تويت
بتمنى أكون إنسان
وبملك من الدنيا بستان
إزرع فيه الإمل
وأفتل من عيدانه ريحان
بتمنى ساعات أكون فنان
أسعد الحزين
وأضَحَّك الزعلان
بس حلم] طير جريح
كسير الجناح
حلم اتولد سفاح
زى ضوء النهار
بينهار
ومع خيوط الليل بينزاح
وأنا الملاح
اللى ياما أبحرت من غير شراع
أنا المداح
اللى ياما غنيت في الأفراح
وقلبي باكي حزين
مليان جراح
أنا اللي علِّمت الصبر يصبر
ويكون صبار
أنا اللي خليت الصخر يخضر
ويطلَّع الصبار
أنا اللي خليت قلوب العاشقين تتحرق
من غير نار
وآخر المشوار
لقتني نغمة حزينه
تتغنى على الأوتار
لقتني كلمة رقيقة
في دفتر الأشعار
لقتني دمعة شاردة
فى عالم الأسرار
تعليق