بالعامية نحكي ونقول:مفيش فايدة


........................

سألت النوم مالك عزيزوضنين

رد القلق ف القلب:تعبان وحزين

ومن كتر الى شفته بقيت خايف
:

الأمل ع السطح مفروش

وف عمق الحقيقة هلاك جارف

ألف وش وألف لون تقابلهم كل يوم

الحقد مدفون والبسمة الكدابة ع الشفايف

وأرخص الأسعاريا سوق القلوب

الحب والإخلاص لعبة عواطف

ولقمة العيش بقت ذل وعذاب

يتألف فيها ألف كتاب

عشان نعيش نِفخّم الحقير ونْعَظّم الهايف

دايرة نفاق ملهاش كبير

ومولد لصوص من ناهب وخاطف

وعبيد مال ومشايخ السلطان

والى تسأله يرد بميت لِسان

وألف مذهب مفيش فيهم مُخالف

وكل ما تحكي وتلف وتدور

تطلع إنت غلطان ومش عارف

والذكاء" كيف تلعب بالعقول

وتطلع من الهيصة بالقطايف

وتْفَهم الناس إنك راجل دين

وتقنع الضحية انك عليه خايف

وتاكل بالحرام مَلبن وتين

وتقول أنا مسكين "ماليش في اللفايف

أصل الشطارة تصادق الشيطان

وتعيش بالفجورقُرصان

وميهمكش ياإنسان

ان ربك قادر وشايف

...........................................