تويت
القرود ع الحدود
واحنا لسه بستحمى
بالاغانى والفرح
والفرح لسه بعيد
العريس حيران هناك
والصبية فى الميدان
فوقها عسكر فى المعسكر
نفسها تدوق المسكر
والمرارة فى الحلوق
لسه ما قولناش يا هادى
لسه فى نفس الداوير
المحكمة والعبيط
والعميل ويا عياله
والسرير والتمثيلية
والمسلسل اعلاناته
انتباه للرقص تانى
رقص توك شو يالحوار
والحوار مين الرئيس
اللى جاى يركب يركب
مين عليه الدور يشطب
واللى قبل واللى بعد
واللى ضد واللى يفتى
واللى مدنى واللى دينى
واللى كان بيطاطى طاطى
اتنفخ ثورة فى بطاطى
واللى كانوا تمثيلية
مشهيات جنب الطبيخ
صاروا فوق الكعكة صاحب
قسموا التركة فى خيالهم
والخيال واسع عليهم
الاجندة هيه هيه
ضحك تافه ع العقول
من شلل كانت هفية
والقضية جوه سلة مهملاتهم
اترمت بعد التفاوض
واللى باقى عليها دود
القرود ع الحدود
نفسها تبرطع وتبقى
والمعاهدة سلام بدم
كامب ديفيد يالخيانة
يا لمهانة يا لخجل
دم أكتوبر ينقط فوق حروفها
يا لخجل
( لا تصالح ) قالها دنقل
قالها شعب بيتظلم
لا تصالح لا تهادن
لا تبيايع لا تقايض
لا ولا يا للخجل
لا لصهيونى سلام
لا لصهيونى كلام
غير كلام البندقية
( مصر يا مه يا بهية )
لمى ياله وثورى تانى
لملمينا جوه سينا
علمينا ازاى نحارب
العدو والصهيونية
مصر يامه يا بهية
علمينا نحبك أنتى
بالعمل مش بالأغانى
علمينا ازاى نكون لك
خير جند الأرض نبقى
علمينا ياله تانى
انتباه يا مصر يا مه
القرود ع الحدود
نفسهم فى جرح أخويا
نفسهم فى حلم أبوهم
نفسهم تبقى أسيرة
انتباه يا مه ياغالية
انتباه
تعليق