تويت
وأحنا صغيرين
كنا نبنى حلم بالمكعبات
وليل يرحل
وليل يبات
ويفضل خط النيل
يشق كراريس
الجغرافيا
ويبل ريقنا
ويصحى فينا بكرة
والضحكات
ساعة الفسحة
والعيون المتسعة
على اللعب
جدول تسعة
وبراءة حب العلم
النشيد بلا ألم
كأننا عصافير
وبننشد الحبات
والقش
نبنى العش
نصحى ونبات
تلمذة
عيون مرتكزة
ع السوارى
والعلم فيها
بيدارى
عنا كسل الدنيا
ويزرع النجمات
ويفوت الليل
ورا الليل
والأمل
بيزيد ساعات
ويقل ساعات
والنيل بيرحل
كما رحيلنا
من سنوات لسنوات
والغيم بدأ يتقّل روحنا
تاهت براءة براحنا
ووقعوا منا
غصب عنا
ذكرى الفسحات
وكان لابد
فى ساعة ضلام
نجيب الغد
وترجع براءة الأيام
خرج النيل
من كراريس الجغرافيا
والسارى حرك العلم بالعافية
اعلنوا الفسحة
وسعوا عيونكم المتسعة
النهاردة يوم المظاهرات
سقط النظام الجاهل
سقط النظام الباطل
ورجعت ذكرى الفسحات
ورد المحبة فتح
ورجع النيل لكرساتة
والعلم لصحيانة
والوطن لحكايتة
واللى حلموا زمان بانوا
واللى خانوا راحو ما فضلوا
وفضلت عواميد المكعبات
وذكرى الفسحات
والرسم على الحيطان
والمراجيح
اللى بتطيح بالحزن
وسكر نبات
وغزل البنات
والوطن أبو الضحكات..
تعليق