سهرة ملتقى الشعر العامي يوم السبت الموافق 8 ديسمبر

تقليص
X
تقليص
 
  • الصفحة لـ 1
  • تصفية - فلترة
  • الوقت
  • عرض
إلغاء تحديد الكل
مشاركات جديدة
السابق template التالي
  • سامية عبد الرحيم
    أديب وكاتب
    • 10-12-2011
    • 846
    #1

    سهرة ملتقى الشعر العامي يوم السبت الموافق 8 ديسمبر

    النصوص التي سيقوم الشعراء بالقائها في الغرفة الصوتية يوم السبت الموافق 8 ديسمبر
    ونرجو من الشعراء أصحاب النصوص الحضور والمشاركة معنا ليقوم بالإلقاء

    النص الأول بعنوان (     الحلزونة ) بقلم الأستاذ / سامح المصري
    إسمع منى سيادة الريس
    وإوعى تقول مجنون بيهيس
    ولا يعرف مين الإخوان
    ولا يعرف خطتنا كويس
    قلت زمان فى قصيدة قديمة
    أنا ولا سلفى ولا ليبرالى
    أنا حلم إتولد لعيالى
    بحلم يشوفوا الدهب
    طالع لهم م الطين
    وأتمنى ليهم وطن
    فوق الجميع ... عاااالى
    بس بزود كلمة جديدة
    إنى كمان مش م الإخوان
    ولا من حزب فلان وفلان
    أنا مصرى ياسيادة الريس
    بعبد ربى بكل يقين
    وبحب بلدنا ياريسنا
    زى الزرعة ماعاوزة الطين
    أد الأم ماترعى ولادها
    أكتر من تصنيع الصين
    عارف الصين ياسيادة الريس
    هوصفها لك
    وإنت فى غزة تلقى الصين تانى يمين
    ولما هترجع تحكم مصر
    تلقى هناك البنى آدمين
    لما الشعب دة ثار فى الحق
    قال للظالم دايما لأ
    نفسى فى يوم تعرف إن إحنا
    مش شخشيخة شمال ويمين
    تسمع عن حتة إسمها سينا
    أرض العزة إللى فى أراضينا
    إوعى تفرط يوم ف ترابها
    ولا تكون ناوى على خرابها
    دة اللى ف سينا دول أهالينا
    وحد يلا العزم يامصرى
    كفاية الفرقة اللى ف أراضينا
    يلا يا ريس إصحى وقوم
    شبعنا خطب ووعود بالكوم
    ومهما هيحصل مصر كبيرة
    ولينا مصير هيكون محتوم
    مــن دمــوعــي تــرتــوي الذكريــات
    مــن أنينــي ينحنــي جــذع الأهــات
    لا تسلْني هل مضى العمر استــراق
    إنــنــــي حــلـــمٌ بــــــلا مــــــأوى وزاد
    الكلمات الدلالية (Tags): لا يوجد
  • سامية عبد الرحيم
    أديب وكاتب
    • 10-12-2011
    • 846
    #2
    العزة وأهل غزة للشاعر المصري / رشاد هويدي ( شاعر الوادي )


    العزة وأهل غزة
    ***********
    الشاعر المصري / رشـاد هويدي
    شـاعر الـوادي
    ************************

    إحنا نبقى ازاي أعــــــزة
    يعملوا لنا الناس حساب؟!
    واحنا إخوانّا في غـــــزة
    ينهشــــوهم الكـــــلاب
    هي فيـــن بس الكرامة
    ليه نعيش مستضعفين ؟!
    نرضى ليـه ذل ومهانـــة
    ليه نطاطي الجبين ؟!
    يبقى أشــرف وبأمانة
    لو نكون تحت التراب
    إحنا نبقى ازاي أعزة
    يعملوا لنا الناس حساب؟!
    واحنا إخوانّا في غـــزة
    ينهشــوهم الكــــــــــلاب
    إحنا لمّا ننسى ديننـــا
    ننتهي خـــالص نضيع
    والضعيف دايما يهينّـا
    يشتري فينــا ويبيــع
    راح نطاطي غصب عنّـا
    واحنا كنا في السحاب
    إحنا نبقى ازاي أعزة
    يعملوا لنا الناس حساب؟!
    واحنا إخوانّا في غــــزة
    ينهشــوهم الكـــــــــلاب
    العرب عايشيـن في لــــذة
    والفلسطيني فـي هـوان
    النهـــاردة أهـــــــل غـزة
    بكرة مصر والســودان
    يعني لازم ألـــف هــــزة
    تمحي عن عيننا الضباب؟!
    إحنا نبقى ازاي أعزة
    يعملوا لنا الناس حساب؟!
    واحنا إخوانّا في غــزة
    ينهشــوهم الكــــــلاب
    يعمــل الأعــداء حدود
    بيننـــا لاجــــل يبعدونا
    واحنا بالأرواح نجود
    لمّا حد يعـــــادي أخونا
    نفتكــر مجـــد الجدود
    نفتكــر روح الصحــــاب
    إحنا نبقى ازاي أعــزة
    يعملوا لنا الناس حساب؟!
    واحنا إخوانّــا في غزة
    ينهشـــوهم الكـــــــلاب
    لــو سلاحنــا اللــه أكبر
    ربنــا هيكــــون نصيـــر
    نمحي أحفـــاد أهل خيبر
    أو قريظــــة والنضير
    واللي عـــامل إنه أكبر
    بكره مجده يكون سراب
    لمـــا ننصر أهــل غزة
    يرجع المجــد اللي غاب
    وقتهــا هنكــون أعـــزة
    يعملوا لنا الناس حساب
    ******************
    رشاد هويدي
    شاعر الوادي
    مــن دمــوعــي تــرتــوي الذكريــات
    مــن أنينــي ينحنــي جــذع الأهــات
    لا تسلْني هل مضى العمر استــراق
    إنــنــــي حــلـــمٌ بــــــلا مــــــأوى وزاد

    تعليق

    • سامية عبد الرحيم
      أديب وكاتب
      • 10-12-2011
      • 846
      #3
      بين القضبان نايم ابني
      للرائعة ( مها ضرار )
      بين القضبان نايم ابني
      أشلاء و دماء ممدود جسده
      مفروشة علي الرمل المخضوب
      أوجاع بلده
      منزوعه الدمعه علي خدوده
      ملحقش يبوح بألم و بكاء
      مع إن الداء
      موجود في حدود بين القضبان
      و الصرخة بتدوي يا رب نفوق
      يا رب نفوق و نشوف الداء
      قبل ما يسفحنا و نبقي وباء
      و نعيد و نقول
      و نقول و نعيد
      يمكن نتعلم حرف هجاء
      أو نقرا ما بين خطين قضبان
      بين القضبان نايم ابني

      حلمه المرسوم فوق الكراس
      محروق بالنار
      أمله العطشان بأمان بكره
      دخان و دمار
      حقه المشنوق بإيدين الناس
      موصوم بالعار
      و شهادته شهيد
      في الجنه يعيش بين الأبرار
      عشان في الدنيا مالوش عنوان
      راح ويا اخواته من الثوار
      بين القضبان نايم ابني

      و في غمضة عين في عذاب سابني
      ساب أوضته و ريشته و كراسته
      بعتر الوانه و بقع أكمام مريلته
      ساب كل حناني و غلاوته
      يتشاقي و عمري ما زعلته
      و ينام و البوسه علي خده
      بس المره دي سابني و نام
      من غير ما يقول هوه حكايته
      بين القضبان نايم أبني

      و القطر الملعون
      شايل أشلاء من جسده
      متغير لونه من دمـّه
      و بيجري في سباق الموت
      و ابني المفزوع عــمـّـال يصرخ
      يصرخ و القطر و لا هــمّــه
      و الشنطه في كتفه بتتمرجح
      بدراع مبتور
      و كتابه الأبيض بقي أحمر
      و مفهش سطور
      و جبينه الضي بيتعكر
      برمال الأرض
      و عيونه الضحكة الفرحانة
      فجأة بتتخض
      و قضاه انقض و نام مهدود
      م الخوف الفرض
      وإتنفشت في الريح أوراقه
      و ارتاح داؤه بين القضبان
      بين القضبان نايم ابني

      مقدرتش أجيبلك شيء تاني
      يحميك م القطر
      كان نفسي أغير أوطاني
      و متشوفش القهر
      كان نفسي أغير عنواني
      و تشوف الفجر
      كان نفسي أجيبلك شيء تانى
      يشيل الأوجاع
      شيء زي ضمير الناس الحي
      مش زي ضمير مسؤل الحي
      أو أجيبلك فرحة بتتضفر بهدوم العيد
      أو حــُكم بيتنفذ عالناس أسياد و عبيد
      أو أجيبلك مثلاً عيش من أرضك
      مش بالِدين
      و أزرعلك من نيلك فدادين
      و أحميك بالعلم من العاديين
      و أعرق و أبني لك أمجادك
      و أحمي ولادك
      و أشيل الحقد من الحاقدين
      كان نفسي أجيبلك حد يقولد
      عايزين نبني
      كان نفسي أشوف بس يا ابني
      حدّ يفكر في الإنسان
      مهموم بهموم الأوطان
      مش همّ الطرحة و الدقن
      مش حدّ بيتكلم أكتر
      و لا بيفكر
      غير في الجمهور و الإذعان
      بين القضبان نايم ابني
      مــن دمــوعــي تــرتــوي الذكريــات
      مــن أنينــي ينحنــي جــذع الأهــات
      لا تسلْني هل مضى العمر استــراق
      إنــنــــي حــلـــمٌ بــــــلا مــــــأوى وزاد

      تعليق

      • سامية عبد الرحيم
        أديب وكاتب
        • 10-12-2011
        • 846
        #4
        ولا كلمه
        ( قصيدة بالعامية المصرية ) للأستاذ /         حمادة الشاعر
        =================
        ولا كلمه
        ولا هقبلْ أكونْ كلمهْ
        كما الطَّلقهْ
        يا إمَّا تْصيب
        يا إمَّا تطْيش !!
        ولا نيش تارْ
        ما بين قادةْ مدينةْ نارْ
        تأجِّجها متى شاءتْ
        ألا شَاهَتْ !!
        وشوشْ حيَّاتْ .. بتِتْلونْ
        وعمري ـ يا هو ـ ما هتْعنونْ
        انا مصري
        وحافظ لي الزمان قدري
        وأصل المُبْتدَى .. مصري
        وعَدَّى عْلي يامَا قْرون
        وأفْكارْ يااااااااه !!
        جنونْ وفنونْ
        ودابتْ جوَّا أوْصالي
        مـ انا مصري
        وحافظ لي الزمان قدري
        ولا إعلامْ يضَلِّلْني
        ولا أحْزابْ تثبِّتْني
        كإني كلبْ مِتْسلَّطْ ؟؟ !
        ومن جهلي رح اتورَّطْ ؟؟!
        فيطلع من حشايا التور ؟؟
        ولابِسْ إيه ؟ كمااااان طرْطورْ ؟؟ !!
        وناطحْ مين ؟؟؟ متفهمشي !!
        وخانقْ حتَّى طِيرْ وِشِّي ؟؟!
        يا إعلام نارْ .. مـَ تِحْلمشي
        يا حزْبِ فلولْ .. مَتقدرشي
        أنا مصري
        وحافظ لي الزمان قدري
        وغيَّرْ حتى فـْ شوشك
        وإلْبس تُوب مـ هوش توبك
        وغيَّرْ حتى في صُوتكْ
        أنا عارفكْ .. أنا شايفكْ
        ميخفى عْلي يوم شكلكْ
        ولا رسمكْ ، ولا فنَّكْ
        أنا مَسْكَكْ
        ومِنْ جهلك تقول : سَيْبكْ !!
        بحجِّمْ فيكْ .. وما في شك
        وبنْتِفْ كلْ يوم ريشك
        وهَتْسلم ...
        ورايتي مش رح تسلم
        ***
        ومش همشي ورا أْشاعَه ْ
        فاكرني دْماغي بلَّاعه ؟؟!
        أنا باقي إلى الساعهْ
        على عهدي كدا هبقى
        بكمِّلْ رسم لوحاتي
        ما هستبقى ...
        ما هستبقى بها غير نيل .
        هَرمْ صاحي
        نهارِ وْليل .
        سما صَافيهْ
        وضِلَّهْ بتحضن العاشقين
        كدا هابقى
        أنا المصري
        وحافظ لي الزمان قدري
        مــن دمــوعــي تــرتــوي الذكريــات
        مــن أنينــي ينحنــي جــذع الأهــات
        لا تسلْني هل مضى العمر استــراق
        إنــنــــي حــلـــمٌ بــــــلا مــــــأوى وزاد

        تعليق

        • سامية عبد الرحيم
          أديب وكاتب
          • 10-12-2011
          • 846
          #5
          قلب الحديد كافر بقلم الأستاذة / نجلاء سلامة
          ...................
          عند انعكاس الضي
          من بطن الألم
          مرسوم علم
          وكتاب لمعهد أزهري
          دم البنية العنبري
          فوق الغلاف
          يا ضنايا كلت اللقمة حاف
          علشان أوفر قرشنات
          إتعلمي زي الولاد
          واقري ف كتاب الأولين
          فقه السنن
          علم الحديث
          دا مافيش حديث فوق اللسان
          خالي من الذكر الحكيم
          ياام السنين الخضرا
          شايلك للزمن
          وان كنت جاهل ف العلام
          حتكوني عين
          بصيرتي المؤمنة
          وتكوني للساني الكلام
          ياضنايا سيبت البرد
          ياكل جتتي
          لجل اشتريلك فستانين
          يانن عين قلبي البسيط
          قلب الحديد...
          كافر قوي
          مزّع حشايا بدون سبب
          يا حافظة أجزاء م الكتاب
          أجزاءك النايمة هناك
          ع الأرض ساجدة بدمها
          ياهل ترى سجدة صلاة
          أو سجدة تشكي لربها
          الأرض فاتحة حضنها
          وانا حضني مستني القدر
          القطر توت
          انذار خطر
          ياسايبة شنطة وكام كتاب
          جاهل انا بفك الحروف
          والشوف من الدمع انعدم
          يا ام السنين الخضرا
          شيلتك للزمن
          جاب الزمن
          م الشؤم قطر بأجنحة
          سرق الرصيد.
          مــن دمــوعــي تــرتــوي الذكريــات
          مــن أنينــي ينحنــي جــذع الأهــات
          لا تسلْني هل مضى العمر استــراق
          إنــنــــي حــلـــمٌ بــــــلا مــــــأوى وزاد

          تعليق

          السابق template التالي

          ما الذي يحدث

          تقليص

          الأعضاء المتواجدون الآن 71713. الأعضاء 4 والزوار 71709.

          أكبر تواجد بالمنتدى كان 409,257, 10-12-2024 الساعة 06:12.

          يعمل...
          X