فسحة شعرية باللهجة المحكيّة و الشاعرة الكبيرة:فردوس النجار-الليلة في الصوتي

تقليص
X
تقليص
 
  • الصفحة لـ 1
  • تصفية - فلترة
  • الوقت
  • عرض
إلغاء تحديد الكل
مشاركات جديدة
السابق template التالي
  • سليمى السرايري
    مدير عام/رئيس ق.أدب وفنون
    • 08-01-2010
    • 13572
    #1

    فسحة شعرية باللهجة المحكيّة و الشاعرة الكبيرة:فردوس النجار-الليلة في الصوتي




    Cv
    للشاعرة فردوس النجار

    فردوس النجار من سوريا من قرية في مدينة السلمية حماه
    تقيم في دمشق ..متزوجة ولها أربعة أولاد ابنتان وصبيان كلهم جامعيون والأصغر ثانوي
    عملت في مؤسسة الطيران العربية السورية كمضيفة أرضية ومن ثم إدارية لمدة سبعة عشر عاماً بشهادة التعليم الثانوي الأدبي.
    ثم استقالت لإعالة أولادها على أمل العودة للعمل..ولن تتسنى لها العودة..
    فعادت للمقعد الدراسي في جامعة دمشق كلية الإعلام. لكنها ما استطاعت التوفيق بين الأسرة والجامعة
    فأسرتها الأمومة وتركت الجامعة ..إلى أن أحزنتها و أتعبتها العزلة ..
    فاستنجدتْ بكتابة الشعر الذي بدأته بعمر الرابعة عشرة وغادرته بعد الزواج..فرَمَّمت بعضها....وباختصار انتشرتْ كشاعرة لكل أنواع الشعر وألوانه ولهجاته..وانتسبت إلى جمعية شعراء الزجل في سوريا فحصلت على العضوية فيها .
    ونشرت بعض أعمالها الشعرية في الصحف السورية وبعض العربية.
    وفي مسابقة شعرية لجريدة قاسيون التي افتـُتحت لمدة ستة أشهر لكل الشعراء وكل الألوان وكل الأعمار وكل التجارب.( حصلت على الجائزة الأولى على مستوى القُطر حيث تقدمتْ بثلاثة قصائد كغيرها من المتسابقين..وفازت بقصائدها الثلاث)علماً
    ..والقصائد التي قدمتها :
    هي 1 _ياروح روحي يا وطن
    2_وحدي الحقيقة :
    ._3يم الشهيد باللهجةالبدوية
    لحن للها الدكتور غزوان فيما بعد قصيدتان من كتابها الزجلي (هيدي أنا)وهما
    _أم الأولاد
    _قـَلـِّي الوطن :حيث غنتها مغنية أوبرا عالمية (ديمة أورشو)

    ومن كلماتها cdلفرقة العاشقين الفلسطينية
    وأغنية للتلفزيون السوري
    كتبت كل ألوان الأغنية العربية والمصرية ولها تجربة في كتابة السيناريو مثل :(قد يثمر الزيزفون)
    ولها تحت النشر عدة دواوين لم تنشر بعد حسب الظروف!
    منها :(وللمحطة التي ستعلقني عليها الريح)!

    وها هيّ الليلة تطلّ علينا هذه الشاعرة المتالّقة بتجربتها الناضجة لتاخذنا في رحلة عبر الحرف.
    أهلا وسهلا ومرحبا بك أيّتها الشاعرة الأستاذة :
    فردوس النجار
    التعديل الأخير تم بواسطة سليمى السرايري; الساعة 29-09-2012, 18:21.
    لا تلمني لو صار جسدي فاكهة للفصول
    الكلمات الدلالية (Tags): لا يوجد
  • سليمى السرايري
    مدير عام/رئيس ق.أدب وفنون
    • 08-01-2010
    • 13572
    #2
    يْسْعِدْ صباحو

    يْسْعِدْ صَبَاْحُوْ اللِّي تَرَكْ قَلْبي وُمْشْيْ.

    وَبعْدُوْ عَ ريْحَا مْنْ غَرامي بْينتْشي.

    بْتْشْهَدْ عَليْنْا السَّاقْية الْمْعُنَّقَه .. وُحَبَّاتْ عَجْرَه مْنْ ثِمار الْمْشْمْشْي.

    إِنَّكْ بِرُوْحي مْعَلَّقْ وُمَا بْتْخْتْشْيْ.

    وإنَّكْ سَرَحْتْ كْتْيْرْ بْعْرُوقي غِوا.

    وُبَعْدَاْ أصابيعَكْ عَ صْدري مْعَرِّشي.

    شُوْ عَذَّبَكْ يَاْ رْفيْقْ لَمَّا وُصَلْتِني؟!

    شَوْقْي الْغْفْي عَ جناحَكْ؟! وقلبي الْضْعيفْ؟!

    وَلاَّ القُبَلْ لَمَّاْ تَرَكْتَا مْرَشْرَشي؟!

    شُوْ طَيَّرْ الغَفْوَاتْ ؟! لَمَّا تْمَايَلُوا؟!

    وُشُوْ ضَيَّعَكْ؟ مْنْ أَرْزْ لْبْنَانْ الْحْلُوْ؟!

    وفوق الْعَريْشِه خبار قلْبِيْ معَشِّشِيْ!!.

    الله مَعَكْ!! لَوْ رْحْتْ عَاْقَدّ الزّمان!!

    وُمَاْ ضَلّ بالدّني إلي أَيَّاً مكان!!

    الله مَعَكْ لَمَّا السّنُوْنُوْ بْتْلْحَقَكْ!

    وُبْتْعْشَقَكْ نَبْضَاتْ فْيِّي مْهَمَّشة!!

    وُألله مَعَكْ لَمّا اْلْكْحْلْ يْصْبِحْ عَقْيْقْ!!

    وُتْبُوْسْ عَيْني تًعَلِّمَاْ وَيْنْ الطَّريْقْ!!

    وُالْخَصْرْ يِتْلَوَّى مْتْلْ صَيْدْ وُمْشْيْ!!

    لاَ حْجَاْلْ لَاْ زَرْزُوْرْ لاَ ْعْقَابْ بْسَمَاْ.

    وُبْالأَرْضْ .. مَاْ فيْ مْتْلَكْ بْيْفْهَمْ وَمَاْ.

    خْدْني حبيـبي .. ضايجِه مْن الْقَرْوَشِهِ.


    موال

    http://www.youtube.com/watch?v=6d4H0U-938I
    التعديل الأخير تم بواسطة سليمى السرايري; الساعة 29-09-2012, 19:11.
    لا تلمني لو صار جسدي فاكهة للفصول

    تعليق

    • سليمى السرايري
      مدير عام/رئيس ق.أدب وفنون
      • 08-01-2010
      • 13572
      #3

      بعتم السؤال



      بعتم السؤال ... سألت وينك يا حلو ...


      تركت الزمان بكاهلي ما أتقلو !!


      عالمصطبة ما في حدى ...


      والسلم المكسور.. قبل الحلم مهجور ...


      و ملقي عكتف السور !!


      وقباب من طين وحجر ...


      ومفرّعه القباب عم تنطـُر خَبَرْ


      والهمس ضيانعو فَتّرْ


      والإيد بتدقدق على بواب النوى ... وصابيعها تلوي الجوى


      والزرع مايج منتظر بَلّ وُندي ... والحور مَلّ من العلُوْ ...


      ناطر سؤالك يا حلو...!!


      اللااااااااااااااا ه ... يا أيلول ... قربِتْ جَيِّتَكْ !!!!!


      انـزف عَ قلبي الغيم ... فجِّر شبابيك الـْعـْتَقْ ... هَرِّب حبيبي بالورق !!!!!!


      وُتـْهِلّ بيـ ليلة قـَدْرْ ... نسيان هالغيبه ...!


      وُعَ جوانبي ... مِيِّة شروق...مْزَوِّدْ الهيبه.!


      _سميت بسم الله ... وخزاة العين !!!!!!!!!!


      طل الحلو مرتين ...



      مرَّة سرقني من العَدَمْ ..وُتمَزَّق التَّنين


      ومره بغرامو ... عوَّض النَّطـْرات ..


      _ عْرِق الـْجَبين



      وَضِعْتْ بالزنْدَيْن !!!!!!!!!!!!!!!!!!!!!!!



      http://www.youtube.com/watch?v=0uTQR...eature=related
      التعديل الأخير تم بواسطة سليمى السرايري; الساعة 29-09-2012, 18:58.
      لا تلمني لو صار جسدي فاكهة للفصول

      تعليق

      • سليمى السرايري
        مدير عام/رئيس ق.أدب وفنون
        • 08-01-2010
        • 13572
        #4
        إحكوا يا ناس



        جايي.. بْجْعْبْةِ الغـَيم..عَ ضْـفـَافْ المطر


        إلبس رذاذو ونَعنِشو..وإروي حبيبي اللـّي خـَطـَر


        ومَلـِّيْ السواقي قـَرْقـَرَة ..وفـَرْفِطـْ من خدودي زَهْرْ


        وجايي عبالي!!....


        ولك شو خبر؟!


        تقبرنِي وُسْبَقـْتْ القمر؟!


        يَللـّي عَ كتف الضّو: فيكْ العتم يحلـَو!!


        وإيدَكْ بـِ شـَعري ..تـْشـَرْبكو بْالجو


        ويضيع فينا اللـّو!!


        *** *** ***
        وغابات تعصر هَيْل..ويغار نجم سْهَيل!!

        ماس الحبق ع خصورنا يا ليل!!

        وزقزَقْ قميص النوم بالتأهيل

        والزنجبيل ينوِّس القنديل

        وكـْبـِرتْ..عا قـَدِّ الدِّني..وُكـْسَرْتْ المواويل

        وانكسرِتْ جرار اللـّـِهُن..دَلقِت حَكي وتأويل

        إحكوا يا ناس وُكـَتـِّروا..عم يُورِق التقبيل!!

        ساعة العيون مْنـَعنِسِه..والبوصلةِ بْتـْميلْ

        وساعة حَكي..وساعة عشق

        وساعة غرام تقيل!!

        وساعة نـْجنّ من الـلـُّقا

        نـْقلـُّو..يا ربّ تـْطِيلْ

        *** *** ***
        التعديل الأخير تم بواسطة سليمى السرايري; الساعة 29-09-2012, 16:32.
        لا تلمني لو صار جسدي فاكهة للفصول

        تعليق

        • سليمى السرايري
          مدير عام/رئيس ق.أدب وفنون
          • 08-01-2010
          • 13572
          #5

          بسْتَسْمحك
          تْخْمْيْنْ هَا لضّحْكِة.. إلَكْ خَبَّيْتْ .. والشَّمس بِقلبي إِلَكْ ضَوَّيْتْ.
          بتعرف يا قلبي لَوْ ضحكتي مُو مَعَكْ؟ بْيْنْشَف رَحْيْقي .. وُبرَحْيلَكْ بْقْشَعَكْ.
          بْتْحَتْوِك بْإيْدَيْك ْعَ شْفَافي .. وُبْبْعَتْ نَحْلْ قلبي .. يْغْلّ وُيْلْسَعَكْ.
          وُبْسْتَسْمحَك .. لَوْ يَوْمْ مَاْ شَعَّلْتْ .. صَابِيعي إِلَكْ.
          وُبْسْتَسْمحَكْ .. لَوْ يُوْمْ شَعْري خَاْنْ رَاْسيْ وُنَزَّلَكْ.
          وُبْسْتَسْمْحَكْ .. لَوْ غَابْةْ النَّانْرْجْ .. غَطِّت طلِّتك .. وُعْلَّقْتْ عَ بْوابْيْ .. صًبًاْح بْيْشْبَهَكْ
          وُلَوْ دَفْقِت خْيُوْطْ الشَّمْسْ عَاْ خَيْمْتْيْ .. وُشَاْفُوْكْ بْعْيُوْنِي مَعُنْ عَمْ إِغْزلَكْ.
          وُبْسْتَسْمحَك يَاْ رُوْحْ قَلْبيْ عَالْهَوَى .. اللِّي صَاْرْ فيّي طَيْفْ .. عَاْكْتْفْ النَّوَى.
          لَكْ صْرْتْ القضيَّة .. لْكْلّ عَاْشِق مْحْتْرْقْ.
          وُلْكْلّ طْفْلْ صْغْيْرْ عالدَّرْبْ انًهَوَى.
          رَحْ عَلِّم الْآهَاتْ .. إِنُّنْ يْكْبَرُوا .. وُيْصْيْحْ فيّي الشَّوْقْ .. مَاْ بَدِّي دَوَىْ
          بَرْكِيْ الْغَرَامْ يْحْنّ .. وُشْيْ مَيْلْة وَفَاْ .. تْسْكُنْ بنَبْضي وُفْيْكْ بَطِّل إنكوى
          وُقْلَّكْ أَمَانِه عْلَيْكْ .. مَا تْقُوْلْ لْحَدَاْ .. وُتْقُوْلْ مَا عْلَيْكي .. وُخْجْلتي تْلحَدَاْ.
          وُتْسْرُقْ تَلْجْ كَانُوْنْ مْنْ زْنْديْ .. يْطُوفْ النَّبْيْذْ .. وُتْسْكَرْ النَّهْدِه.
          وُقَلّكْ: دَخْيْلَكْ خَايْفِة مْن النَّاسْ .. هَالصَّايْرَة وُسْوَاسْ لَلْأَجْرَاسْ.
          وُأهرَبْ أَنَا وُالْحُبْ يَغْمْزني .. نْعْدّ السّنين وُنحسُبْن أعْرَاسْ.
          وُتَحْكي الصَّبَايَاْ .. قْصّةْ النَّانْرْجْ .. وُتْغَارْ مْنْ بْسْتَانْ عَاْ قَدِّي.
          وُلَوْنْ الشَّقَايِقْ يَعْبُرْ بخدِّيْ.
          شُوْ بَعْمِلْ إنْ كَانْ الْعْمْرْ طَاحُوْنْ؟!
          وإنْ مَاْ قْدْرْنَا .. عَا قَدَرْنَا نْمُوْنْ !!
          تتمة: قصيدة (بستسمحك)
          يَاْ رَيْتْ فْيِّيْ إسكُنْ بْعَيْنَيْكْ .. وُبْكْلْ نَظْرَهْ .. يْطَمِّنوني عْلَيْكْ
          وُدَقْدَقْ عَ شْبَّاكَكْ مَطَرْ مَجْنُوْنْ .. وُطْيُوْرْ.. عَمْ تْرْحَلْ .. شِي مْيِّة لَوْن.
          وُإيْدي عَ إيدَك .. نْفْتَحْ الشِّبَّاكْ.
          شُوْ تَبَّعُوْ.. الْغْبَارْ ..والتّنبَاكْ.
          وُتْجْنّ فيّي............. وُيْغْتْرْبْ صَدِّي.
          وِإن قْلْتْ: مَاْ بدِّي............ أَلْفْ بّدِّي !!!!!!!!!!!!!!!!!!!!!!!!!




          http://www.youtube.com/watch?v=zaVvY...eature=related
          التعديل الأخير تم بواسطة سليمى السرايري; الساعة 29-09-2012, 19:13.
          لا تلمني لو صار جسدي فاكهة للفصول

          تعليق

          • سليمى السرايري
            مدير عام/رئيس ق.أدب وفنون
            • 08-01-2010
            • 13572
            #6
            نـَقـْوَشْني عالحيطان
            قـَلـِّي :قعدي بَكـِّير..شو اللي مْعَجَّلِكْ؟
            قلبي اللي كان الزير..من ظلمِكْ هْلِكْ !
            قـَلـِّي : غريبة طوارِكْ..وُ ما بـْـتـتعَبي
            شو يعني لو قلتي بْغرامي مْعَذ َّبِةِ ؟!
            شو يعني لو بَرْقِتْ سماكي بْ هالمسا ؟!
            وصار الفـْطر يلبس طواقي مْجَذ َّبةِ
            وصارالكمي يقبقب على تراب اللـِّنـَا
            وتعود ترجع بَسمِتِكْ المْغـَرِّبة
            قلي : قعدي
            شو عليه لو داخ الزمن ..بركي السِّكِر يغوي القطا الـْمْسَرِّبِةِ !
            وُيْلـِفّ هالدوري على زنودِك سْرِبْ
            وُتـْفـَرْفِح الشجرات ..تبقى مْشـَعـِّبـِةِ
            قـَلـِّي : قعدي !..بَكـِّير ..
            ما فلّ الندي
            _هي دَعْسِتِكْ عالموج..نـَصْبـِتْ ..مَوقـَدةِ
            هي لـَمْسِتِكْ عالورد ..حَطـِّتْ مَيسِما
            وهي خطوتـِكْ بالريح..عَلـِّتْ مَسْنـَدي
            قـَلـِّي: قعدي.. بكير
            قـْلـْتْ: تـْكاتـَرِتْ ..فيِّي الطراوةِ ..والقساوةِ مْشَرَّدِةِ
            _ومن غير وعي تـْرامَيتْ عَ زنودو عْمْرْ
            رَجَّعني عَ مْطارح ..شمسها مْبَدَّدِةِ !
            _وصار الفجر يدوي بِقلبي سنين
            والوقت يـِقـْسِمْني قـُبَلْ مْتـْعَدِّ د ِةِ
            ونقوشني عالحيطان..لوَّنـْتْ الدَّهر
            ش ِ زْمْرُّد ..وُشِي..طيور جايي مْغـَرِّدةِ
            _وقـْعَدْتْ عالمريخ ..اتـْفـَقـَّدْ مَرِجْ
            مْتـْسَوسَحْ بْفستان..طارْ وُما هِدِي
            وُصار المَدَى يـِصْفـُقْ إدَيه وُيـِلطمُن !
            _وبيَومْهَا التـَّبـَّانْ غـَيَّرْ مَعْبَرُو
            وبْيَومْهَا الأمطار قالتلي :خـْدِي
            وُمن يَوْمْهَا النجمات..طـَشْقـُوا بالسما
            تـَيْقـَلـِّدوني
            وُعَلـِّمُنْ الـْغـْنـَاجْ !
            شو قـَوْلـْكـُنْ ؟!
            بْسْمَحْلـْهُن ؟!
            مْتـْرَ دِّ د ِةِ ! !!!!!!!
            لا تلمني لو صار جسدي فاكهة للفصول

            تعليق

            • سليمى السرايري
              مدير عام/رئيس ق.أدب وفنون
              • 08-01-2010
              • 13572
              #7
              إنت وأنا

              إنتْ وأنا ... قْدّاس عبواب العشق ... إنت وأنا بالدَّير نغفر للخطأ ...
              إنت وأنا ... تاجين عم يتمرجحوا .. عم يسألوا الزوار عن دعوه ...
              تْسْرُقْ صَلَاْ ... وُ تنامْ بالعَلْوِه ... وُتمسُكْ بإيدي ... وتلعب الهفوِه ...
              ونغيب شِيْ سِنتَين ... شيْ تنعشَرْ سِنِه ... ما يطولنا وُلا شَيْخْ
              من أَيَا دِني ...
              والزيت يهرُبْ مِنْ كَنيستنا ... والكايني.. تغزُل مَحَبِّتنا غِنِي........
              وهونيك عالغيمات تحكيلي قِصَصْ .. عَنْ عَنْتَرْ وعبله وُغَرَامُنْ شُوْ هَنِي
              ويغفى الربيع بْ دارنا ... ويتحوّل الدبور ... ينسى جرارنا
              وإحتار من وين العَسَلْ بديارنا ؟؟؟!!!
              وُتْعجّ شجرة توت بخيوط الحرير ... وُتْحيِّكْ بإيدْيكْ فستان الهوى
              إكْبَرْ أَنَا ... ويصير فستاني قصير...!!!!!!!!!!!!!!!!!!
              وإتمايل بنغمات جايي من الْفرح
              والورد يهمُسْ للسواقي ... وُينفضح
              والأرض تكبر بالولع وتصير ... طاحونة الكذبة العتيقة وتستَجير
              والحب يمسك بيجدايلها ... ويـِسْكـَر على سطيحاتها بشفِّة عصير
              والشمس تضحك عالقمر ... وتنـزِّلو
              يتكمِّل بإيدو الأرض تعمير
              ونتغازل ونرتاح عالحيطان
              ويطق قلبُن غيظ العصافير !!!!!!!!!!!!!!!!!!!!!!!!!!!!!!!!!!
              لا تلمني لو صار جسدي فاكهة للفصول

              تعليق

              • سليمى السرايري
                مدير عام/رئيس ق.أدب وفنون
                • 08-01-2010
                • 13572
                #8
                طالِتْ الوَقفة
                قلبي المْقـَلـْقـَز ساكن الشبَّاك..وُتـْلـْتـَين رْجْلو ..سابقة الحَفـِّةِ..كل ما بْعْدِتْ ..بالشوق يْستنـَّاك ْ..وبتعرفو مُو واقف بْصَفـِّي..
                حَدَّك وُقِف ..والبحر قـَدّ عْداك !ْ..والريح تبعدني عن الضفـِّةِ..مرة الشمس تعرف معي مَسراك..ومرة القمر يـِستهتر بْضَعفي..
                وُقـْرَّاص من تموز.. والأشواك..يـِتغلغلوا بْجسمي الـْبْقي مْطـْفي..
                بيعَرِّشوا بْسامير عالمِدْماك..تـْخَزِّق سطوحي..وتجرح الإلـْفةِ
                وُولفي اللـّي طالع عالسما خَلاك..مْقـَدْقـَدْ يا قلبي..وُعاشق الرَّجْفةِ
                يا ريتني إبقى لـَقـَلبو شباك..بركي الغرام يْلـَحْلِحُو نـْتـْفةِ
                يا عيد : يا راكض .. عيوني فـْداك ..خدني لـَعنـْدَك طالت الوَقـْفةِ
                جايي حبيبي مْكـَتـِّر التنباك ..وعرقاتنا خـْلـْصُوا ما في شـَفـِّةِ
                شو سَكـَّرُو هالماجـِن السَّفـَّاك ؟! ..مْدَوْدَخ مْتل ..برداية الغرفةِ
                شايل عَ كِتفو ..مَوقـَد ومْحراك..شـَدِّلي إيدي..وُضـَمِّني بْخفـِّةِ
                قلت بْغـَباوة ِ: ( بْطـَّلِتْ إهواك )..ومن غـير قصد ازْرَقـِّتْ الشِّفـِّةِ
                _وَيْلي ..وُيا دْلـِّي..يا وَلـَدْ شوباك ؟!
                هَلـَّقْ بيقولوا الناس مْنـْحْرْفِةِ !!
                قلي : كذبي....قولي ما بَدِّيَّاك ....وسْبِّي عليِّي سْباب مْخـْتـلفِةِ
                وُبْحجاركـُن صبِّي عليِّي عْراك ....قولي: حَرامي وُعَنـِّنـَا مْنـْفي
                ويحاربوكي كل هالنـِّسَّاك....وتبقي إلي..متل الوَقـْف والضـَّو
                وُتـْصِحْ زعـْرَنـْتي على الصِّدْفـِةِ.
                لا تلمني لو صار جسدي فاكهة للفصول

                تعليق

                • أبوقصي الشافعي
                  رئيس ملتقى الخاطرة
                  • 13-06-2011
                  • 34905
                  #9
                  الله الله
                  كلمات رائعة و احساس رفيع
                  سنضمن المتعة
                  تقديري



                  كم روضت لوعدها الربما
                  كلما شروقٌ بخدها ارتمى
                  كم أحلت المساء لكحلها
                  و أقمت بشامتها للبين مأتما
                  كم كفرت بفجرٍ لا يستهلها
                  و تقاسمنا سوياً ذات العمى


                  https://www.facebook.com/mrmfq

                  تعليق

                  • محمد نجيب بلحاج حسين
                    مدير عام
                    • 09-10-2008
                    • 619
                    #10
                    استمتعت الليلة باكتشاف روعة المحكي السوري

                    شكرا سليمى لهذه السهرة الرائعة

                    ولهذا الجهد الذي تبذلينه لإمتاعنا

                    وشكرا شاعرتنا المبدعة فردوس

                    صوتك من الفردوس

                    شعرك من الفردوس

                    يارب تلاقي درجة الفردوس يافردوس

                    تحياتي العطرة
                    [align=center]محمد نجيب بلحاج حسين
                    الميدة - تونس[/align]

                    تعليق

                    • فردوس النجار
                      أديب وكاتب
                      • 26-09-2012
                      • 5
                      #11
                      يسعد صباحك أستاذ قصي ..شكرا جزيلاً للمرور..دمت لنا جميلاً

                      تعليق

                      • فردوس النجار
                        أديب وكاتب
                        • 26-09-2012
                        • 5
                        #12
                        الأستاذة الشاعرة المتألقة الجميلة سليمى السرايري..مع كل الحب أشكرك جزيل الشكر على هذا الدأب المتميز..أشكر جهودك الغالية ..وأرجو أن أكون عند حسن ظنك بي..
                        أسعدتموني بهذه الأمسية اللطيفة..سعدت بكم ومعكم جميعا بهاماتكم السامقة..ورغم أن الأمسية فصلت على عجالة ..إلا أنها كانت ناضجة ممتعة جملة وتفصيلا..فأشكرك وأشكر الأخت الراقية سحر التي زفتني إلى أهلٍ وأحبةٍ جدد..فلكم تحياتي

                        تعليق

                        • فردوس النجار
                          أديب وكاتب
                          • 26-09-2012
                          • 5
                          #13
                          الأستاذ الأديب محمد نجيب بلحاج حسين..ما أسعدني بهذا المرور الجميل ..دمت ودام ذوقك الرفيع..تحياتي

                          تعليق

                          • سليمى السرايري
                            مدير عام/رئيس ق.أدب وفنون
                            • 08-01-2010
                            • 13572
                            #14
                            شاعرة كبيرة ورائعة ومهذبة
                            فردوس النجار
                            كانت سهرة من أجمل السهرات الناجحة التي سجلتها الغرفة الصوتية
                            -
                            نتمنى عودتك إلى هذا الصرح الأدبي ملتقى الأدباء والمبدعين العرب صديقتي العزيزة
                            لا تلمني لو صار جسدي فاكهة للفصول

                            تعليق

                            السابق template التالي

                            ما الذي يحدث

                            تقليص

                            الأعضاء المتواجدون الآن 120074. الأعضاء 7 والزوار 120067.

                            أكبر تواجد بالمنتدى كان 409,257, 10-12-2024 الساعة 06:12.

                            يعمل...
                            X