إذا أردنا أن نختار رئيسا جديدا لمصر فما هي مواصفات هذا الرئيس ؟!
رئيس جديد
للشاعر المصري / رشاد هويدي
شاعر الوادي
////////////////
اسمع يا عم الشيخ
وانت يا أنبا يونان
يا أهل كفر الشيخ
دمياط قنا وأسوان
مطروح وشرم الشيخ
طنطا العريش حلوان
بورقة وقلم وتاريخ
بفكر وهدوء وميزان
بلا فلسفة وتلبيخ
ولا وسوسة شيطان
اسمع يا عم الشيخ
ويا المسيحي كمان
**********
سؤال بسيط ووحيد
مطلوب تجاوبوا عليه
رئيس بلدنا الجديد
عاوزين صفاته إيه ؟!
أيوه يا عم حسين
مينا وعلي وسيبويه
عاوزين رئيسنا أمين
يحط البلد في عينيه
ويا عم عبد القوي
وانتي يا ست إيمان
عاوزين رئيسنا قوي
نشعر معاه بأمان
وانت يا أسعد بيه
بطرس . حسن . عباس
عاوزين رئيس نلاقيه
شايل هموم الناس
فاطمة وإيفون ولويس
أحمد وشمس ونور
بلدنا عاوزة رئيس
ما يلفش علينا ويدور !!
عاوزين رئيس محترم
صاحب قيم وأصيل
ما يكونش راجل بُرم !!
ولا يبقى أبدا ديل !!
**********
عاوزين رئيس معجون
بتراب بلدنا صحيح !!
ولا عمره ليها يخون
مخلص حقيقي صريح !!
يصون تاريخ الاجداد
ويبني جيل ورا جيل
وينهي كل فساد
ويحمي أرض النيل
**********
عاوزين رئيس معروف
بالعزة والطيبة
قلبه ما يعرف خوف
يرجع لنا الهيبة
عاوزين رئيسنا حكيم
يعدل ما بين الناس
يهتم بالتعليم
ويبقى الرغيف م الفاس !!
**********
عاوزين رئيسنا يكون
فاكر الحساب والموت !!
ينسى الرئيس فرعون !!
يمشي عدل مظبوط !!
ما يقعدش دايما فوق
ينزل ما بين الناس
يبعد بطانة السوء !!
يزرع شجر إخلاص !!
**********
يعمل عشان مصرنا
دي عشانها روحنا تهون
هنكون معاه كلنا
لو حتى ضد الكون !!
وهنبقى مصريين !!
ومصر تفضل فوق !!
رب احمي مصر آمين
من كل شر وسوء
----------------
رب احمي مصر آمين
من كل شر وسوء
------------------
رشاد هويدي
شاعر الوادي