في بلدنا
****
في بلدنا...
تلاقي الحراميه...والخونه بقرش مرميه
وبنعمل مصر في اغنيه...ننساها بعد مانسمعها
تشغلنا اخبار فنانه...والمطرب ابو روج ولبانه
ولعيبه كوره تعبانه...بتبوس الدبله في صباعها
في بلدنا...
بنرخص بعض...والسمنه كده وش السعد
وبنطفش مع اول قرض...وبنوكنا بتضرب تفليسه
وتملي بنشجب وندين...نتعصب زي المجانين
وبنحلف ونسب الدين...ونكاكي جوا التقفيصه
في بلدنا...
بنحب الكوسه...والفكره الجامده محبوسه
والاعذار ديما مرصوصه...وتملي عندنا شماعه
والفقرا زي الكتاكيت...بنربيهم علي الفتافيت
واللي في مره كده هيزيط...هنطلع علي اهله اشاعه
في بلدنا...
عايشين ع الماضي...وفراعنه وثروه اجدادي
والحاضر كشكوله ده فاضي...سبوبه واهي لقمه عيش
ع القهوه تلاقي اختراعات,,,مرميه في درج البهوات
وعشان انا مش ابن ذوات...هاخد علي راسي يا درويش
في بلدنا...
جوانا مناعه...من قولت فلاح وزراعه
بورنا ارضنا يا جماعه...وبنستورد قمح كمان
م الابره لحد الصواريخ...بنجبهم من بره يا شيخ
ونقول في بطاله وبطيخ...جايين من كوكب جهلان
في بلدنا...
عايزين حريه...ايه يعني افلام جنسيه
في الدول الحلوه الغربيه...الراجل يتحول ست
والست تعري في جتتها...ويقولوا تحرش هددها
دي الحريه يعمر بيتها...بنجيبها من الانترنت
في بلدنا...
بنقول اوكيه...ونسينا العربي يا مون بيه
وعشان نوصل نعمل ايه...بنبيع اخلاقنا في مزاد
وبنلعب عسكرو حرامي...وحياتنا مسلسلها درامي
وابو دقن بيطلع اجرامي...ولسانا بيبقي الجلاد
في بلدنا...
الشوطه بجون...والعاقل يبقي المجنون
والمبدأ صدا ومركون...وتعبنا من قولت اه
وازاي نتقدم ونعدي...واحنا ياناس وخدنها تحدي
مع بعض وعلي رايك جدي...مستوره من عند الله
وعجبي
احمد الصارم