الناس خلاص أكلوا البالوظه
وباعو القضيه
ركنوا هناااك متبعترين
يسقوا فى المَيّه
كانوا صف واحد بس
صبحوا مِية
طال الوقوف اتلعب بيهم
ولعب الورق غيه
مين يُقش
ومين يكش
ومين ينداس عليه
يااااافنديه
يامعذبين الواد
الواد خلاص تاب
ونسى الملاغيه
حلمه كان حمامه
بيضا.. حلوه وصبيه
يعدي بيها بر الأمان
وتضمه بحنيه
يرسم تبارك خطوته
يبوس كفوفها الحنونه المحنيه
لكنه لما كشف وشها
طلعت ياخلق مش هيا
خطفوها من توب فرحها
عرُّوها من تاني
يوم الصباحيه
رشوا عين فارسها
في زفته وسبوه يلطم
ينادي....ياعزيزه
ياعزيزه
أستني يابهيه
عارفك والله عارفك
انتي ناعسه أيوا ناعسه
ألأيوبيه
اعذريني ياحبيبتي
الطعنه كانت شديده
عليَّ قويه
راسي خلاص بقت ياناس
سمك .. لبن ... مهلبيه
والواد لساه مافاق
ماسك شراع الأمل
بإيد . وفى التانيه
السمسميه
عليها بيعزف غنوته
وبيمسح بيها دمعته
ويحلي باااالباقيه
ولسان حاله يدندن
الست مرجانه
ياخلق تعبانه
نمنا وسبناها
خطفتها جنيه
خطفتها جنيه