إنحدري كمان بينا إنحدري

إنحدري كمان بينا إنحدري
إنحدري يا ريتك تنفجري
إنحدري وخلى الناس تغلي
يمكن بالنار ..... نصحا ونبدى
*****
إنحدري وخلى الناس ضايعين
علشان نايمين
عايشين ف همومهم مش حسين
مدفونة ف طين
مش عارفين حتى طريقها منين
وواخدها لفين
إنحدري وطفشى كل الناس
وسبيهم ف بلاد العالم..
تنهان .. تنداس..
*****
إنحدري وخلينا وراكى
بين تلج ونار
إنحدري وخلينا نخلص
طال المشوار
الناس المربوطة ف خوفها
مش ناس أحرار
والغصن الناشف ما يطلع..
أبدا أزهار
والزهر الدابل مش ممكن..
يطلع بثمار
*****
إنحدري كمان بينا إنحدري
إنحدري وخدى قلبى معاكى
علشان يرتاح
فجراح القلب المكبوته.. زى الاشباح
والقلب العاشق كالجمرة..
فيه نار وجراح
والقلب الميت أحسن له..
يدفن.. يرتاح..
والشجر الأخضر لو ينشف..
فمصيره النار
والحلم الميت يدارى
فمصيره العار
*****
إنحدري وخدى قلبى معاك
فالخوف الساكن جواكى
مش ممكن يصنع ثوار
والنايم ف جحور الضلمة ...
ما يشوف انوار
دا الناس نايميين
عايشين ف كهوف
بين وحل وجهل وفقر وخوف
على حلم اتعفن فوق ع الرف
وبقينا بقايا لشعب كبير
والوطن الحر صبح عاجز ..
وكانه اسير
*****
الحلم دا جنة ومتحاطة..
وسط الالغام
والجنة لناس تتعب .. تشقى..
مش بس نيام
والشعب النايم يستاهل..
ما يكون له كلام
والشعب التاية يستاهل..
ما يكون ف سلام
والشعب الخايف يستاهل
ما يعيش ف امان
والشعب الجايع يستاهل
ما يبات شبعان
والشعب النايم عن حقه ..
لازم يتهان
والشعب الجاهل يتلعن
والشعب الساكت يتجنن
فإنحدري كمان بينا إنحدري
خلينا نفوق تانى يا بلدى
*****
جمال نصير في 3/3/2010