تويت
( عيارين في الهوا)
للشاعر المصرى عبيد طربوش
الديب عوى
والصوت كما الرعد انفجر
صم الودان
سقطت جلود الفلاحين
وسط الغيطان
الصوت قلع
من جوه جوفهم سلمهم
بعد المخاض .. عادوا الولاد
من تانى لارحام امهم
صحيوا الرجال
على شمس مفضوحه
على دراعات النخيل
عريانه مدبوحه
دم البكاره سال
ع البلح حمّر
هم الجبان يقطفه
وللكمام شمّر
قام اتوصم بالعار
فى الجيّه و الروحه
آه ياوطن
لوبُحت لك بوحه
لتنضف ارضك
م الهالوك والحلف
وتدوس على اللى
رجعوك للخلف
تركوا الحيطان للريح
بعد اما هدوا السقف
كف الرياح لطّشت
خد الحيطان تلطيش
من بعد ما بدّلت نخلك
يا وطن بالهيش
الديب عوى
سقطت رايات الجيش
هرب اللى قال لك فى يوم
اموت وانت تعيش
اه يا بلدنا
ان كنت صينانى
لاقطع لسان الشيطان
إن زن فى ودانى
وأعُض قلب الديب
يابلدى بسنانى
اه يا بلدنا
ان كنت صينانى
تعليق