تويت
رباعيات الدجل
*****
بقلم الدكتور صبرى إسماعيل
*****
حارة الغلابة على راسها ولد مخبول
لو مين يدوسها ومين عايز بركته يقول
سمعت أهطل يوشوش غيّته مجموع
طب كنت وشوش كِتابك ,ترتفع وتنول
*****
صندوق إزازهم بيخدع بسطنا فى مقام
عمّال يذق ل ورا واِحنا نقول قُدّام
شاهد على جهلهم ولا قال لهم كِده عيب
تِهتك عقول البشر, ياما بكت آلام
****
فى أبيس كانت مسخرة والكُلّ شاهدها
نادية بإيدها العصا والكلّ رايدها
والست ليلى ف مطوبس راح لِها طوابير
حتى الصحافة تشعلل فيها وتإيدها
******
أكبر دليل على خبث النوى غُلبى
دا العقل شارد ماعارف كبدى من جنبى
سألت حتى الأسد طِلع الخبر عِنده
أمّا اللى عاند رماه العِند فى دربى
*****
خزعبلات حيّنا ياما حكت أساطير
ندّاهة ,إربة وجنّية وابو الطراطير
وطاسة نار ودقّة زار وعفاريتهم
وغول وشوفوا العجب,الميتين بتطير
******
العِلم نور ومين يِعلم يشوف النور
والعلم سِكة وماشيها يعيش مسرور
يزرع حياتنا أمل ويعلا بينا ل فوق
يلين الصخر ف إيدينه سنين وعصور
*****ٍ
شاطر فى ضرب الودع ويخدع الجُهّال
وكتير بيخدع ولا فاهم وكلّه مال!
أصل اللى فاهم خِرِس ياريته يوم يصرخ
ويقول يا أهل العرب إنّ البعيد دجّال
*****
الجهل لو يتخرس يُسكت مايتكلّم
مايخلّى حيط البلد يصرخ ويتألم
إن قال يمين كُلّه يروح ل يمين
ويعينه اللّى فى وِسط الجهل متعلّم
******
دا اِحنا الحضارة ومين غيرنا بنى أهرام
نِلنا الصدارة وبالكيميا وأعلى وسام
ب احمد زويل وب الرائد فاروق الباز
ومجدى يعقوب ومحفوظنا وكِتير أعلام
******
دالعقل يبنى ومين يكره عقولنا يخيب
دامسيره يخفى ولو يحفى ولاجل نغيب
شمس الحضارة مانوّرها سوى عقولنا
ما أُمّة ترقى ومشدودة ورا مجازيب
******
إياك تخاف من عمل أو تِعتِقد فى حجاب
أو تِحيى يوم الدجل وتصدق الكدّاب
دالنفس تاهت وأمراضها ياخلق كتير
والطب ثورة ميسّرها لنا الوّهاب
*******
فين العقول انطقوا تاهت وراحت فين!
لمّا نصدّق غبى فى حارة الجاهلين
تحلم معاه بالهبل ويخدعك بكلام
وهو حالته عدم وعيشته زى الطين
*****
دجّال يِغِش البشر بحجة الأبراج
الدلو يِسمع وثار الجدى مرة وهاج
بكره اللى عارفه يأهل الخير مولانا
هوّ اللى عالم بحال الرزق والمحتاج
******
دجّال وعامل نفسه قال! ساحر!
يخدع زبونه وهو بجهل يتماكر
لو كنت ساحر تسيب الفقر بيهينك
دا العِلم جايلك ويكشف فكرك الماهر
******
كُنّا زمان فى دجل وجالنا زيّه جديد
الجهل شكله حجل مهما صرخنا يزيد
طب ليه كبار البلد على الدجل ساكتين
هو الدجل مفترى ولاّ مخاويه كيوبيد!
تعليق