رسالة من طفل عربى في بطن أمه

أنا طفل رافض يتولد
أو بالأصح ...أنا طفل خايف لو نزلت...!!
أتجلد !!
وأنا لسه جوا في بطن أمي... الظلم بينكم ذلني
صوت المدافع والقنابل والرصاص بيهزنى
صوت الضحايا هدني
دا الدم غرّق حلمكم
والهم سارح وسطكم
والجهل حاكم أمركم
والخوف بيكتم في النفوس الحرة .. موت شعبكم
بس الكلام.. ما بقاش بيملى ودنكم
ولا عاد يداوى جرحكم
*****
ليه أتولد !! .. هيقولوا أيه !!
مولود ونازل ينتفض ..!!
من خوفه خايف يترفض..!!
مين في العروبة يدلني ؟؟
مين راح يشيلني ف وسط حطنه يضمني ؟؟
مين راح يوفر لي الأمان ويحبني ؟؟
*****
ليه أتولد؟؟
إخواني باعوا أرضهم
وأبويا طلق أمهم
وعمامى سابوا مجدهم
هنزل لمين ؟؟ وأقول يامين .. ؟؟
أو مين هيسمع صرختى
دا الكل شايف بلوتى
بس ال خايف .. وال تايه ..
وال عايش في الضلال
ما بقاش ف أرض المسلمين
دا شيئ حرام .. أو شيئ حلال
*****
ليه أتولد؟؟
صوت القنابل في الصومال؟
والدم سايح في الحواري والميدان
والظلم في اليمن الحبيسة ...
وقهر غزة ...والجولان
والقهر مالى أرضنا..
والكل غارق ف الهوان
من شرق دولتنا الكبيرة لغربها...
ومن الشمال ... حتى السودان
*****
ليه أتولد؟؟
واذهب برجلى للهوان
خلينى ساكن بطنها
يمكن يعود تانى الزمن.. يضحك لها
وساعتها غصبن عنها هنزل للبلد
و أدوس على كل القبور
وأدوس على راس الفجور
وأدوس على حكم الجهالى المغرورين
وامسح دموع المقهورين
وأخد بايد المظلومين
*****
أنا هتولد ... وأنزل لكم..
شايل على كتفى الأمل
شايل وحملى ما يتحمل
أنا جاى وعمري ف بطن أمي ألف عام
راجع من الزمن ال كان ...
زمن العروبة والرجولة والتدين والسلام
هاخد بلادى للامام
هزرع لكم..
أشجار وئام
وأبني لكم..
على كل حته في أرضكم
أبراج حمام
واقلع جدور كل اللئام
راح اشتغل
مش كل وقتى ف الكلام
أنا ابن أصل وأصل أصلى .. ناس كرام
وعشان بلادنا تتبنى
مش راح ننام
*****
أنا جيت لكم
علشان نرجع مجدنا
ونحرر الأرض الحبيسة... أرضنا
ونطهر القدس الشريفة.. قدسنا
ونعلم الإنسان ونبنى نفسنا
ونطهر الأرض النظيفة م الفساد
ونسود على كل العباد
*****

جمال نصير في 22/10/2012