تويت
ياللي بََدَعْـتوا التِت
==========
*****
***
*
ياللي بََدَعْـتوا التِت
و الِفتنة جوا النِت
خَليتوا عقلي يشِت
العِلم مِنكم فين
في الزَنقه تَاخدوا دُروس
و القَاري فيكم مُوس
و بتسمَعوا لِتيوس
مابتعرفوش الِزين
عَديتوا فِسق الغرب
و مغمضين ع الدرب
و لا بتخافوش الرب
مِتوجهين ماشيّن
قُرأنكوا ليه مهجور
فُوقه التراب معذور
و العبد ليّه بيجور
ينسي المَمات و الدين
نِتساق وَرا الإعْلام
و الفِكر فينا ظَلام
منْطقنا وليّ و نام
و بقينا مُندهشين
بنشوف أمورنا قشور
نحكم بحِجة زور
نبعد عن المستور
و الحق يبقي دفين
نئذي اللي قال الحق!
و نقوله أوف و لاء
و اللي فلقنا بشق
شايلينه جوا العين!
و اللي الطمع جواه
دايمًا معاه و فداه
يمشي بنمشي وراه
و عياره علي كفين
و اللي لِبس مايوه !
تِحاموا له : حُرّ يا هوه
هوَه إنتوا هتحاسبوه ؟
كان ضرّ فيكم مين ؟
و اللي طَلَق لُه دَقنْ
تِخَافوه كَأنه جِن
ماهو حُر يا أهل الفن
عايش في حَاله رزين
و اللي اعتصم في ميدان
تتغني ليه الألحان
روايات و كان يا مكان
كموحد القطرين
عايزين زيادة أجر
من غير ما يطلع فجر
تـَرك العمل بقي فخر !
و الدِين يجر الدِين
و اللي فداها شهيد
الجوع في أهله يزيد
و الدار تقيد و تقيد
طول ما إحنا كده عاطلين
عايزين عمل و كفاح
و شباب يطـُل صباح
مش يبكي ع اللي راح
و يفجر الميادين
الخِطة أخدت أوك
خلـّوا اقتصادنا بلوك
و عقول شبابنا تسوك
في الشجب مُحترفين
و اللي معاه مشروع
قفله و نسي الموضوع
بقي بالخراب موجوع
راح تاه مع التايهين
تعليق