تويت
بعد أن قضى النظام الفاسد على طموحات الناجحين
ورفع من شأن الفاشلين
وأوقف المتعلمين في صفوف العاطلين
فإنني أقول لكل من يتمنى مستقبلاً مشرقا لابنه
طلع ابنك م المدارس
للشاعر المصري / رشاد هويدي ( شاعر الوادي )
***************************
***************************
طلع ابنك م المدارس
علم ابنك أي صنعة !!
إلا إنه يبقى دارس
واوعى اوعى يخش جامعة !!
ليه يضيع العمر كله
بين دراسة وبين مطالعة
لو تقوم في الليل هتلقى
عنده دايما لمبة والعة
وانت تدفع نور وهوَّ
م السهر شوف عينه طالعة
والدروس شوف أد إيه
م الحضانة لحد جامعة
في الأجازة والدراسة
ودرس تاني للمراجعة
وكل شيء بحسابه طبعا
والفلوس مافيهاش مراجعة
اوعى ابنك يبقى شاطر
أو يذاكر يوم دروسه !!
وأما تلقى إنه خايب
ابسطه وزوِّد فلوسه !!
وإن لقيته يوم بيذاكر
اضربه وكسَّر ضروسه !!
وأما تعرف إنه راسب
ابقى بارك ليه وبوسه !!
وافرحوا له وبشروه
إنـه بكـره هيبقـى فــوق !!
وإن سمعت بأنه ناجح
انصحه يعقل يفوق !!
قبل ما يضيع في الحياة
قبل ما يتوه في الشقوق !!
لو صحيح بتحب إبنك
ولاّ عاوز له مكاسب
ولاَّ عاوزه يسر قلبك
اوعى عمره يبقى طالب !!
علمه يلم الزبالة
علمه يمسح شباشب !!
علمه يسرح بترمس
أو يبيع أكل الأرانب
طلعه من كي جي ون
لاجل يبدأ بدري بدري !!
قبل ما يفوت الزمن
ويعدي العمر أوام يجري
وتضيع عليه كل الفرص
وما يلحق قشاش ولا مجري
لو عاش بين جامعة ومدارس
هيعيش العمر أكيد فقري !!
وأما هيتخرَّج م الجامعة
ويبـروِّز فـي البيـت شهـادات
ويقعد له خمستاشر عام
يبعت ويستنى مسابقات
وهيطلع نأبه على شونة
وهيبكي مرة ومرات
وهيلقى بتوع الأمية
همَّ اللي جالهم جوابات !!
لوظيفة ثابتة وفي الميري
لا دراسة ولا أي عذاب
وبتاع الجامعة الأستاذ
يفضل يتمرغ في تراب !!
ويا ريت يتعلم ويفوق
ويعالج كل الأسباب
ويسلح بالجهل ولاده
وكفاية إن أبوهم خاب !!
ما هي محو الأمية شهادة
ياخدها بسرعة وبراحته !!
في القسم الليلي هيتعلم
في نهاره يباشر مصلحته !!
من بدري هيبني المستقبل
ويتباهى ويفخر بنصاحته !!
فهمها بسرعة وهي طايرة
واتعلم اللي في مصلحته !!
وزميله الفاشل متعلم
واتخرج م الجامعة يا خيبته !!
بيعاني كتير وبيتألم
وأهو داير يشحت بشهادته !!
وبواسطة لجاهل متريش
يتوظف في الشركة بتاعته !!
وهينهي ويأمر ويتحكم
وهيفرض دايما سيطرته !!
ودا واقع فعلا ملموس
ما باقولش خبايا وأسرار !!
العلم ما أصبحش دروس
ولا عادش كتاب أو أفكار !!
العلم بقى الوقتي فلوس
ودي ليها إجلال ووقار !!
وصاحبها البيه والأستاذ
لو جاهل أو حتى حمار !!
ودا واقع فعلا وصحيح
والكل مسلِّم بيه راضي ؟!
و لاَّ دي مجرد كوابيس
تخاريف دي ولاَّ كلام فاضي ؟!
أنا فايق ولاَّ مسطول
مجنون ولاَّ أنا عادي ؟!
واقف على رجلي ومعدول
ولاَّ على راسي المرة دي ؟!
اقرأ كانت أول آية
ودا أمر من رب عليم
ورسولنا عليه صلا وسلام
ياما نادى كتير بالتعليم
والعلم خدوه لو في الصين
واتعلم دا الجهل أليم !!
والعلما ورثة أنبيا
نرفعهم فوق كل عظيم
والعبرة مش كم مدارس
ولا حتى تعليم مفتوح !!
ولا ستة أكتوبر والعاشر
ولا جامعة في محلة روح !!
ولا كم مليون راح يتخرج
بلا فايدة ولا أي طموح !!
لا بيعرف يقرا ولا يكتب
ويتخرج بطلوع الروح !!
والعلم مش بس شهادة
بناخدها عشان التجنيد !!
العلم دا منهج لحياتنا
وطريق للنور والتجديد !!
أعداءنا بياخدوا علماءنا
يبنوا لهم والمجد يزيد !!
وبنرفع احنا جهلاءنا
وبسرعة يزول مجد أكيد !!
عاوزين نتعلم من تاني
نتعلم قيمة التعليم
ونحب العلم ونتعلم
بالعلم نكون شعب عظيم
ونشجع كل اللي اتعلم
بمكافأة ومجد وتكريم
بالعلم هنبقى وهنكون
والكل يقف لنا تعظيم !!
حقا كما قال الله سبحانه وتعالى :
( يَرْفَعِ ٱللَّهُ ٱلَّذِينَ آمَنُواْ مِنكُمْ وَٱلَّذِينَ أُوتُواْ ٱلْعِلْمَ دَرَجَاتٍ وَٱللَّهُ بِمَا تَعْمَلُونَ خَبِيرٌ)
رشاد هويدي
شاعر الوادي
تعليق