خلطبيطه فى خلطبيطه
شعر / حسن سعد حسن
(كاتب وشاعر )


دوشة وزيطة
وخلطبيطه فى
خلطبيطه
والدنياهايجة
تقول شطيطة
ومولعة فى
الخلق ديه
دى ليبرالية
على سلفية
على إخوانية
على علمانية
بقت سلاطه
فى سلطانية
ولحد فاهم
ولحد عارف
والخلق خايفة
يا دى الرزية
قالوا تخير
أنا قلت أغير
واسحب بنفسى
العربية
بدل الحصاوى
ما أنا أصلى ناوى
والنية نية
أبعد بعيد
ع اللعبة ديه
لأجن نفسى
والخلق دية
دى مش سيا سة
ولا مفهومية
دى الحالة
صبحت مهلبية
على ملوخية
دوشة وزيطة
وخلطبيطه
فى خلطبيطه


دا مكلمنجى
ودا حلنجى
ودا مثقف
فى توب لومنجى
يارب سترك
يارب نجى
لحسن حجن
من الخلق ديه
دوشة وزيطة
وخلطبيطه
فى خلطبيطه

لحد عارف
ولا حد فاهم
الجانى مين
وإيه القضية
وإيه اللى جابوا
للعصبجية
هيه القضية
عيون بهية؟!
ولا القضية
فلوس بهيه؟!
ولا تكنش
أبو جلابيه؟!
دوشة وزيطة
وخلق خايبة
وخلطبيطه
فى خلطبيطه