تويت
بمية دموع مالحة
ودقيق مسرطن بالهموم
وخميرة نكد
عجنتنى أيامى
فى طشت الزمن
***
وفى إيد القدر قوه
طبتها ترن فى ضلوعى
بكل قوتها و قسوتها
تصحى الألم جوايا
فى سراديب الزمن
***
تقطع منى بالحتة
على فرشها ترصنى
تبطنى بضمة صوابعها
ترحنى بقوة دراعتها
على مطرحة الزمن
***
فى لهيب الفرن تنترنى
من كتر خوفها
عن ناره تبعد ما تبعدنى
من كتر نارى
جه الفرن يسوينى استوى
بحرارة الزمن
أيه ننتظر من ميه مالحة
ودقيق مسرطن بالهموم
وخميرة نكد
غير ملامح ملخبطة كالحة
وأطراف مكرمشة شالحة
فى رغيف الزمن
****
تعليق