تويت
وظائف خالية
مطلوب رئيس جمهورية
لما تعلن شركة كبرى
عن وظيفة مميزة
تشترط تأهيل وخبرة
واللي يتقدم كذا !!
لو تقول مطلوب مهندس
بيشتغل ع الأوتوكاد
مستحيل هيروح مدرس !!
أو خبير في الإقتصاد !!
لو تقول نجار موبيليا !!
مستحيل نجار مسلح !!
ولاّ حتى الأسطى بيليه !!
به كمان الشركة تسمح !!
*************
بس لكن لما قلنا
إن مصر عاوزة ريس
التقينا الكل جالنا !!
حتى اللي مش كويس !!
أصلهم فاتحينها بحري !!
اللي هب ودب يسحب !!
المهم يبقى مصري !!
لو بيهرج ولاّ بيلعب !!
*************
شفنا ياما من نماذج !!
المثقف واللي جاهل !!
واللي فاهم واللي ساذج !!
أو سياسي ولاّ عامل !!
و لاّ دكتور أو محامي !!
أو مدرس ولاّ قاضي !!
واللواء ولاّ الحرامي !!
قهوجي أو حتى فاضي !!
واللي فاجر واللي قادر !!
تُربي ولاّ مسحراتي !!
واللي في البانجو بيتاجر !!
واللي شجع التعاطي !!
*************
والمزارع اللي قال
إنه مالك نص دارك !!
أو محفّظ له منال !!
إنه يعفو عن مبارك !!
وكهربائي أو موظف !!
ولاّ عاملة في النظافة !!
واللي بيتكلم ويخرف !!
واللي سايق الهيافة !!
*************
واللي كان بيحلم في نومه !!
إنه بكره هيبقى ريس !!
يبقى كان قالع هدومه !!
أو غطاه كان مش كويس !!
*************
واللي واللي ولسه ياما !!
ورغم ذلك مش بالومهم !!
بس لكن الملامة
ع اللي هرّج واللي سابهم !!
*************
كل واحد عنده رغبة
إنه يتكلم ويظهر !!
فاكر إن الأمر لعبة !!
لأ يا عالم مصر أكبر !!
*************
كان لابد شروط تغربل !!
تمنع اللي مش مناسب !!
واللي بيتمسخر ويهبّل !!
ألف مرة راح يحاسب !!
*************
واللي يتقدم ساعتها
اللي ينفع يبقى ريس !!
أصل مصر من قيمتها
يبقى ليها زعيم كويس !!
*************
مصر مش مجلس محلي !!
ولاّ مركز للشباب !!
مصر راح تفضل تملي
مهما كان فوق السحاب !!
مصر راح تفضل تملي
مهما كان فوق السحاب !!
*************
رشاد هويدي
شاعر الوادي
تعليق