معك حق اخوي مصطفى
اللهجة المصرية قريبة لفهم جميع العرب
اما لهجة المغرب العربي
سواء جزائرية او مغربية او تونسية فيالاه كنفهموها احنا وبزز
ههههههههههههههههههههه
اذكر اني في زيارتي لمصر حين كنت اتكلم مغربي
لم يكن يفهمني احد
وقالت لي صديقتي المصرية
انني كمن يتكلم لغة غير العربية
المهم
نخليو هاد الصفحة كل واحد يلغي بلغاه ويرد بلهجتو اشنو رايك ؟
*همسة
انا حبيت الجزائرية من خلال روايات احلام مستغانمي
واللهجة القسنطينية لي جات بعض الحوارات منها
في ثلاثيتها ذاكرة الجسد -فوضى الحواس-عابر سرير
مصطفى الله يحفظك اخوي

هههههههههههههههههه الأخت رشيدة ..الشيئ اللي صرالك في مصر صرا معايا أنا تاني .
نشفى في مرة كنت في أوتيل في المنصورة ، محافظة الدقهلية ، وكلمني صاحبي في المحمول من الجزائر .
أنا بديت نتكلم معاه باللهجة الجزائرية الأصيلة ...ولاحظت الناس في الأوتيل قاعدين يشوفو ومستغربين .
الشيئ اللي يضحك ..هو أنه عمال الأوتيل ظنو أني من باكستان وعاملوني على هذ الأساس ، وقعدت 15 يوم ..ينادوني بالباكستاني ، واستغربوا بزاف إني جزائري ، وما قدروش يصدقو أن اللهجة الجزائرية عربية !!!!!!

مانيش مليح !!!!



كتب مصطفى بونيف

نضت الصباح من النوم لقيت روحي مش مليح ...طول الليل وأنا نشوف في الكوابيس "الله يسترنا " ...راني عارف بلي حابين تعرفو واش شفت في منامي ....
شفت روحي طالع في برج عالي بزاف ، أكثر من برج إيفل نتاع باريس ، وأنا الله يعافيكم عندي مشكل الدوخة في الأماكن المرتفعة ...شفت من السور ، لقيت الناس تحتي كيما النمل ..بزاف صغار ..عيطت ومكاينش اللي سمعني ،
يا بابا ، يا ماما ، يا ....ناديت على زوجتي ... ناديت على صحابي يا خالد يا مروان ، يا أسامة ...والو ماكينش اللي سمعني !!!!

وفجأة ..شفت موكب سيارات توقف عند الناس المتجمعين يتفرجو علي ، وخرج من السيارة راجل لابس بدلة ، ونظارات سوداء ..آه عرفتو هو بالدات السيد الريس بشحمو ولحمو ونظاراتو ...
تكلم معايا في الميكروفون وقال : يا موس يا وليدي أنزل ماكان وعلاه تنتحر ، الانتحار حرام ...
أنا كي سمعتو قال هذا الكلام كبرت في راسي وقلت له : لالا أنا ننتحر خير لي من هذا العيشة ، بلادنا القبر خير منها ...لا عمل لا سكن ...الغلاء
- يا موس أجي لعندي أنا نساعدك ، خلاص من اليوم أنت مدير التلفزيون...
- لا يا سيادة الرئيس ، ما نحبسش نكون مدير تلفزيون الناس ما تتفرجشش عليه ..إذا ممكن تخليني مدير نتاع روتانا مش هتقدر تغمض عنيك أنا موافق ..
- يا وليدي ، مش هتقدر تغمض عينيك مش نتاعي ، هذا نتاع الوليد بن طلال .
حك الرئيس راسه ثم قال : لقيتلك عمل واش رايك تكون الناطق الرسمي نتاع الحكومة ؟؟
- لالا يا سيدي الرئيس ، ما نحبش نكون وجه شر على الناس ، نقولولهم المصايب نتاع الحكومة مرة ترفعوا الاسعار ، ومرة ترفعوا الضرائب ومرة تزورو الانتخابات ، ما نحبش الناس كل ما تشوفني تقولي تفو عليك !!!
- حك الرئيس راسه وهو يتمتم : واش ندير مع هذ المصيبة ؟ ثم صرخ :
خلاص يا موس لقيتها ، واش رايك تكون سفيرنا في هيئة الأمم المتحدة ؟
- لالا يا سيادة الرئيس ...ما نقبلش نخدم مع واحد اسمه بوكيمون !!!
صرخ الرئيس : واش تحب ؟؟؟؟
فقلت له : حاب نخرج من هاذ البلاد ، حاب نروح لسويسرا لاجئ سياسي !
أنا كرهت من المعيشة اللي عايشينها ، ...
وبينما كنت اصرخ سقط القلم من جيبي من أعلى البرج ....سقط على الأرض

الرئيس : الله يرحمك يا موووس ...ويغفرلك ....
-سيادة الرئيس أنا مكملتش كلامي ....يا سيادة الرئيس ...تسمعني ؟؟؟؟

صرخت وعيطت والرئيس ركب السيارة وما سمعنيش ...وأنا نضت من نومي مفزوع ....شفت لقيت القلم على الطاولة ..
خير اللهم اجعله خير ....

مصطفى بونيف

إوا فين راك أسي مصطفى... كاين شي جديد فهاد الصفحة ولا نعستي نتا وياها..
اللهجة الجزائرية قريبة بزاف من الدارجة المغربية.. وبالخصوص من لهجة ناس وجدة والشرق.
خليتك على خير