تويت
خالتي عميقة .. دا كان أسمها زمان قبل ما تدوبهم أربعة عسكر
أيوة خالتي دوبت أربعة عسكر دا غير الجوازات اللي قبل كدة اللي ما تتعدش .. أصل خالتي غنية و جميلة بس ملهاش حظ و كل ما تتجوز واحد يتحكم فيها و يوريها الويل .. لحد ما جه الأخير فلسها و خربها و قعد على تلها .. و خلعته يا ولداه بعد ما صرخت و ثارت و اتوسطت أمة لا إله الله أنه يعتقها هي و أولادها ... و بعدها أتقدم لها 13 عريس .. أيوة 13 عريس و بعد ما خالتي فحصت ملفاتهم و سيرة حياتهم و عملت لهم فيش و تشبيه ليكون لهم سوابق في التقليب و التأشيط ... اختارت أبو مدني و قالت يمكن يكون السعد و الخير معاه أنا و أولادي الطيبين .
و بعد ما اتجوزته يا ولداه .. أهله و عشريته اتلموا عليها و عايزين يتحكموا فيها و بقوا يقولوا عليها عميقة دي عميقة و لا حد بيقدر عليها .. و انتشرت الإشاعة في البلد .. لحد ما خالتي صدقت نفسها و عملت فيها عميقة و اتغرت على الكل .. و كل اللي يتنفس أو يتكلم معاها تقوله أخرس أنا من عيلة كبيرة و متأصلة في المعمقة .
لكن جوزها مقبلش على نفسه أنه يكون جوز الست و قال هي صدقت نفسها و لا أيه .. ده أنا اللي عملت منها عميقة عشان الكل يخاف و محدش يقرب لها غيري .
لكن خالتي عاشت في الدور و بقت تتمخطر رايحة جاية تغيظ في الكل لحد ما جوزها فاض بيه .. و قال خلاص كفاية معمقة لحد كدة . لازم تعرف حجمها كويس .. و راح عاطيها قلم فقدت فيه الذاكرة .. نسيت حتى أزواجها الأربعة و مش بس كدة .. دي بقت ماشية وراه زي ظله .. و كل ما يدخل البيت .. تغسل رجليه و تقوله .. حاضر يا سي مدني .. من عيوني يا سي مدني .. أنت تأمر و أنا أنفذ يا سي مدني .. أنت الحب الأول و الأخير يا سي مدني !!!
و سيرة خالتي بقت على كل لسان والناس بقت تعايرنا و يقولوا لنا .. روحوا شوفوا معاميق خالتكم راحت فين .. و قررنا نكشف عليها عند الدكتور .. و نطمن على معاميقها .. و لو كانت خربانة نغيرها و لا نسفرها برة تتعالج و بعد ما الدكتور كشف عليها قالنا :
_ أنا آسف .. مضطر أقولكم أن خالتكم .
_ خير يا دكتور .. خالتنا مالها .. طمنا على معاميقها أرجوك
_ خالتكم يا ولاد لا طلعت عميقة .. و لا حتى تفيدة
_ يعني أيه يا دكتور .. أحنا انضحك علينا
_ أيوة يا ولاد .. خالتكم لابسة العمة من أول جوازة
_ و العمة دي نخلعها أزي
_ بعد قرنين إن شاء الله
تعليق