تويت
عريس مصر
عريسك يامصر ياست العرايس
مفلس ومشيخ وهايص ولايص
وفيه الممثل وفيه الهجايص
وفيه الكِشر ..ووشه عِكر
وفيه اللي ناعم وفيه اللي مايص
****
ده واحد نعلق عليه الآمال
وعايش في بدلة حبيبنا جمال
ولكن كلامه بعيد الاحتمال
لأن اللي مات مستحيل يتبعث
وشغل النضال ده ..ده أصبح محال
******
وواحد يقول ده بعتني النبي
وقصر الرياسة ده فيه ملعبي
مفكر يامصر إن شعبك غبي
هايقبل رئيسه يكون له رئيس
ببوس الأيادي كلي واشربي
***********
وواحد شغلنا بلامشغلة
يمثل علينا كلام حنجلة
وينفخ سيجاره وعامل ولا
كأن الرياسة بتاعت أبوه
وأحنا ياعيني قطيع في الفلا
*******
وواحد ده ساكت وعامل شجيع
مخاصم حبايبه وباين وديع
وعند الرئاسة هايقلب بديع
يقطّع أيادي ويرجم في ناس
وشعبك يامصر مسالم مطيع
******
وواحد قراري وفل الفلول
وداخل بصدره وفشره المهول
ويلبس بلوفر ويطلع يقول
أنا الرئيس الأنيس النميس
وكل العيال دي ناقصة عقول
******
عريسك يامصر ده لازم يكون
موظف إدارجي عظيم الفنون
يحبك وشعبك وعاقل حنون
وعارف بأنه في يوم نفترق
ولو كان يحبك لحد الجنون
********************
ريتشمند/ فرجينيا
تعليق