تويت
فين سلامتك وفين جلالتك وفين حنانك يا أمي مصر
دول نهبوا نيلِك ودا زاد غليلك على كل قصر
فين شموخك وفين شماخك فين بطولتك وفين النصر
الكل طامع والبعض سامع قصة وقوفك في كل عصر
**************
الذهن عاصف وكلامنا واصف سيرة بطولتك والأمجاد
بقى كل طامع في الكرسي سامع وعامل مناضل دايس زناد
والكل بات أد التحدي ومين هيأدي ومين هيوالي للموساد
كل الحكاية معروفة يمكن والكل قلبه بقى ع البلاد
******************
أخاف عليكي من بياعينك ومسلمينك ومقيدينك على ورقة بيضا
ويخاف عليكي ولادي بعدي ونقصقصولك رايه بيضا
دا باع أصولك ودا باع جذورك ودا جاب لجلالتك عمه بيضا
وخوفنا منه في الأصل فينا إكمنوا كان من فرخه بيضا
********************
بسلامته واقف على الناصية كاشف سنانه لينا
مش عارف دي بسمه ولا وسمه ولا وحمه على حاجة فينا
بسلامته ناسي بسلامته راسي بسلامته كاتم أنفاس أهالينا
بسلامته صَرَّح بسلامته شرَّح بسلامته شخَّص رمد عنينا
*****************
يا مصر فوقي وقومي سوقي واحمي عرينك من الذئاب
واختاري راجل من صلب راجل مش فرخ شاب
سلامتك أمانة والعين عليكي وأعاديكي رابطه ورا كل باب
بقى كل جمع في الكرسي راغب والكل زي ما قال الكتاب
************************
إحترت فيكي واحترت ليكي واخترت افتح صفحة جديدة
ليكي المحاسن والفضائل في كل شاشة وفي سطور الجريدة
وهعمل واسوي واهوهو واعوي وامأمأ بس تكون مفيدة
نفسي اقعد ع الكرسي وحدي وأمر وأنهي واوضح عقيدة
تعليق