قصيدة ( ليلة منام سِدنا النبي ) هشام فتحي

ليلة منام سِدنا النبي
شفت الشجرْ
وسمعت غنوة من لسان عصفورْ
وكأن نجمه في السما
بين الفلك بتدورْ
لمسة حنان عدت هنا
ولا فيش ملاك ولا حورْ
شايف بباب الخلق
حاجة بتتولد
بينها وبين الخلق سورْ
يا اهل المنام
سايق عليكم فرحتي
إيه الحكايه انا شففت نور
طب يعني ايه
النجمه هاربه في السما
تفسيره إيه
الغنوه والعصفور
أمي الحبيبة تقول لِي قوووووووووول
وانا قلبي يحكي فرحتي
تشهد ملامح جدتي
وتقول لي مش معقول
افرح يا واد
د النور ده هُوْ
سِدنا الرسولْ
لو كنت حاسس
في الزمان ده بأي ضيقْ
تايه وبتعدي البحار
عايش غريقْ
دوّر على سيرة النبي
وافتح كتاب اسمه (الرحيق)
هتلاقي معنى للحياه
كل الهموم بتزولْ
..... ........... ...
لِيلةْ منام سِدنا النبي
قلبي اللي بيرفرف عليك
ويحن ليك
أمي الحبيبة
تقول لِي اوعى تسيب يا واد
سنةْ نبيكْ
فرحانة بيكْ
تفتح كتاب سِدنا النبي
صلت عليكْ
يا سلام على سيرة النبي
كان عمري يوم ما عرفته
واتربيت عليه أربع سنينْ
جارنا اللي وصّانا النبي
نحسن إليهْ
لو غاب ندق الباب
ونطّمن عليهْ
لو حتى مين.....
كان عمري قال اربع سنين
وعرفت أنا حق الطريقْ
ولا عمري خنت ف يوم صديقْ
سِدنا النبي علمني
أحب الطيبين
علمني كيف القلب يصفى
والصحاب متجمعين
علمنا لو جانا الغضب
نحبس غضبْ
مهما اللي كان
لازم نلين
كان عمري قال أربع سنين
جارنا اللي ساكن
جنب بيتنا "بنيامين"
وامي الحبيبه تقول يا واد
سلِّمْ عليهْ
لو شفته مره في الصباحْ
صبّح عليهْ
لاجل النبي
لازم تكون للجار أمين
.... ..... .....
من كام سنه
رسموا النبي
إلا النبي يا اهل الكتابْ
وحْياةْ كتاب الله
تهون النفس
ويهون العذابْ
لاجل النبي ترخص حياتنا
والشيوخ قبل الشبابْ
مين اللي قال
وصّى على أهل الكتاب
غير النبي
يا أهل الكتابْ

دانا نفسي اشوفه
واعتذر لُه
مره تانية في المنامْ
وانا غصب عني
بين بحور الشعر
بغرق في الملامْ
كان عمري قال
تلاتين سنه
ولا عندي غضبة بتنتفض
غير الكلام!!!!!!
كلمه وقالتها جدتي
لحمك ودمك يا ولد
سنة نبيكْ
واوعاك تسيب حق النبي
ويهون عليكْ
دانت اللي شفته في المنام
دلوقت واقف بعتذر
غضبي كلام
أسفي كلام
أصل الحكايه
الصمت واكل غضبتي
والشعر برضه
كان كلام في كلام

أبوخلاد هشام فتحي