تويت
أرهاب ...
يوم الخميس الدامي 22/12/2011
حزن وهموم ومصاب ..
أوطن بيه أرواحنه بسعر التراب
والجثث صارت أشلاء
ونساء أمبتره وكومة شباب
ومر علينه ..
إيوزع الموت الصبح مثل الحصص
أنحصدت الناس أعله غفله بلا حساب
ويومنه بلون السواد وطعمه دم ..
والمنايا بلا جواز أطب علينه ولا كتاب
أنكَول هو أكتاب وأقدار ومشيئه
بس اشلون بغداد الصبح صارت خراب
أنكَول نصبر بس ألك نشكي يرب
وأختلطت أطراف وجثث ..
وما عرفنه أطفال من أم التلوع
لأن .. الشوارع نار والغبشه ضباب
الله أكبر .. كّبرت كل السماء
والمآذن نزعت ألوان القباب
الكنائس قرعت اجراس المآتم
صوت أخرس مايجاب ..
ياشعب بالكون محكوم بعقاب
أي قبلنه أنموت كل أحنه نعم
بس حكومتنه بسلام ..
والدعاء الله يارب الفلق
الله يارب العباد
أحفظ النواب مجلس .. مجلس النواب
احفظ الباقين باجر هم نموت
قربان للساسه الأجناب
ولو نموت بسيف يذبح بالركَاب
ونكتب أباب الحدود ...
محروس الوطن ..
ممنوعه المناهج تنعت الأرهاب
كاظم الفضلي
22/12/2011
تعليق