السياسة

آه ه ه ه ... يا بلد
آه م السياسة وفجرها
لحست دماغنا بسحرها
حتى الحرامى ..والضلالى ..وال باع دينه وعرضه أخرته.....
بقت السياسة شغلته
لو باع أخوه... مش مشكله
أمه وأبوه... أيه يمنعه
بس المهم....
تبقى السياسة مهنته
*****
إعلام ... صحافة.. وكل شئ
راح ترصده..
دا هناك مشى.. وهناك شرب..
وهناك فرك صبعه الصغير م الجرب...
وهنا وهناك ناس تحسده
حتى الفلوس ... راح تبلعه ..
*****
جات النخب ..قصدى النكب
فجأة وبانت وسطنا
ورموز تقيله .... ف حملها
من تقلها ....
حلت معاها وسطنا
*****
من ضمنها...
واحد خدعنا كلنا
باع الشهيد .. لما الرئيس قرر يحاكم من جديد ..
كل إل حطوا رجلهم .. فوق قلبنا
وبقالها دوله جوا دوله بأرضنا
*****
واحد خمورجى من الفلول
شارك فى خيبة ... مصرنا
ورموز كتير مالية البلد
ال قتل ..
وال نهب
وال رجع بينا لورا
كام ميت سنة
أصحاب قلم..
أصحاب نفوذ
أصحاب فلوس ملهاش عدد..
اصحاب كراسى اتحركت .. على جسمنا
والعرش كان فوق ضهرنا
شيلينه بأدينا وهمومنا وقهرنا
*****
بقوا كلهم..
جبهة بتنقذ فى الوطن !!!
شوفتوا العفن؟؟
ييجى الحرامى .. والخمورجى .. والمتهته ..
وال تايه ف الوثن ..
ويقول هينقذ شعبنا؟؟
من أيه ؟؟.. وليه ؟؟..فعلا زمن.....
وف اى درب ياخدنا فيه ... درب المحن؟؟
لو كان صحيح رسمين امل
وبحسن نية للوطن
حطولنا خطة للعمل
شوفوا المشاكل والعلل
بدل المناهدة والجدل
*****
من مين هينقذ مصرنا ؟؟
جيش التتار راجع لكم؟
او اسرائيل... عادت ودكت أمنكم ؟
دول مسلمين .. ناس منكم
عايزين يعيشوا بربنا... مش زيكم
عايزين شيطان يحكم لكم
عايزينها زيطة وزنبليطة وسطكم
يا فجركم
*****
أصل السياسة أصبحت ..عند الجميع ..
لقمة حياة ..
قبل الوظيفة والمهيه والصلاة
بقى كله عايش بالسياسة ..وف السياسة ..
وف الشوارع .. والحوارى والكفور
وننام نقوم نحلم سياسة مسيسة .. زى البخور
الريحة شيئ..
لكنها... دخان بيتعب ف الصدور
*****
ماهى هى فوضى وال عايز ينشهر
يا دوب يقول " انا ثورجى "
أنا بالسياسة بشتغل
مش بالوظيفة وبالشهادة وبالعمل
والمشكلة..
كله بيسمع من أخوه .. أو من أبوه ..
أو بنت عمه وجدته ..
أو من صحابه وشلته
فيه حد فكر وبضمير ؟؟
فيه حد نور سكته – بأديه – عشان يقدر يسير؟؟
*****
ثورتنا نجحت لما كان للناس هدف
واتوحدت كل الصفوف لما النشيد كان يتعزف
ضاع النشيد
تاه الهدف... مات الهدف ..
واتفرقت كل الفرق
والسد ويا السيل.. جرف
أه ه ه ه يا بلد
من دى السياسة ومكرها
جالنا القرف
*****
جمال نصير فى 10/12/2012​