تويت
الحب عمره ما كان عبط
و لا عمره كان أبدا غلط
من غير ملام من غير كلام
قلبي ف هواك تاب وانضبط
الحب ليه دايما عذاب
الحب ليه هجر وعتاب
ومهما شفنا ف قسوته
برضه فـ هواه القلب داب؟!
ليه دايماغاوي تجرحني؟
و دايما تبخل تفرحني
و مهما أقرّب لك تبعد
حالف أبدا ما تريحني!!
اجرحني ..اجرح قد ما تقدر
و اوعى فـ يوم حبي تقدّر
خليك كده مش حاسس
لحد ما بعادنا يتقدّر
و الحل ايه بقى ف العذاب ده
ايه ده بس يا قلبي اهدى
مش حمل أسى أنا ولا بُكا
صلي ع النبي و استهدى
نستنى حبة نستنى سِنّة
يمكن يشاور و الا يجيلنا
و إن ساق بقى فيها العوج
يبقى الحكاية فيها إنة
تعليق