الوليد المنتظر
البعض فعلا انتحر
والبعض واقف منتظر
والبعض شايل فوق دماغه...
الف هم بينتفض
والبعض عايز لو يعبر عن شعوره...
بس خايف يترفض
لكنهم... سوا كلهم
مستنيين... لحظة ولادة مؤلمة ...
&&&&
والمشكلة...
اول ولادة لامنا
والحمل طوّل كام سنة
عشرات.... مئات...
والام شابت... دبلت
وجنينها خايف يتولد
بيمد رجل ... يشد ايد
ولسان وصوت مقطوع بيقطع ...
في الحديد
مستنى شمعة ف دنيا ضلمة
لو تقيد!!
واحنا هنا متشوقين
نغسل همومنا بفرحنا
مستنيين...
لحظة ولادة فاصلة ...
&&&&
لكنها..
لحظات سعيدة بأي حال
حتى ولو... كانت سراب
حتى ولو..... مرسومة بالدم ال سايل ع التراب
..... رسموها بالنار والعذاب
حتى ولو .... محروقة بالنار ال والعه ف كل دار
.... مغموسة بالهم فى قلوبنا وبالمرار
لحظة ترقب انتظار
مولود هييجى للحياة
هيرجع المجد ال ضاع
ويحرر الناس الجياع
ويطهر الارض البريئة من النجاسة والخيانة
....والرعاع
&&&&
يا مسلمين.. أو يا عرب .. يا كل أجناس البشر
اليوم خلاص الحق اصبح يوم جديد
بانت علامات الولادة وكلنا...
هنعيش ف عيد
وهيتولد على أرضنا
اجمل وليد
دا ف تونس الخضرا يادوب... بانت ايديه
وف حضن مصر الطيبة.. بان ركبتيه
وف ليبيا رجله بتكتمل
اما اليمن
فالضهر بادى يتعدل
يا هلترى ...
الراس ولادتها منين؟؟
وهننتظر كام يوم؟؟؟ يومين!!
يمكن سنة ... يمكن سنين..
ويشرف الامل السعيد
ومعاه هننسى سنين ضباب
كام عمر عدى وكان خراب
واحنا ال كنا بنتحرق
كنا السبايا والعبيد
****
وبقية الاخوة ال تايهه ف الضياع
حاسين بدايات الصداع
حاسين بدوخه او بسدة نفس ..
حاسيين بالصراع
لكنهم متكتفين
والعز تقّل بطنهم
جفف ضميرهم .. عقلهم
لكنهم... مستنيين
ييجى الصغير ويشلوه
ويلفوا بيه القعده وسط المهرجان
وهيعملوا قعدة شوا ...
هيصة وزيطة ف الهوا ...
حفله تليق..
سلطان ... امير..
مخلوق فريد
****
يا ربنا
انت ال حاسس بينا وحدك... دلنا
حكامنا سابونا فى ضلمة
وانت شايف ضعفنا
وخدونا وسط الزحمة ناكل بعضنا
يسر ولادة امنا
يارب حقق حلمنا
واكتب شهادة للوليد....
انشلى حتى بدمنا
والاسم....
.....حق يضمنا...
.....حرية تجمع شملنا....
.....وعدالة تصنع مجدنا
&&&&
جمال نصير فى
22/2/2011