تويت
حزينة اوي وقلبي موجوع
و صرخة جوايا بتهز الضلوع
قلبي بيبكي و عينيا
عاصية عليها الدموع
بأصرخ و انادي و ليه
صوتي مهوش مسموع
مشيت في طريق طويل
مش قادرة اكمله
ومفيش منه رجوع
بير غويط
ومفيش منه طلوع
جوايا ألم يكفي العالم
و حلم يتيم مقطوع
كل ما أحلمه قبل آخره
أفوق و أحوس
وافتح عينيا
على واقع كئيب منحوس
امتى يا حزني تفارقني
و امتى أصحى من الكابوس؟!
بأصرخ بصمت
ما قدرش أطلع صوت
لجل ما ازعجش
جلادي اللي ماسك سوط
خلليني ساكتة و كاتمة
في قلبي لحد ما أعلّ و أموت
اه يا دنيا يا اللي فيكي
الأمل مفقود
تضحكي لي ضحكة صفرا
و أصدقك
وجواكي غل حقود
تستكتري عليا الفرحة
والاقيني ف طريق مسدود
و اضحك على نفسي
و اقول ده أكيد مهوش مقصود
لحد امتى حتخدعيني؟
لحد امتى حأضل فيكي واتوه؟
صدق اللي سماكي دنيا
اللي يأمن لك
عبيط معتوه
تعليق