يوم اللاجيء العالمي
بقلم.. عبد القادر الزيناتي

يللي بتسأل وبتتسائل
عايز تعرف احنا مين
احنا اللي بتجمعنا الخيمه
ف الكون وسمونا لاجئين
واحنا اللي ع الأرض عددنا
في خيام زرق أصبح ملايين
بعد الحرب نظهر تلقانه
ف جبل وصحرا محتميين
الحرب هي اللي تشتتنا
وصورنا تشوفها من سنين
وتشوفنا على خريطة العالم
خيام ع الأرض ومزروعين
سيرلنكي واوغندي بلادو
ولاجئ في وطنه ف فلسطين
وصومالي وعراقي كمان
وافغاني وعد ف ملايين
فيهم ال هاجرو بره بلدهم
وجوه بلدهم قالوا نازحين
ودول بتعطي وبتساعدهم
ودول تغمض وتقول مين
لسه بتسأل وعايز تعرف
ازاي أصبحنا لاجئين
علشان من القتل هربنا
وأطفالنا ماتوا جوعانين
وعشان نتمنى لاولادنا
يعيشوا بأمن ومرتاحين
أيام برد وحر وعشنا
خوف ورعب من القاتلين
ومن ميه مسمومه شربنا
وأمراض تحمل للمساكين
ورياح لما بتعصف فينا
من خوفنا بنصبح مجانين
ولما الأمطار بتأتينا
تلقانة ع الميه عايمين
احنا نناشد كل العالم
امتى الأرض تعيش بسلام
مش دول وتفضل تتحارب
وتزيد في شعوبها الآلام
سيب الحرب وتعالى نتصالح
وفوقنا يرفرف سرب حمام
والعلم الأزرق يكون مرة
أحلى ألوان طفل بأحلام
لونه سمانا ولون ميتنا
سنه وتكون لنا أحلى أيام
ويا دول العالم ياغنيه
للفقرا زيدوا الاسهام
اتمنى السنين الجاية
يوم اللاجي يلغى تمام
واتمنى للجوئنا نهاية
للوطن نعود ونعيش بسلام
وحروب تخلص وبننساها
وحب بيجمعنا ووئام
الزيناتي
القيت بتاريخ 20/6/2011 اليوم العالمي للاجئين في مخيم الهول .. سوريا