غربة

أنا مصري صعيدي و ابن حته
ومتبهدل مابين ماذا و حتي
وشرقي كل عرض الشرق عرضي
وعربي كل أرض العُرب أرضي
لكن ما املكشي فيها حتي حته
وأهلي مشردين في كل حته
فحتي إمتي يا رب اغترابنا
وايه اخر فصول قصة عذابنا؟
ولاد النيل و ابونا مش طايقنا
تعبنا من عذاب الشوق زهقنا
وليه يا أمي ليه بس تسيبيني
وتنسي اللي ما بيننا ليه في ثانيه
وفي كل البلاد بتشرديني
وبتقولي لي شوف لك أم تانيه
ما كل الأمهات حاضنه ولادها
وليه يا أمي بس انتي اللي زانيه
وفين آخر الطريق يا عم خوفو
ياخوفي الود يموت ما الناس تشوفو
يا مينا المينا مليان ب البضايع
لكن مش لينا أصل البخت ضايع
يا أحمس ليه نسيت تنصحنا ليه
إذا الهكسوس أغاروا حنعمل ايه
وليه الصبح شابك في الغروب
وليه بيضلموا كل الدروب
وليه الأم بيطول حدادها
وليه يتحكم البهوات في زادها
يبيعو ولادها بالبخث في مزادها
ويدعو لهم و ليه بنقول امين
وليه نكدب مدام مش مبسوطين
وليه تعظم لناس استعبطوك
وليه توفي بحراره لناس خانوك
وليه شاري جميع اللي باعوك
فقوم يا شعب قوم يلعن أبوك
وقول يا قرد ايه راح يسخطوك
دماغك عاليه شارب 100 باكيته
معمرها بدال المره 6
صغير في المقام و ضيعف و حته
مالكشي في أي حته أي حته


عبدالله صبري