بتحاكموا مين
بتحاسبوا ليه؟
وتحاكموا مين؟
دا الذنب اكبر م الحساب
والحكم – مهما يكون – فاصغر م العقاب
فتحاسبوا ليه
وتحاكموا مين
*****
بتحاسبوا مين؟؟
المسجونين؟
دول محظوظين
من بين جميع المجرمين ...
متكرمين
عايشين حياة ... حرة كريمة ....منعمين
ف (لومان طرة ) متنزهين
بتحاسبوا مين؟؟
الهربانين؟؟
دول مطلوقين
وإحنا ال مسروق دمنا ....
المسجونين ...
*****
ان كان على المخلوع... سبوه
ايه راح يفيد لو تشنقوه
خليه يحاسبه ربنا
من غير محاكمة تبرؤه
ويكرموه
قبليه عملها طغاه كتير
ساروا على نفس الطريق
نيرون عملها وقام مولع ف البلاد
مليون حريق
نمرودنا طيب.. بس احنا الشعب
سافل... او بذيئ..!!!
*****
بتحاسبوا ايه؟
الشعب مش ناقص مسارح تتنصب
الشعب مش ناقص روايات تتكتب
الشعب مش عايز يادوب ... الا الرغيف
عايز يعيش ..
عايز كرامة وناس شريفة تحكمه
ورئيس عفيف
*****
دا الذنب اكبر م الحساب
مين ال باع دم الشباب
مين ال عرى حرمته ..وسط الميدان
مين ال ساحب جثته .. جنب القمامة للهوان
مين ال عاش تلاتين سنة ..
وإحنا معاه وسط السراب
مين ال رجعنا لورا
مين ال وصلنا لطريق مسدود ...
وسابنا لوحدنا
مين ال حبط عزمنا
مين ال ضيع حقنا
فتحاسبوا ايه...؟ وتحاسبوا ليه...؟
*****
مين راح يقـّدر كل دا
ويتمن الخطأ الجثيم فى شعبنا
دا الذنب عمره ما يتنسى
والشر عمره ما يتحكى
مش راح يفرحنا العقاب
ولا راح ينسينا العذاب
لكننا ...
حطين أملنا ف ال جاى
حطين أملنا ف التاريخ يحكى الحكاية كلها
مين ال باع دينه وبلدة وشعبها
انسوا الحساب ... ميهمناش
حتى العقاب – مهما يكون - ميكفناش
*****

جمال نصير فى 28/1/2012