كلمة في ودانك يا مرسي

لما كنا عيال صغار
كنا بنقول الزعيم يقدر يشيل كل العمارات الكبيرة بأيد و بس
كنا فاكرينه يدخل المصرين بكلمة .. جنة الخلد الكبيرة
كنا فاكرين إن ناصر يوم هايحرق اسرائيل
وكنا بنقول الشجيع
ولو فريد شوقي بيتعارك
كانا نملا السيما خبط
كنا فاكرين أن صورة في الميدان .. معناها نصر
كانت الدنيا جميلة
بس كنا عيال صغار

واحنا في الإعدادي قالوا أنه مات
ناس بكت
وناس رمت روحها م البلكونات
وناس قالولنا إن بكرة
ياما ها تدق على الروس الصجات
والمخبي لما نعرف أيه حقيقته
بكرة هنبطل سكات
بعدها عبروا الهزيمة وانكسر جبل الأهات
وكبرت الصورة في عينينا المحبوسين
قلنا يومها جه بطل مصر الهمام
ياسادات يا سادات

لما رحنا الجامعة (كانت سينا رجعت كاملة لينا )
والمظاهرات في الشوارع
كنت فاهم إن خاطر ابنة مات ظلم وخيانة
وان من باعوا الوطن خانوا الأمانة
وتسجنت مع اللي راحوا في الوبا
وتضربنا وتسحلنا .. وانكسرت
وابتدينا نفهم الدنيا الغريبة
انبطح منينا ناس
وانشرخ طعم الحماس
وانزوا عنينا صابر الشاب الجميل
كاتب الشعر الكبير وبنتاع النايات
وراحت الدنيا جميلة
واحنا لسة عيال صغار

ولما مبقناش صغار
زرعوا في الأرض البوار
ورسموا شرخ على الجدار
والحمار يورث حمار
صغارنا رجعوا للميدان
بدروا روحهم في ميادينك سنابل
ضخوا في عرقك يا غالية نور عفى
ورجعت الدنيا الجميلة
ورجعونا عيال صغار

شوف يا مرسي صحيح بحبك
بس عمري ما هاسميك الزعيم
أصلي تبت من الزعامة و م الزعيم
كلمة في سرك بقولها بكل حب
حتى لو دنيتنا حلوة
صغارنا مش زي الصغار