بلدنا رجعت لنا
للشاعر المصري / رشاد هويدي
( شاعر الوادي )
*********************
كان لبلدنا رئيس
فرعون سنة ألفين !!
هو وجنوده يهيص
وله هامان واتنين !!
وعشان يكون له وريث
باع البلد والدين !!
************
ونشوف عجايب الزمن
مقلوبة فيه الأوضاع !!
اللي دفع التمن
للمشتري البياع !!
*************
بسلامته خرب البلد
ولا أسوأ استعمار !!
واهو اتمحى للأبد !!
ورجعنا أصحاب دار !!
طب نبني دارنا بقى ؟!
ولا نزيدها خراب ؟!
ونعيش في هم وشقا
ونسيبها من غير باب ؟!
**************
بلدنا رجعت لنا
نتعب شويه كمان
نجني الثمار كلنا
مش هم زي زمان !!
نتعب عشان مصرنا
وعشان نعيش في أمان
**************
تعبنا تلاتين سنة
ما كسبنا غير حرمان !!
والوقتي نتعب سنة
نرتاح سنين وأزمان
واللي يخون مصرنا
ملعون في كل مكان
هندوس عليه برجلنا
زي ما دوسنا ديدان !!
تنضف كمان أرضنا
من زرعة الشيطان !!
ومصر ترجع بنا
زي ما كنا زمان
وحضنها يضمنا
يملا قلوبنا أمان
************
رشاد هويدي
شاعر الوادي