نسيت الزمان
كلمات/ بسمه شعبان

ولحظة تلاقى عينيا بعينيك يدوب الكيان
واحس الأمان
وقلبى يرفرف ويعرف بإنى وننك فى ننى
نسيت الزمان .
واشعر بإنك بساطى اللى طاير وطاير لفوق
واحبك بشوق
وادارى فى ملامحى ويفضحنى فرحى
وقلبى يغنى ويرفض يفوق
بحبك وموجى بيعلى ويعلى ويرجع يطير
واحبك أمير
بحبك بعمرى ..ببكرة اللى لسه ما بعرف له حال
فراقك محـــــــال
ومهما نسيتنى ..فى غربة جراح
فى أزة رياح ..
بشوقى لملامحك باسامحك واسامحك
وبانسى بإنك نسيتنى فى يوم
لأنك فى دمى وشايل فى همى
ولحظة آلامك أعاتبك والوم ؟!!!!!
بادوب غصب عنى
واكونك تكونّى
ما هو انت اللى باقى فى رحلة سنينى
وفرحى وغرامى وشوقى وحنينى
يا أجمل كلام فى عمرى اتوهب
دا قلبك دهب....ومعدن أصيل .
وغصنى يميِل
يوشوش فى موجك ويحضن وجودك أحس بوجودى
ولا اعرف حدودى
لكنى فى حضنك باحس بوطن
وأهل وسكن ورحلة حيـــــــــــــاه
باحسك عمار واحسك نهار بيشرق ويملى الليالى أمل
مدارى اكتمل فى لحظة لقاك
وباشعر معاك بنشوة ودفا
بهمسة صفا
باشعر بإنى فى عالم بعيد واحبك عنيد
بحبك بكونك خلودى القُصير
وابنى الصُغير
واحسك كفارس واخدنى وشاقق خبايا السحاب
واحسك شباب
ولو حتى مرت سنين العذاب تشكل ملامحك خيوط عنكبوت
هاحسك شطوط وبر وموانى لكل الحياة
وقارب نجاة
ونجدة غريق
فى قسوة سنينى هاحسك حنان
ياحبى اللى كاين وحبى اللى كان
ولحظة تلاقى عينيا بعينيك يدوب الكيان
واحس الأمان
وقلبى يرفرف ويعرف بإنى وننك فى ننى
نسيت الزمان .
26/7/200