تويت
1
المداديه
مش قادر ليه ع المداديه
و بتعرف بس تقوم فيّـه
ما أنا زيك برده أنا عصبيه
لكن بمزاجي أنا سايباك
دايمًا لا بتهدي و لا تهدّي
و معاند و واخدها تحدي
و لا مره تسامح و تعدي
و أنا كده بقي ممكن أنساك
أول ما بتمشي بتتعايق
و بتبقي رومانسي قوي و رايق
طب في البيت لـيّه قاعد متضايق
و عامل إزعاج مع إرباك
بتتطنش ...... طب طنش تقسي
و تخاصم ! .. و بترجع تنسي
و عايز لك مية شكوي و جلسه
في كل مكان هنا و لا هناك
تضحك علي مين و تقول طيب
شايفاك بترق و بتعجب
دايمـًا تجرحني و لا تطيب
و بره البيت تعملـّي ملاك
قدام الناس تبقي حنين
مهضوم مظلوم قوي متمسكن
و إنت بتتعافي و متمكن
و أنا عندي طبيبك و دواك
هديلك وصفه و سحريه
جـرّبها و راح تدعي عليّه
هقلب علي ظالمه و عـِنـَديـّه
و شوف إذاي هعملها معاك
مش راح تتهني بيوم واحد
و هخليك في الحزن مجاهد
و تعيش الدنيا تقي و زاهد
تدعيلي أقوم مش فاكراك
لو يوم فكرت تقول كلمه
لو صوتك يطلع فيه نغمه
يا تكون قاعد زي النِسمه
يا أكون يا ابن الناس خلعاك
فكر كده دوّرها في عقلك
من سِـمي يا عمي اشتري نفسك
و اهدي و زود أخلاق صبرك
سيبها تعدي كفايه هلاك
==============
2
خلاص ملـّيت
خلاص ملـّيت
وقلبي الدافي مبقاش بيت
فــ لحظه نسيت
و أنا اللي بعمري ليك ضحيت
لحبي طويت
و بعدي لحد تاني هويت
خلاص ملـّيت
زمان أنا كنت مش شايفاك
و صدقت الهنا وياك
مجاش علي ظني إن هواك
هيخونني و أنا وفيت
خلاص ملـّيت
كتبت علي الشجر اسمك
نقشت الضي من رسمك
غزلت من الغرام حِلمك
هلكت الحلم فين و رميت ؟
خلاص ملـّيت
طويت أيامي فـ كتابك
قفلت علي الهوي بابك
و ليه غدر الجفا جابك
و ليه علي جرح قلبي مشيت ؟
خلاص ملـّيت
نصيبي بعد ما آدي
تودع دنيتي و ودي
و مين باقي علي عهدي ؟
لو إنت غدرت و اتخليت
خلاص ملـّيت
==========
أشعار / مها ضِرار
-----
تعليق