إلى راعى الرعية
السيد / رئيس الجمهورية
شكوى من داخل صفوف رغيف العيش
******************
يا رئيس الجمهورية
كيلنا فاض م العيشة دية
اتفقنا ان انت أب
وانت راعى للرعية
جابو ناس ترعى المصالح
طلعوا ناس بايعة القضية
قول لهم بشويش علينا
قول لهم فيه آخرة جاية
عمرنا مانكون عبيد
والبلد ماهياش وسية
لو يعوزوا يدوخونا
قول لهم الشعب داخ
يفتحوا العشة يلاقونا
هشة وتنام الفراخ
يارئيس بالله عليك
ربنا يعزك كمان
وانت جاى تتعشى فكَُر
نص شعبك نام جعان
سيبنا من سعر الحديد
واللا أسمنت المبانى
نفسنا بس فى معيشة
ليها طعم وشكل تانى
إحنا مش طالبين فلوس
إحنا عايزين الرغيف
ندهنه بريحة غموس
أى حاجة بس ناكل
كنا راضيين بالفلافل
ليه يغلَُو الفول علينا؟
يارئيس إيه دا اللى حاصل ؟!
يارئيس والله استوينا
قول لنا إيه بس ناكله
وفروا لنا حاجة شكله
حتى مش طالبين لحوم
والفراخ مالهاش لزوم
والسمك مالهش عازة
والكبد زى القوانص
رخصوا بس البطاطس
إعتبر شعبك فريق
خد بطولة باسم مصر
إفتكر حاجة لشعبك
إحنا برضه شعب مصر
اللى ياما وقفنا جنبك
ياما قولنالك آمين
ياما شدينا الحزام
كلَلَََه ياريس بأمرك
ربنا يطول فى عمرك
نفسنا نستغنى عنه
فكَُها حبة علينا
والحزام ريحنا منه
البلد نقسمها بينًَنا
حاجة لينا وحاجة ليهم
أى حاجة تبل ريقنا
والبلد مبروك عليهم
يارئيس الجمهورية
كيلنا فاض م العيشة دية
يارئيس الجمهورية
نفسنا ف عيشة هنية
********* ......،،،