسا ويعمل هناك في شركة للصناعات الكيماوية ولكنه يُفصل من عمله بسبب مرض أصابه فيعيش حياة ضنكاً ويواجه أياماً قاسية ملؤها الجوع والتشرد، ورغم قسوة ظروف الحياة على بيرم إلا أنه استمر في كتابة أزجاله وهو بعيد عن أرض وطنه، فقد كان يشعر بحال شعبه ومعاناته وفقره المدقع.
في عام 1932م يتم ترحيل الشاعر من فرنسا إلى تونس لأن السلطات الفرنسية قامت بطرد الأجانب وهناك أعاد نشر صحيفة الشباب. ثم فأخذ بيرم يتنقل بين لبنانوسوريا ولكن السلطات الفرنسية قررت إبعاده عن سوريا لتستريح من أزجاله الساخرة واللاذعة إلى إحدى الدول الأفريقية ولكن القدر يعيد بيرم إلى مصر عندما كان في طريق الإبعاد لتقف الباخرة التي تُقلّه بميناء بورسعيد فيقف بيرم باكياً حزيناً وهو يرى مدينة بورسعيد من بعيد، فيصادف أحد الركّاب ليحكي له قصته فيعرض هذا الشخص على بيرم النزول في مدينة بورسعيد، وبالفعل استطاع هذا الشخص أن يحرر بيرم من أمواج البحر ليجد نفسه في أحضان مصر.
بعدها أسرع بيرم لملاقاة أهله وأسرته، ثم يقدم التماساً إلى القصر بواسطة أحدهم فيعفى عنه وذلك بعد أن تربع الملك فاروق على عرش مصر فعمل كاتباً في أخبار اليوم وبعدها عمل في جريدة المصري ثم في جريدة الجمهورية، وقد قدّم بيرم أعمالاً أدبية مشهورة، وقد كان أغلبها أعمالاً إذاعية منها سيرة الظاهر بيبرس وعزيزة ويونس وفي سنة 1960م يمنحه الرئيس جمال عبد الناصر جائزة الدولة التقديرية لمجهوداته في عالم الأدب. وإثرها تحصل على الجنسية المصرية.
غنّت له أم كلثوم عدة قصائد مما ساعد على انتشاره في جميع الأقطار العربية، وظل إلى آخر لحظة في حياته من حملة الأقلام الحرة الجريئة، وأصحاب الكلمات الحرة المضيئة. غنى له فريد الأطرش عدة أغنيات ناجحة منها :يللا سوا - أحبابنا يا عين -يللا توكلنا - هلت ليالي - الليلة النور - أحلى الأماني -تطلع يا قمر -مانخبيش عليك -غالي يا بوي -حبيته لكن مابقولش - أهواك -.. ومن المواويل : صدوك عني العدى -يهون عليك .. ومن الأوبريتات الخالدة : غنى العرب - بساط الريح - عايزة أتجوز .زيادة على مالحنه لغيره مثل :هل هلال العيد - يا ديرتي . وثنائيته مع أسمهان :إيدي في إيدك .
توفي بيرم التونسي في 5 يناير1961م عن عمر يناهز 68 عاماً وذلك بعد معاناته من مرض الربو.
-------------------------------------------------------------------------------------------------
2
أعوذ بالله

إلا البلد يا ولاد مالها مقلوب حالها
في عز عصر استقلالها شبعت تشخير
كانت صلاة النبي أحسن من كده و اتخن
و العملة ماشية عدل معدن و رغيفها كبير
أما البلاد الدون ربحت مصر اندبحت
غاية ما في التهويش صبحت جرايدها كتير
يادي الغلا اللي ورانا بالخرازانه
و المقرعة لما هرانا و بقينا حمير
أول ما تسمع يا رمالي بخبر خالي
تبات و تصبح طوالي ناوي التصغير
و الفرانين كل معلم جلف مبلم
صدغه في الأزمة يتلم و لا صدغ مدير
طحن البلاطة و سكتنا ياللا اهتكنا
حطنا ف قعر التكنة و خلطها شعير
أعوذ بالله ، دي الأروام و لا دي الأغنام
اللي ما ينجح فيها كلام إلا بفواتير
ماحد حقه الحرق بجاز غير الخباز
و قلع عينه بالمخزاز ابن الخنازير
نهار ما تبقى الناس في هلاك يبني الأملاك
و يجيب مصاغ لمراته هناك و جنله حرير
و بحق ليه القمح يا ناس ينشال في اكياس
و يروح لابو بيصل و مداس و التاني أمير
قال العمى يعمي الأبعد على رأي اسعد
دي بلادك انت يا حاج احمد ياما فيها فقير
ما أصبحوا أهل طبنجه و روم و كمنجه
و اتعلموا يمزوا برنجه و خص و جرجير
زرع الأراضي اليوم طيب بكره يخيب
و الظاهر الفقر قريب جاي في مواسير
نهار ما تسرح بصواني عال يا سوداني
و يقول معانا القباني فين القناطير
بقت هو الحي الباقي شرقي شراقي
في الغيط خمس ست سواقي و المنزل بير
يا عم يا عبد الرحمن الشر اهو هان
أرجوك تعيد لي الحظ كمان و بلاش تفسير
حط المسدس في يمينك الله يعينك
و اعمل لنا صهبه و دينك و املاها نعير
لأن فيها برم فارت و همم بارت
و حدايات عفاريت طارت في أرض ابو قير
و خزانات جوه اتمدت و عين انسدت
و ع الطوابي اللي انهدت حانحط غفير
يقف عليها بكبوته و بنبوته
و النسافات دي بشلوته من وحده تطير
اسمع كلام مخلص أبده اهبد هبده
خليها تفرم في الكبده فرم المناشير
من مد في فرشك رجليه اتكه عليه
بالحيل و بظظ نني عينيه من دون تأخير
صنف الأوروباوي مرخرخ بشت ملخلخ
من شخطه و التانية يسخسخ زي ام بكير
المصري واد جن مقارد و تلم بارد
لو يلقى يوش يصبح فارد للردح حصير
---------------------------------------
3
الشرق

من قبل ما اكتب أنا عارف القول ضايع

و الأجر بالتأكيد ذاهب حسب الشايع

و الشتم حايجيني مسوجر من واد صايع

مهما انكويت بالنار و الزيت برضك فنان

يا مصري و انت اللي هاممني من دون الكل

هزيل و يحسبك الجاهل عيان بالسل

من دي الكيوف اللي تصبر على كتر الذل

و نمت و العالم فايق قوم بص و طل

و شوف الشعوب و اتغص و دوب و ارجع إنسان

و اللي آلمني و بكاني انت يا شامي

ع الأكل نازل طول عمرك بارد حامي

و قلت لي لما نهيتك مصري حرامي

لحد ما الجزار خلا جرحك دامي

و الله الخروف سايب معلوف ما يفوته جعان

و المغربي المسلم راخر أبو زر فاشوك

لما انتقدته فزع قاللي يلعن ... بوك

و نا اللي قصدي أشوف قيده يصبح مفكوك

لقيته فرحان به راضي طيب مبروك

خليك فقير دق البندير و كل التعبان

روح للعراق راخر قول له كيف الأحوال

لإمتى تفضل يا أخينا بحرام و عقال

ما تعرف الجاز يستعمل غير للمشعال

الطم بقى و قول ويايه الجاز أموال

و اوعى المداس يفلت تحتاس و تقول لي أمان

يا شرق فيك جو منور و الفكر ضلام

و فيك حرارة يا خسارة و برود أجسام

فيك سبعميت مليون زلمة لكن أغنام

لا بالمسيح عرفوا مقامهم و لا بالإسلام

هي الشموس بتخلي الروس كداهو بدنجان
----------------------------------------
4
العيون

من العيون يا سلام سلم شوف و اتعلم
تحت البراقع تتكلم و الدنيا نهار
عيون تقوللك قصدك إيه بتبحلق ليه
ما لكش شغل تعس عليه يا راجل يا حمار
و عيون تقوللك أنا عارفاك و النبي ما انساك
من يوم ما شفتك م الشباك يا جدع يا صغار
و عيون تقوللك روح يا رزيل يا بو دم تقيل
ياباي كبه في المخاليل يا ما هما كتار
و عيون تقوللك أنا حبيت ياللا بنا البيت
و عيون تقول انشالله ما جيت أنا رايحة الزار
و عيون تقوللك بالمحسوس أنا عايزة فلوس
و انشالله حتى تحوس و تدوس أنا عاملاه كار
و عيون تقوللك إمشي يا واد أنا أم ولاد
و عيون تقوللك عندي معاد و يا السمسار
و عيون بسر الحب تبوح كدا بالمفتوح
و تعرف القلب المجروح ما عليهش ستار
و عيون تسبل فوق الخد دي جد ف جد
و عمرها ما تكلم حد عيون أحرار
و عيون تحقق فيها بشوق تهرب على فوق
بتقوللك ابعد عني بذوق نظراتك نار
و عيون ما تعرف زعلانة أو فرحانة
صباح مسا أهي سهتانة صاحبة أفكار
و عيون لها ضحكة ف وشك بس تغشك
و تبص من تحت اليشمك تلقى المنقار
و عيون كدا يبقم ساهتين صفر و باهتين
بالشكل دا عيون الخاينين تضرب بصفار
و عيون تبص و تتسفلق واقفه شلقلق
و عيون تبربق و تبحلق عايزين مسمار

**يسري راغب** · 23-07-2011, 08:59

أحمد فؤاد نجم
(23 مايو 1929 - محافظة الشرقية)
أحد أهم شعراء العامية في مصر وأحد ثوار الكلمة
واسم بارز في الفن والشعر العربي وبسبب ذلك سجن عدة مرات.
يترافق اسم أحمد فؤاد نجم مع ملحن ومغن هو الشيخ إمام،
حيث تتلازم أشعار نجم مع غناء إمام لتعبر عن روح الاحتجاج الجماهيري الذي بدأ بعد نكسة حزيران 1967.
قال عنه الشاعر الفرنسي لويس أراجون:
إن فيه قوة تسقط الأسوار،
وأسماه الدكتور علي الراعي "الشاعر البندقية"
في حين يسميه: أحد الحكام العرب وهو أنور السادات: "الشاعر البذيء".
في عام 2007 اختارته المجموعة العربية في صندوق مكافحة الفقر التابع للأم المتحدة سفيرا للفقراء.
--------------------
ولد أحمد فؤاد نجم - وهو ينتمي إلى عائلة نجم المعروفة في ارجاء مصر - لأم فلاحة أمية من الشرقية (هانم مرسى نجم) وأب يعمل ضابط شرطة (محمد عزت نجم)
وكان ضمن سبعة عشر ابن لم يتبق منهم سوى خمسة والسادس فقدته الأسرة ولم يره، التحق بعد ذلك بكتّأب القرية كعادة أهل القري في ذلك الزمن.
أدت وفاة والده إلى انتقاله إلى بيت خاله حسين بالزقازيق حيث التحق بملجأ أيتام 1936 - والذي قابل فيه عبد الحليم حافظ- ليخرج منه عام 1945 وعمره 17 سنة
بعد ذلك عاد لقريته للعمل راعي للبهائم ثم انتقل للقاهرة عند شقيقه إلا أنه طرده بعد ذلك ليعود إلى قريته.
بعدها بسنوات عمل بأحد المعسكرات الإنجليزية وساعد الفدائيين في عملياتهم،
بعد إلغاء المعاهدة المصرية الإنجليزية دعت الحركة الوطنية العاملين بالمعسكرات الإنجليزية إلى تركها فاستجاب نجم للدعوة وعينته حكومة الوفد كعامل بورش النقل الميكانيكي
وفي تلك الفترة قام بعض المسؤلين بسرقة المعدات من الورشة وعندما اعترضهم اتهموه بجريمة تزوير استمارات شراء مما أدى إلى الحكم عليه 3 سنوات بسجن قره ميدان
وفي السنة الأخيرة له في السجن اشترك في مسابقة الكتاب الأول التي ينظمها المجلس الأعلى لرعاية الآداب والفنون وفاز بالجائزة
وبعدها صدر الديوان الأول له من شعر العامية المصرية (صور من الحياة والسجن) وكتبت له المقدمة سهير القلماوي ليشتهر وهو في السجن.
بعد خروجه من السجن عُين موظف بمنظمة تضامن الشعوب الآسيوية الأفريقية وأصبح أحد شعراء الإذاعة المصرية وأقام في غرفة على سطح أحد البيوت في حي بولاق الدكرور
بعد ذلك تعرف على الشيخ إمام في حارة خوش قدم (معناها بالتركية قدم الخير) أو حوش آدم بالعامية ليقرر أن يسكن معه ويرتبط به حتى أصبحوا ثنائي معروف وأصبحت الحارة ملتقى المثقفين. وقد نجحا في إثارة الشعب وحفز هممه قديما ضد الاستعمار ثم ضد الديكتاتورية الحاكمة ثم ضد غيبة الوعي الشعبي،
ويقول نجم عن رفيق حياته انه(أول موسيقي تم حبسه في المعتقلات من أجل موسيقاه وإذا كان الشعر يمكن فهم معناه فهل اكتشف هؤلاء أن موسيقى إمام تسبهم وتفضحهم)
وقد انفصل هذا الثنائي بعد فترة واتهم الشيخ إمام قرينه أحمد فؤاد بأنه كان يحب الزعامة وفرض الراى وانه حصد الشهرة بفضله ولولاه ما كان نجم.
.ويرى أحمد فؤاد نجم أن العامية أهم شعر عند المصريين لأنهم شعب متكلم فصيح وأن العامية المصرية أكبر من أن تكون لهجة وأكبر من أن تكون لغة.
فالعامية المصرية روح وهى من وجهة نظره أنها أهم إنجاز حضاري للشعب المصري
واحمد فؤاد نجم شاعر متدفق الموهبة فقد ألف العيد من الاغانى والتي تعبر جميعها عن رفضه للظلم وحبه الفياض لمصر واستيعابه الكامل للواقع الأليم.
من بين من غنوا أغانيه الموسيقي السوري بشار زرقان الذي ربطته به علاقة عمل استمرت لسنوات، سجلو ا معا ألبوم (على البال).
تزوج العديد من المرات أولها من فاطمة منصور أنجب منها عفاف وأشهرها زواجة من الفنانة عزة بلبع والكاتبة صافيناز كاظم وأنجب منها نوارة نجم تعمل بالمجال الصحفي ,و ممثلة المسرح الجزائرية الأولى صونيا ميكيو، الآن متزوج من السيدة أميمة عبد الوهاب وأنجب منها زينب،
من أهم اشعار أحمد فؤاد نجم كتابته عن جيفارا رمز الثورة في القرن العشرين. حصل الشاعر على المركز الأول في استفتاء وكالة أنباء الشعر العربي
-----------------------------
انضم احمد فؤاد نجم إلى حزب الوفد منتصف يونية عام 2010 بعد فوز الدكتور سيد البدوي بانتخابات رئاسة الحزب في اتخابات عرفت بنزاهتها. الا انه اعلن استقالته في منتصف أكتوبر من ذات العام جراء الازمة التي تسبب بها الدكتور سيد البدوي عندما اقال إبراهيم عيسى من رئاسة تحرير الدستور التي اشتراها السيد البدوي مع عدة شركاء في ذات العام.بعد ثورة 25 يناير يعتبر واحد من مؤسسين حزب المصريين الأحرار. وقد تم انتاج فيلم يحكي سيرته واسمه الفاجومي وهو ماخوذ من مذكراته الشخصيه
-----------------------
2
هما مين و احنا مين

هما مين واحنا مين

هما الامر والسلاطين

هما المال والحكم معاهم

واحنا فقرا ومحكومين

حزر فزر شغل مخك

شوف مين فينا بيحكم مين

احنا مين وهما مين

احنا الفعلا البنايين

احنا السنه واحنا الفرض

احنا الناس

بالطول والعرض

من عافيتنا تقوم الارض

وعرقنا يخضر بساتين

خزر فزر شغل مخك

شوف مين فينا

بيخدم مين

هما مين واحنا مين

هما الامرا والسلاطين

هما الفيلا والعربيه

والنساوين المتنقيه.. طبعاً

حيوانات استهلاكيه

شغلتهم حشو المصارين

حزر فزر شغل مخك

شوف مين فينا بياكل مين

احنا مين وهما مين

احنا قرنفل على ياسمين

احنا الحرب حطبها ونارها

احنا الجيش اللى يحررها

واحنا الشهدا ف كل مدارها

منتصرين او منكسرين

حزر فزر شغل مخك

شوف مين فينا بيقتل مين

هما مين واحنا مين

هما الامرا والسلاطين

هما مناظر بالمزيكه

والزفه وشغل البولوتيكا

ودماغهم طبعا استيكه

بس البركه فى النياشين

حزر فزر شغل مخك

شوف مين فينا بيخدع مين

هما مين واحنا مين

هما الامرا والسلاطين

هما بيلبسوا اخر موضه

واحنا بنسكن سبعه ف اوضه

هم بياكلوا حمام وفراخ

واحنا الفول دوّخنا وداخ

هم بيمشوا بطيارات

واحنا نموت في الأوتوبيسات

هم حياتهم تمضي جميلة

هم فصيلة واحنا فصيلة

حادي يا بادي يا عبد الهادي

راح تفهم قصد الغنوة دي

لمّا الشعب يقوم وينادي

يا احنا يا هم في الدنيا دي

حزر فزر شغل مخك

شوف مين فينا حيغلب مين!!!
---------------------------
3
شقع بقع

انا الأديب و لا تعرفنيش

تقرالي لكن ما تشوفنيش

كلامي لا هو مادهون ورنيش

و لا المعاني عليها غبار

شقع بقع يا ديل الفار

***

يا شعب مصر يا خم النوم

ما تفوق بقى و تشوف لك يوم

الثورة قامت في الخرطوم

و انت اللي نايم بالمندار

شقع بقع يا ديل الفار

***

يا شعب ثور داهية تسمك

و شيل اصول اسباب همك

عصابه

بتمص في دمك

و الاسم قال ضباط احرار

شقع بقع يا ديل الفار

***

اخدوا اليهود غزة و سينا

و بكرة يبقوا هنا وسطينا

و الراديوهات بتغدينا

خطب و نتعشى اشعار

شقع بقع يا ديل الفار

***

الشيخ امام قال كلمة حق

و الست ثومة قالت لأ

و ابو النجوم على ودنة اندق

في المعتقل و الدنيا نهار

شقع بقع يا ديل الفار

------------------
4
( التحالف ) يعيش أهل بلدي

يعيش أهل بلدي

وبينهم ما فيش

تعارف

يخلي التحالف يعيش

تعيش كل طايفه

من التانيه خايفه

وتنزل ستاير بداير وشيش

لكن فى الموالد

يا شعبي يا خالد

بنتلم صحبه

ونهتف .. يعيش

يعيش أهل بلدي

يعيش المثقف على مقهى ريش

يعيش يعيش يعيش

محفلط مزفلط كتير كلام

عديم الممارسه

عدو الزحام

بكام كلمة فاضيه

وكام اصطلاح

يفبرك حلول المشاكل قوام

يعيش المثقف

يعيش يعيش يعيش

يعيش أهل بلدي

يعيش التنابله

فى حي الزمالك

وحى الزمالك

مسالك مسالك

تحاول تفكر تهوب هنالك

تودر حياتك

بلاش المهالك

لذلك إذا عزت توصف حياتهم

تقول الحياة عندنا

مش كذلك

وممكن تشوفهم فى وسط المدينه

اذا مر جنبك

أتومبيل سفينه

قفاهم عجينه

كروشهم سمينه

جلودهم بتضوي

دماغهم تخينه

سنانهم مبادر تفوت فى الجليد

ما فيش سخن بارد

بياكلوا الحديد

ما دام نهر وارد

وجاي م الصعيد

تزيد الموارد

كروشهم تزيد

وتسمع وتسلم

بأن التنابله

أو الأكالين

حيسمح كبيرهم

ويعمل مقابله

مع الفلاحين

ويحصل تحالف

ما بين الجميع

ونملا المصارف

بدم القطيع

أطيع الخليفه

أطيع والديك

أطيع التنابله

دا مفروض عليك

وتزرع وتبعت لحي الزمالك

وحي الزمالك

مسالك مسالك

تحاول تفكر تهوب هنالك

تودر حياتك بلاش المهالك

لذلك

إذا حد جاب لك سيرتهم

تبسمل تكبر

وتهتف كذلك

يعيش التنابله

يعيش يعيش يعيش

يعيش أهل بلدي

يعيش الغلابه

فى طي النجوع

نهارهم سحابه

وليلهم دموع

سواعد هزيله

لكن فيها حيله

تبدر تخضر جفاف الربوع

مكن شغل كايرو

ما يتعبش دايره

لا ياكل

ولا حتى يقدر يجوع

يا غلبان بلدنا

يا فلاح يا صانع

يا شحم السواقي

يا فحم المصانع

يا منتج

يا مبهج

يا آخر حلاوه

يا هادي

يا راضي

يا عاقل

يا قانع

ما تتعبش عقلك

فى شغل السياسه

وشوف انت شغلك

بهمه وحماسه

وعود عيالك فضيله الرضا

لأن إحنا طبعا

عبيد القضا

ورزقك ورزقي ورزق الكلاب

دا موضوع مؤجل ليوم الحساب

كمان الصحافه

حتكتب فى حالتك

وتنشر مناظر لخالك وخالتك

وتتطلع يا مسعد عليك الغناوي

وتسمع باسمك

فى قلب القهاوي

تحبك مشيره وبنات الجزيره

وقصه غرامك

تشيع فى الرداوي

يعيش عم مسعد

يعيش يعيش يعيش

يعيش أهل بلدي

**يسري راغب** · 23-07-2011, 16:41

عبد الرحمن الأبنودي
--------------------
ولد عام 1938م في قرية أبنود بمحافظة قنا في صعيد مصر، لأب كان يعمل مأذوناً شرعياً، وانتقل إلى مدينه قنا حيث استمع إلى اغاني السيرة الهلالية التي تأثر بها. الشاعر عبد الرحمن الأبنودي متزوج من المذيعة المصرية نهال كمال وله منها ابنتان آية ونور
من أشهر أعماله السيرة الهلالية التي جمعها من شعراء الصعيد ولم يؤلفها. ومن أشهر كتبه كتاب (أيامي الحلوة) والذي نشره في حلقات منفصلة في ملحق أيامنا الحلوة بجريدة الأهرام تم جمعها في هذا الكتاب بأجزائه الثلاثة، وفيه يحكي الأبنودي قصصاً وأحداثاً مختلفة من حياته في صعيد مصر.
حصل الأبنودي على جائزة الدولة التقديرية عام 2001، ليكون بذلك أول شاعر عامية مصري يفوز بجائزة الدولة التقديرية.
من أشهر دواوينه الشعرية:
1 - الأرض والعيال (1964 - 1975 - 1985).
2 - الزحمة (1967 - 1976 - 1985).
3 - عماليات (1968).
4 - جوابات حراجى القط (1969 - 1977 - 1985).
5 - الفصول (1970 - 1985).
6 - أحمد سماعين (1972 - 1985).
7 - انا والناس (1973).
8 - بعد التحية والسلام (1975).
9 - وجوه على الشط (1975 - 1978) قصيدة طويلة.
10 - صمت الجرس (1975 - 1985).
11 - المشروع والممنوع (1979 - 1985).
12 - المد والجزر (1981) قصيدة طويلة.
13 - السيرة الهلالية (1978) دراسة مترجمة.
14 - الموت على الأسفلت (1988 - 1995) قصيدة طويلة.
15 - سيرة بنى هلال الجزء الأول (1988).
16 - سيرة بنى هلال الجزء الثاني (1988).
17 - سيرة بنى هلال الجزء الثالث (1988).
18 - سيرة بنى هلال الجزء الرابع (1991).
19 - سيرة بنى هلال الجزء الخامس (1991).
20 - الاستعمار العربى (1991 - 1992) قصيدة طويلة.
21 - المختارات الجزء الأول (1994 - 1995).
----------------------------------------------
أعماله المغناة وكتاباته للسينما

عبد الحليم حافظ :عدى النهار، أحلف بسماها وبترابها، إبنك يقول لك يا بطل، أنا كل ما أقول التوبة، الهوى هوايا، أحضان الحبايب، وغيرها.
محمد رشدي: تحت الشجر يا وهيبة، عدوية، وسع للنور، عرباوى
فايزة أحمد: يمّا يا هوايا يمّا، مال علي مال.
نجاة الصغيرة: عيون القلب. قصص الحب الجميله
شادية: آه يا اسمراني اللون. قالى الوداع. أغانى فيلم شيء من الخوف
صباح: ساعات ساعات.
وردة الجزائرية: طبعًا أحباب، قبل النهاردة.
ماجدة الرومي: جايي من بيروت، بهواكي يا مصر
محمد منير: شوكولاتة، كل الحاجات بتفكرني، من حبك مش بريء، برة الشبابيك، الليلة ديا، يونس وعزيزة.

كما كتب أغاني العديد من المسلسلات مثل "النديم"، و(ذئاب الجبل)وغيرهاوكتب حوار وأغاني فيلم شيء من الخوف، وحوار فيلم الطوق والإسورة وكتب أغاني فيلم البريء وقد قام بدوره في مسلسل العندليب حكاية شعب الفنان محمود البزاوى. شارك الدكتور يحيى عزمي في كتابة السناريو والحوار لفيلم الطوق والاسورة عن قصة قصيرة للكاتب يحيى الطاهر عبد الله.
----------------------------------
2
الموت على الأسفلت

من الزوايا والأركان

خرج الطوفان:

ألوفات شبان.

إصعد يادخان

إبعد ياشيطان

إجبن ياجبان

رجع الاسم ورجع العنوان.

يغلى البركان

ويفور

ويدور

إتهد السور .. طلع الإنسان.

الصدر العالى عليه الوشم:

خريطة الدم .. فلسطين ياأحلا الأوطان.

مين قال بعنا ..؟

مين قال ضعنا؟

يا تمانية واربعين كدابه وكدابه ياسبعه وتسعين.

التار له نار طى الكتمان

واليوم يا خليل

يا جليل

يا بيت لحم ..الإعلان

يا..صوت الطفل اللى بيحررنى ف بلدى

بارك ربى فيك.....ياولدى

يا..نهر النار الفايره اوعى تبطل جريان

دراعات الوحش الغاضب..أصوات الكروان

راجح

فالح

مازن

مروان

وأخدنا بتارك يا غسان

يا كمال ناصر

دمك حاصر

أعداءك..مش بس فى لبنان

يا ... ماجد يابو شرار جينا

دمك فينا

لسة سامعينك تنيادينا

ما عادتش الدمعة مكتومه

صبحت صرخة

صبحت صرخةروح محمومه

تصفع روما

ع الكتف نشيلوا سرير الفندق ونشيلك

مواويل الثوره مواويلك

تحت قميصك غنوة شهدا

من كل مخيم...

زاحفه يا ماجد تحت الثوره تغنى لك

عطر الآنبياف مناديلك

أولادك يابو شرار بالطوب

عدلوا المقلوب

شطبوا كل القدر المكتوب

فتحوا بوابة الفجر

وواجهوا الغدر

وصاحوا:يا فلسطين

يسقط كل الكدب العربى

يسقط كل الاخوه الخاينين

نرسم بالدم خريطه للآوطان

إتفلت الجان

والمسجون قام ياكْْْْْْْْْْْْْْْْْْْْْْْْْْْْْْْْْْْْْْْْْْْْْْْ ْْْْْْْْْْْْْْْْْْْْْْْْْْْْْْْل السجان

دارت دارت

لعبتهم بارت..

قوتهم خارت.. وانهارت

والدايره على الباغى دارت

دارت .. دارت

يادنان الكبت ..الظلم .. القهر .. على الطرقات .. فارت.

ومخيم بات .. وصبح ميدان

صبح ميدان والدنيا

الدنيا اتحطت واتشالت

الحارة الفلسطينية

شوف كم سنة عدت وانا صاحي

اسم بلادي هو سلاحي

والثورة بتظهر صباحي

في الحارة الفلسطينية

الف سلامه

يا علمي اللي ظلموك ياما

حتى الدنيا ليها قيامة

في الحارة الفلسطينية

أعلامي سودا من الهم

أعلامي حمرا ودا دم

في الاكفان البيض نتلم

من الحارة الفلسطينية

يا سلالم طالعة

يا ثوارها

اجسادنا سلم لقمرها

الاطفال خلعت اعمارها

في الحارة الفلسطينية

يا أرض الرسالات باركينا

بنوفي الندر اللي علينا

الثورة ضد الصهيوني

هي عقلي وهي جنوني

واتقهقر لما يردوني

للحارة الفلسطينية

لساها بتنجب انبيا

موجة البحر الرايحة وجيا

للحارة الفلسطينية

يا حجارتي

لسلاح الواطي

يا قنابل

يا رصاص مطاطي

انا ماشي معدول

وسراطي

الحارة الفلسطينية

انا بادي وبيدي حجارة

وجهنم اولها شرارة

الوعي اللي كانه بشارة

من الحارة الفلسطينية

انا ثورة وسبنالكو الدولة

بتقولي لا قوة ولا حول؟

اهو لينا شرف المحاولة

في الحارة الفلسطينية

وبواجه كل ما بتقدم

الدولة ام الجيش متنظم

امريكا هزمها المخيم

في الحارة الفلسطينية

مولود محتل ومتكتف

مولود متنمر متصنف

اشنقني..

اعدم..

اتعسف..

الحارة فلسطينية

انا اعلى ما في صوتي

سكوتي

واحلى حياة بعشقها

موتي

انا ارضي وجوي وملكوتي

الحارة الفلسطينية
-------------------------
3

القدس

القدس قدسي..

يمامة صيف في غيتها.

تطير . تيجيني..

بأشواقها .. وغيتها.

فاكراني من يد صيادها

أنا اغيتها

فاكراني صوت الأدان الحي

في "حطين"

ومخبي في ضلوعي قلبك

يا "صلاح الدين"..

شايل صراخ اليتامى

ولوعة المساكين

فاكراني كفن الشهيد

وخيمة اللاجئين

وأول الأتقيا..

وآخر الهاربين..

***

تجيني وتبوسني

وتملس على خدودي

هاربة بـ حدودها القدام

تتحامى في حدودي

تبكي على صدري

دبكة حزن على عودي

تبكي وفاكرة حد هدها

وأسكتها

أنا..

ياللي من موت شراييني

اتنسج موتها

وصوتي..

يوم الغنا الباطل

بلع صوتها

مافيش في قلبي

ولا آهة أموتها

كل الآهات ميتة

أنا حبيس همسي

نزعت صورتها من بُكرايا

من أمسي

حطين ولا حطيني

ولا قدس الهموم.. قدسي

ولا عارفة تنساني

زي ما تهت.. ونسيتها

***

القدس..

تيجي يمامة نور

مطفية

طالعالي م البرد

للصيف الجديد تسعى

فاكرة في كفي طعام

وف قلبي أخوية

هية اللي مش واعية..

والا أنا اللي مش باوعى..؟

لا دمع يسقى عطش عيني

ولا مية.

يا حزن لا تترجمه أهة..

ولا دمعة..

...

ما كنا فاكرينا

أطفالك

يا ست الكل.

الكدب ما يجيبش همه

إحنا مش أطفال

وكنا فاكرينا أبطالك

أيادي السيف

سيوفنا من قش

ودي..

ماهيش إيدين أبطال

ضيعنا ع القهوة

نص العمر

نتاوب

نتمنوا من ربنا..

تتحسن الأحوال

***

يا قدس

لمي جناحك وارجعي تاني.

ولا تصدقي قولي..

ولا تتمني

أحضاني

نامي في حضن العدو

هوه العدو الأول

يا قدس..

خافي قوي..

من العدو الثاني.

الخنجر المختفي

وانتي فاكراه

ضلع

الأفعى ورا

ضحكتي..

والموت في أسناني.

وصفحتي في النضال

بيضا بياض التلج

***

لمي الجناح يا قدس

لمي الجناح..

"البناني" ف قلبي مسكونة

بيمام .. غريب الوطن.

يوم ما التهم خضرتك

فدان ورا فدان.

يوم ما طرد أسرتك

إنسان ورا إنسان.

يوم ما هدم مادنتك

وكسَّر الصلبان

***

يا قدس..

قولي لحيطانك

اثبتي بقوة

حيخلصك ابنك

اللي أنا .. مانيش هوه

لا تبحثي عن حلول

الحل من جوه

احل من جوه

الحل من جوه .

----------------------
4
رسايل الأسطى حراجي

(مجموعه رسايل الاسطى حراجى لزوجته فاطنه عبد الغفار)

...

الجوهرة المصونه

والدره المكنونه

زوجتنا فاطنه أحمد عبد الغفار

يوصل ويسلم ليها

في منزلنا الكاين في جبلايه الفار

أسوان ... الرسالة 1

أما بعد .. لو كنت هاودت كسوفي ع التأخير

سامحيني يا فطنه في طول الغيبه عليكم

وأنا خجلان .. خجلان .. وأقولك يا زوجتنا أنا خجلان منكم ..

من هنا للصبح ..

شهرين دلوقت ..

من يوم ما عنيكي يا فاطنه .. بلت شباك القطر ..

لسوعتي بدمعك ضهر يديَ

لحضتها قلت لك :

(( قبل ما عوصل عتلاقي جوابي جي ... ))

نهنهتي .. وقلتي لي بعتاب:

(( النبي عارفاك كداب .. نساي

وعتنسى أول ما عتنزل في أسوان .. ))

حسيت واليد بتخطفها يد الجدعان

بالقلب ف جوفي ما عارف ان كان بردان .. دفيان

والبت عزيزه والواد عيد

قناديل في الجوف .. زي ما بتضوي .. بيقيد ..

.......... والقطر إتحرك ..

وقليبي بينتقل من يد لإيد .

والقطر بيصرخ ويدَودِو

اتدلدلت بوسطي من الشباك ..

( خذي بالك م الولد .. راعي عزيزه وعيد )

والقطر صرخ ورمح لكإنه داس على بصة نار ..

ولقطت الحس قريب .. قد ما كنتي بعيد :

(قلبي معاك يا حراجي هناك في أسوان ..)

...........................

ورميت نفسي وسط الجدعان .. وبكيت ..

وبلدنا اللي كنا بنمشيها ف نص نهار

كان القطر في لحضه .. فاتها بمشوار .

سامحيني يا فطنه على التأخير ..

ولو الورقه يا بت الخال تكفي

لأعبي لك بحر النيل والله بكفيِ

وختاماً ليس ختام ..

بابعت لك ِ

ليكي ولناس الجبلايه ولبتي عزيزه والواد عيد

ألف سلام

زوجك ... لوسطى حراجي

***

أسوان

زوجي الغالي

لاوسطى حراجي القط

العامل في السد العالي

جبلاية الفار

الرسالة 2

زوجي حراجي ..

فوصلنا خطابك ..

شمينا فيه ريحة الأحباب .. ربنا ما يوري حد غياب ..

مش أول مره البسطاوي يخطي عتبة الدار ؟؟

عمرنا يا حراجي .. ما جلنا جواب .

النبي ساعة مرزوق البسطاوي .. ما نده ..

كده زي ما كون .. دقت في حشايا النار .

وكإن العمر بيصدق .. بعد ما كان كداب ..

اتأخرت مسافه كبيرة كبيرة علي

عارف فاطنه يا حراجي لاليها عايل .. ولا خي .

ليه تتأخر كده يا حراجي .. ؟

طب والنبي كأن ورقتك دي

أول قنديل بتهز ف جوف الدار .

أول ندعة ضو.

الدار من غيرك يا أيو عزيزه .. هو .

وعزيزه وعيد ..

من غيرك يا حراجي زي اليُتما في العيد .

الواد على صغره حاسس بالغربه والبعد .

ولا عاد حتى بيطلع يلعب في القمَارى مع الولِد .

اطلع وأخش .. أطلع وأخش القاه .. غيمان

وكأنه محروق له دكان .

ويقوللي : (( فين يامه أسوان .. ؟

وأبا سابنا ليه يا مه ؟ ما يمكن زعلان .. ؟ ))

شهرين يا بخيل ؟

ستين شمس وستين ليل ؟

النبي يا حراجيما أطول قلبك

لاقطع بسناني الحته القاسيه فيه

..........................

كل الجبلايه تسلم فرداً فرد ..

م الحاج ((( طِلب حامد )) لعيلة بيت (( علي سعيد ))

وانشالله يا حراجي ما يوريني فيك يوم

وانشالله تكون تعلمت ترد قوام .

ومادام احنا راسيين ع العنوان

والله ما حنبطل بعتان..

مفهوم..أسوان

زوجي الغالي

لاوسطى حراجي القط ..

العامل في السد العالي

زوجتك

فاطنه أحمد عبد الغقار

جبلايه الفار
-----------------------
5
أسوان
الرساله 3

الجوهره المصونه
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلاية الفار

أما بعد ..

فهذا تاني خطاب ..
باعتين طيه ما قدرنا المولى عليه ..
وعنبعتلك في ظرف الجمعه .. طرد
الطرحه والجزمه بتوعك ..
وكساوي عزيزه وعيد .
دورت الحسبه ف راسي وقلت يا واد يا حراجي ..
هو يعني قانون العيل ما يدوقشي الكسوه ..
غير في العيد ؟
أمال كيف العيل حيحس أبوه جنبه
إذا كان الأب .. بعيد .. ؟
بقى أول ما دلقنا يا فاطنه بابور السد على محطة إسوان
أنا والجدعان
حسيت بالدوخه
مش أول مره باسيب جبلاية الفار .. ؟
رحنا المكتب
طبعنا البطاقات ..
ومضينا على الورقات
أه يا (( فطاني )) لو شوفتي الرجاله هْنِهْ
قولي .. ميات .. أولوفات ..
بحر من ولاد الناس ..
إللي من (( درجا )) واللي م (( البتانون ))
واللي من (( أصفون)) و (( التل))
جدعان .. زي عيدان الزان .. سايبن الأهل .
وتطلي في عين الواحد يا ولداه ع الغربه ..
عارفه يا مرتي الراجل في الغربه يشبه إيه .. ؟
عود دره وحداني .. في غيط كمون ..
حسيت بالخوف ناشع في عروقي زي البرد .
قضينا الليله الأولانيه في أي مكان .
العين مشقوقه..
والبال ..
زي الغله اللي بتسرسب من يد الكيال
وندهت عليكي قلت : انا بنده
امعاني ؟
سامعيني يا عيال ؟
النبي لولا الخوف واللومه من الرجاله ..
لاركبت القطر وعدت
قبل ما أروح لموظف
قبل ما أرد سؤال.
وقعدت أعقل نفسي وأقول : يا حراجي يا بوي
أمال جيت ليه ؟
الخايف من الغربهة ما يجيش
اتحمل علشان كسوة عيد .. ورغيف العيش
لكإنك ياخي رحت (( الديش ))
من خوفي يا مرتي
قعدت أهدي الرجاله .
فاطنه ..
أول ما تفكي الخمسه جنيه
اطلعي ع الفور ..
وإدي حساب (( عمران )) وجنيه (( بمبة الصباغ ))
والباقي زيحوا بيه القارب
لما يعدلها الرحمن
سلمى ع الوِلد .. وع (( الحاج التايب ))
بلا كتر كلام ..
سلمي على كل اللي لينا فيهم نايب ..
وإوعي يا فطنه لما ارجع وأبص ف وش اللولاد ..
أعرف إن أبوهم كان غايب .
وإحنا هنا بنستنى الجوابات بفروغ صبر
طول ما الجوابات رايحه وجايه .
اعتبري كإني باجي أشوفك..
واجى .

زوجك لاوسطى حراجي

***
أسوان
زوجي الغالي
لاوسطى حرجاي القط
العامل في السد العالي

جبلاية الفار
الرسالة 4

وصلنا الطرد وجانا المبلغ يا حراجي ..
أحياك الرب وأبقاك ألفين عام ..
ولا عاد يقطعلك عاده ولا حس..
ولا يقفل لك كف ..
ولا يطوي من قدامك سجادة الخير والسعاده ..
اما بعد ..
فإحنا وزعنا المبلغ زي ما قلت..
ولعلك ما تشغلش بالك فينا وتبقى في راحة بال ..
إحنا يا حراجي – بعيد الشر- إن ضاقت بينا الحال يكفينا ريال
كفايه علينا البسطاوي الظهر يخطي عتبة الدار
غمبارح .. جانا (( الشيخ قرشي )) .. وخبط ع الباب ..
جه ساعة المغرب
قاللي لا بدن ما نبص لعيد ..
قاللي : (( يا بت المرحوم ..
الواد لازمه الكتاب ..
يو السوق ..
إتدلي هاتي له قلمين بوص .. ودواية .. ولوح )) ..
وضحك .. بعدين قاللي : (( لاحسن يطلع لوح ))
وأنا بيني وبينك يا حراجي عاوزاه يكبر
ويعوضنا عن الأهل ويعمل لنا قيمه ..
عاوزاه تكون قيمته ف جبلاية الفار قيمة القيمه ..
اللي بتقوله عن أسوان يا بوعيد ..
حكايه ولا حكايات أبو زيد ..
هيا يعني .. مش زي بلدنا .. ؟
أمال ناسها بيسووا إيه .. ؟
ما بيشتغلوش ليه ؟
وإنت .. طول عمرك راجل صاحب فاس
فهمهاني دي
لاحسن عامله في راسي زي الخبطه ..
كيف صاحب الفاس يصبح أوسطى .. ؟
صاحبك (( تكروني )) لما أتى بالطرد ..
شيعنا معاه الموجود ..
...............................................
في الليل يا حراجي تهف عليا ما عرف كيف ..
هففان القهوه .. على صاحب الكيف ..
وبامد إيديا في الظلمه ألقاك جنبي ..
طب والنبي صُح ومش باكدب يا حراجي .
وباحس معاك إن الدنيا لذيذه .
كيف حال (( عبد العال التابه )) و (( على اب عباس ))؟ ..
وقوللي يا حراجي ..
بتاكل كيف . ؟ وبتلبس إيه ؟ وبتقلع إيه ؟
بتنام فين ؟
قاعد في المطرح مع مين ؟
مين اللي بيغسلك توبك
وبتتسبح فين .. ؟
...............................................
في نهاية القول ..
أنا رح أشيع عيد ع الكتاب ..
فا إبعت له ووصيه على شد الحيل ..
وجميع الناس في الجبلايه
عايزين لك كل سعاده وخير ..
وبيتمنولك تاني ترجع في السلامه ..
تعمر مصطبتك ..
وتقيد اللنضه في الدار ..

زوجتك
فاطنه أحمد عبد الغفار
جبلاية الفار

***
الجوهره المصونه
والدرر المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلاية الفار
---------------------------------
6
لسه ما شبعتش طوافة
ياللي بتطوف من سنين
لسه ما كرهت الليالي ؟
لسه ما شبعتش مشاهدة.. ؟
يا قمر .. حالك .. كحالي..
ضيعونا .. بالمعاهدة !!
***

يا قمر .. هدوا قبورنا
واستباحوا اللي ف صدورنا
دمروا قلوبنا ودورنا
حقنا أصبح خرافة
وضعت يا بلدي الأمين
يا قمر .. تصعد في "يافا"
تترمي في "ير ياسين" !!!
***

ع الزاتون والبرتقالة
ارمي ضياتك أمانة
احنا يكرهنا اللي خاين
واحنا .. تكرهنا الخيانة
يا قمر..
وغيوم بتحجب
دمنا .. لما يسرسب
دنيا .. تحترم اللي يغلب
حتى لو شيطان لعين.
يا قمر
بشَّر في "يافا" واتصلب في "دير ياسين".
***

يا صبور .. الصبر واعر
للدماغ.. وللمشاعر
قلبي ندل وحزنه داعر
ليتني ما كنت شاعر
كنت أفلت م الكمين
صرختي بتموت في همسي
ليتني ما غادرت أمسي
ليتني ما صاحبت نفسي
ليتني ضميت خوامسي
يوم ما أقسمت اليمين
يا قمر عاشني في "يافا"
واتقتلنا في "دير ياسين"
يا قمر..
خدته ليافا..
خدني هوه.. لدير ياسين

ناجي العلي

أمايه.. وانتى بترحى بالرحى..

على مفارق ضحى..

ـ وحدك ـ وبتعددى

على كل حاجه حلوه مفقوده

ماتنسيش ياامه في عدوده

عدوده من أقدم خيوط سودا في توب الحزن

لاتولولى فيها ولا تهللى..

وحطى فيها اسم واحد مات

كان صاحبى يا امه..

واسمه

ناجى العلى

ـــــــــــــــ

ياقبر ناجى العلى وينك ياقبر

ياقبر معجون بشوك مطلى بصبر

الموت يقرب عليك .. يرتد خوف

واذا ماخافش الموت.. يرتد جبر

****

ياقبر ناجى العلى .. يادى الضريح

كان ميتك ..للأسف .. وطنى صريح

تحتك فتى ناضر القلب ..غض

كان قلبه .. أرض مخيمات الصفيح.

****

الأرض متغربه .. والحلم ِمْلك

خريطه شبه الوطن محاصرها سِلك

واقف وراها شريد عاقد إيديه

حن الوطن ذلك .. للأرض .. تلك

****

غشيم فى حب الوطن .. طبعا غشيم

ياللى تحب الوطن .. من الصميم

على طريقة العرب في الحب .. عيش

ولىِ .. نقى .. متقى .. لكن لئيم

ـــــــــــــــــــــــ

أمايه.. وانتى بترحى بالرحى..

على مفارق ضحى..

ـ وحدك ـ وبتعددى

على كل حاجه حلوه مفقوده

ماتنسيش ياامه في عدوده

عدوده من أقدم خيوط سودا في توب الحزن

لاتولولى فيها ولا تهللى..

وحطى فيها اسم واحد مات

كان صاحبى يا امه..

واسمه

ناجى العلى

شعراء العامية المصرية في الصالون الادبي 2

شعراء العامية المصرية في الصالون الادبي 2

تعليق

تعليق

تعليق

ما الذي يحدث