يا اهل الكورة الكرام
و الذوق و الإحترام
يا ريت بلاش تعصب
ونشجع بانتظام
حتكسب او حتخسر
الكورة دي رياضه
بتعلمنا التحدي
والأخلاق و الإراده
أنا أهلاوي جداً
وباعظم للزمالك
علشان نادي الزمالك
لعبه فيه فن راقي
ولو نزعل شوية
نتصالح في التلاقي
لو قلت الاسماعيلي
حاعزف ع السمسمية
فن و لعب و مهارة
ومعاني انسانية
دراويش رجاله مجدع
مهاراتهم 100 ميه
وباحب الاتحاد
علشان اسكندرية
والمصري البورسعيدي
والنيل و المشربية
حرس الحدود و انبي
دايما ساكنين في قلبي
شجع من غير تعصب
وارقص غني لناديك
وبلاش تشتم و تجرح
ده حرام ربنا يهديك
شفتو في غانا يا جماعه
والايد كانت في الإيد
رجعنا الكاس ويانا
بعزيمة شديده حديد
أنا فعلا أهلاوي
وعاشق لابو تريكا
وباحب حازم امام
علشان لعبه مزيكا
خلينا اخوات يا جماعه
ونحب اللعبه الحلوة
حتشوفو بلدنا ازاي
راح تصبح أجمل غنوة


عبدالله صبري

أهلاوي عاشق لكل ما هو مصري

شاعر- مصري – مقيم بدولة الكويت