تويت
إعدام شهيد
معقول صحيح ؟!
فرعون بإ يدكم تختاروه ؟!
علشان يخلًّص عالجريح
ويدوس على رقبة أبوه
يا ناس يا هووه....!!
معقول تكون ؟!
ثورتنا قشة رماها ريح ؟!
معقول تكون
وهم وظنون ؟!
معقول شهيدنا اللي اتقتل
علشان نكون
راح يتعدم جِوًّه الضريح ؟!
معقول يهون ؟!
معقول يكون اللي قتل
واللي لدمانا مستبيح
واللي بيهاجمنا هجوم صريح
يبقى بطل ؟!
وعقابه يبقى المديح؟!
معقول بإيدنا نرفعه؟!
فوق الجميع ؟!
وبإيدنا إحنا نرجعه
علشان يبيع ؟!
باقي الوطن
ونرجع عبيد ؟!
نقضي كمان باقي الزمن
نواح ... عديد !!
ويا ريت يفيد !!
نبكي ونطلب السماح
م المجرمين !!
نندم على كل اللي راح
ونقول لهم متأسفين!!
أصل احنا كنا مغفلين!!
علشان حلمنا بالصباح!!
ينجدنا من ذل السنين
بس اكتشفنا إننا
من غيركم مش عارفين نعيش !!
وإن الكرامة في ذلنا!!
ونموت عشان فرعون يعيش !!
و إن فعلا حلمنا
بالعدل والحرية طيش!!
وعرفنا برضه إننا
مش وش نور !!
وحياتنا أفضل في الظلام !!
ونتعب إن عشنا في سرور !!
علشان راحتنا في الآلام !!
وبلاش كلام
أصل احنا فعلا تعبانين
عاوزين ننام !!
م الآخر احنا ميتين!!
والضرب في الميت حرام !!
**********
رشاد هويدي
شاعر الوادي
تعليق