تويت
مابين وبين...
مقسومة روحي ف سكتين
سكة اتخلقت لقيتني فيها مرغمة
والتانية سكة حلم
واخترته أنا
وعشان ما طير القلب عاشق للغُنا
قررت اغيّر سكة الليل بالنهار
قررت أقبل بالحصار
وافتح ببان الحصن للحلم الوليد
أفرد جناح العمر فوق خد السحاب
وارسم لقلبي طريق جديد
قررت اعيد
لحظة ميلادي واتولد
على كف إيده الطيبة
قلبي اللي عطشان طبطبة
إرتاح معاه
سلمته مفتاح الغرام
سلمني مفتاح الحياه
وحلفنا نرسم احلى كون على قدنا
ونلف طول العمر فيه
ولا لحظة نوصل منتهاه
كل القصص ف الحب تيجي لحدنا
تقف انتباه
قررت اكون
ضله اللي ماشي ف كل حتة يحرسه
قررت لما الليل يكون
أبقاله نجمه تونسه
مش زي كل الخلق بتنفس هوا
أنا حسه بيه جوا الوريد
وبعيش عشان... أتنفسه
مجنون هواه..
وانا قلبي مش ضد الجنون
مطرح ماهو يكون
أكون
نكسر جدار الأمكنة والأزمنة
ونعدي فوق بحر الظنون
نوصل لمرسى مالوش عيون
نضحك ونبدر ضحكنا فوق الطريق
يطرح سنابل حب للناس اجمعين
قررت اكون بره البينين
أنا قلبي حدد سكته
والدق صوته ترنيمات
والاوردة
دراويش على باب الهوى مستنين
مع كل دقة حب تطلع للفضا
الأوردة....
بتقول أمين
تعليق