تويت
اجتماع قسم اللغة العربية والترجمة
في جامعة عربستان
ملهاة من مشهدين وفاصل بين المشهدين
=========
في جامعة عربستان
ملهاة من مشهدين وفاصل بين المشهدين
=========
المشهد الأول
إسماعين (يمر على المكاتب):
يا جماعة فيه اجتماع
وانتو لسَّه مطنِّشين؟
اللي نايمة، واللي ضاع،
واللي مش داري ده فين!
ياللا ياللا خلصـونا
هِمُّـوا يعني شويِّتين.
كل مرة نْدُور عليكو؟
مش فاضل غير بوس إيديكو!
وَكْوَك:
(تتظاهر بالحديث في التليفون، وتضع يدها على لاقط الصوت):
قل لهم يِسْتَنُّوا حَبَّـة
فيه مكالمة من أورُبـا
هي يعني الدنيا خربت؟
(ثم تقول في التليفون)
-اصبري، استني يا شابة-
(تعود لتوجيه الحديث لاسماعين وشامل)
أصل أم كوين إليزابيس
طالبة منِّي حديث وخطبة
غاوية تِرْغي، جنِّنِتْنِـي
عاملة مِ الحَبَّة دي قُبة
نِفسي أَخْلَص بس ياللا
جَبْر خاطِرْها على الله
شامل:
هو ده الْفَشْر المِأصَّل!
إسماعين:
يِِلْزَمُه شَدِّة مِعَسِّـل!
شامل (لاسماعين وهما ينصرفان):
ياللا بِينَا يا اسماعين
عايز اعَدِّل النافوخ
شدَّة والاّ شدِّتين
صوتها في وداني صاروخ
لازم اشرب كام سيجارة
أصلي في حضورها بادوخ
إسماعين
ربنا يصبَّرنا، غالب!
دي المرارة هَتِتْفِقِع
دنيا فيها الجحش راكب
والبشر يمشي يُقع.
وَكْوَك (بعد انصراف شامل واسماعين):
جتكوا نيلة، ف داهية روحوا
اجتماع متخلفين
آدي دقني، راح تدوخوا
حالفة أصلي مية يمين
ما في كلمة هتقولوها
إلا هاعْوِجْها أكيـد
واللي تيجوا وتسيبوها
راح اكلبشها بحديد
بكرة هيجيلكم جنان
وانتو فْ إيديَّا عجين
ناوية اطلَّع البلاوي
حتى تبقوا عار وشين.
(يجتمع القسم ويجلس الحضور حول طاولة الاجتماعات)
إسماعين:
في بدايـة الحـوار
شكري ليكم شكر حار
عندنا اليوم أجنـدة
حبَّة ذاكَ، وحبَّة من ده
نِقْلِب الموضوع ونمشي
بالهوادة ... ودون شجار!
وَكْوَك (مقاطعة):
لما كنتُ في بورُندي
كنا نعمل اجتماع
للمناقشة ...
سالم:
... للمناكفة
وَكْوَك:
أو نقـرر في البتاع.
حليم (بنفاد صبر):
حرام يا عالم! حرام عليكي!
هاتيها ياللا أبوس أديكي
أهيه بورُندي فاتحة دراعها
كمان بتنده أهوه عليكي
سالم:
ملعون بورُندي وست أبوها
إلهـي تِفْطَس ويحرقـوها
إسماعين:
بلاش مناكفة، نظام بليز
إحنا أساتذة ومُش معيز
عايزين نخلَّص نِرُوح بيوتنا
أحسن قُعادنا ده مش لزيز
شعبان:
عندي مداخلة، لو تسمحولي
في كلمة واحدة، ولو مروري
هاقـولها يعني بدون مؤاخذة
عشان دي حاجة أكيد ضروري
سالم:
الصبر منك يارب نعمة
يا عم خلَّص، مالوهش لازمة
إنتَ بتخطب هنا ف جنازة
شامل (ضاحكًا):
العقل عنده واخد أجازة!
إمام:
تقول دي كلمة، نلقى عريضة!
مكتوب علينـا زي الفريضة
رَشْرَش:
أنا معترضة ومش هارتاح
إلا نْنَّاقش أمـر خطيـر:
كورس الهيريتيج باليونيفورم
ولاَّ كمان نلبس طراطيـر؟
شامل (منفعلاً):
يا مثبت عقل المساطيل
صبَّرني، دا عقلي وهيطير!!
وَكْوَك:
شوفي يا رَشْرَش أمر بسيط
أنا في بورُندي -ودون تخطيط-
كنت أروح كده بالتاييـر
حتى ساعات نلبس زعابيط!
شامل (يتعجب بصوت منخفض):
والله ده مخك بقى عصافير!
شعبان:
روحي هتطلع منكو يا ناس
من أصغركو لأكبـر راس
عايز اتكلم وامشي ف حالي
نفسي اروَّح بقى لعيـالي
وَكْوَك:
قول يا حبيبي وقلبي داعي لك
بس اتلحلح، هِزّ ف طولك
شعبان
إدِّيني فرصة أقول ...
وَكْوَك (مقاطعة بسرعة):
... ما تقول
دا انت لسانك خط الطول
أنا مش هانطق، بس خلاص
ولا هاتكلم عـام أو خاص.
رغم كلامي بيشفي جروح
والمعدول فيكم ملـووح
يبقى كلامي يقف في الـزور؟
شامل:
إنتِ لازم لِك رفسة تـور!
حليم:
أو يستحسن يبقوا اتنين
أحلام:
ممكن أفهم حاجة، يا ريت
حد يقول لي وصلنا لفين؟
سالم:
فيه موضوع محتاج تصويت
أم السعد:
أنا جاهزة لكو صراخ وصويت
(ثم وهي تعدد كالنائحات)
لهوي، يا لهوي، ع اللي انا فيه!
راح ف شبابه، يا حسرة عليه!
ما اعرف أيه بس اللي جرى لُه!
كان وسطينا، اتشقلب حاله!
سالم (مقاطعًا):
يا "ام السعد" الله يهديكي
داهية تشيل من كان يعاديكي
تصويت يعني برفع الإيـد
مش باللطم نعيـد ونزيد
أم السعد:
أَهْ، تصويت يعني من التاني؟
أصل هوايتي صويت حياني!
خيرها ف غيرها، ياخويا نسيت
سالم:
نرجع تاني نقول تصويت
أحلام:
أنا راح اصوَّت بالاتنين
أيوه ولأَّه ...
حليم:
الصلاة ع الزين
إمام (وهو يدندن):
الصلاة ع الزين، الصلاة ع الزين
اجري بسرعة يا واد حسين
شوف لنا ريري بيتباع فين
أم نعيمة تقـول نعمين
واحنا نصـوَّت بالاتنين
إسماعين (بضيق):
نرجع تاني بقى لموضوعنا
شعبان:
أصلِ تْعِبْنا ودُخْنا وجُعنا
إسماعين:
فيه في البَدجِت كام سحتوت
إمام:
كام كتكوت؟
إسماعين:
يابْني افهم بقى مش معقول
نرجع تانـي نعيد ونقـول!
شامل:
باين إنه مقرقش فـول!
إسماعين:
لازم تخْلَص دي الميزانيـة
مين عنده اقتراحات ...
حليم:
... وردية؟
نعمل إعلان في الجرنان
مطلوب شابة رشيقة جْنان
متربية وبنت بنـوت
أمها ماتت، أو هتموت
لو قلت لها أنا أي كلام
تبقى في إيدي عجينة قوام
سالم:
صحصح يابْني بلاش أوهام
يخرب بيت عيشة العزوبية
خلت عقلك بقى ملوخية.
رَشْرَش (بهدوء):
طب أنا رأيي نجيب برغوتي
سامعين والاَّ أعلِّي فْ صوتي؟
أم السعد:
برغوت مين ده؟ اسم الله عليكي
هي الجامعـة تعـوز براغيت؟
رَشْرَش:
برغوتي شاعر ...
أم السعد:
أنا من رأيي ترشي البيت
بالموتولوف أو بالمبيدات
والبراغيت هتصير أموات.
أحلام:
أنا من رأيي عزومة جميلة
وسط جناين، وسط نجيلة
ونجيب فيها ...
سالم:
... صحن بليلة؟
إسماعين:
والنارجيلة؟
شعبان:
طويلة التيلة
إمام:
ونغني ...
شامل:
آه يا خيبة تقيلة!
وَكْوَك (لأحلام):
والنبي ياخْتي، كلامك زين
(يدق الجوال)
لحظة أرد على التليفون
(على الجوال، من طرف واحد)
رايحة أهاتفِك أنا بعدين.
قلتي منين؟
طيِّب فين؟
لأ، في بورُندي...
بنغالي، أو يمكن هندي ..
كنت هاقول لك ...
لأ مش عندي ...
شعبان (وهو يشد في شعره):
أنا في جهنم.
حليم:
صح، يا فَنْدِم.
سالم:
تفتح بقك، لازمًا تندم.
مرتضى:
طب نعمل معرض تصاوير
ونصور فجـل وجرجير
كام بوستر من هنا وهناك
راح نعمل جوّ وتغييـر
إمام:
أو سهرة ...
وَكْوَك:
... ويحضرها مدير
الجامعة، وأكبرها كبير
وعميدنا،
سالم (متهكمًا):
وتصفيق تهليل!!
وَكْوَك:
نعمل حاجة ماليها مثيل
إمام:
مع رقص وحبِّة تطبيل
حليم:
قول تهبيل ...
شامل:
وفضيحة مركِّبة شخاليل
سالم:
جوة العلبة هيطلع فيل.
حليم:
بالتأكيد هنروح في كازوزة
إسماعين (محدثًا نفسه):
كان مفروض أنا جبت الجوزة
حليم:
حد يسكِّت دي الأراجوزة!
إسماعين (محدثًا نفسه):
باين القعدة أكيـد هتطوِّل
أحلام:
أنا من رأيي نعيد مِ الأول.
وَكْوَك (مندفعة):
لما كنتُ في بورُندي ...
سالم (مقاطعًا):
أحلف إنُّه خراب مستعجل.
تعليق