عيلة النزهى ..ست كوم

**منار يوسف** · 15-01-2013, 13:37

الأديب المتألق
رضا هجرسي
تشعرني دائما بهذه الحلقات أني أشاهد مسلسل عربي
لديك موهبة في السرد رائعة و مشوقة
أعتقد أن الحلقات تدور في اسكندرية
لذا لزم التنويه

انتي واخدة بضاعة بتلاتين
جني

أهل القاهرة يقولون ( جني )
أهل اسكندرية يقولون ( جنيه )
و هذه من الكلمات الدراجة التي يختلف نطقها بين أهل اسكندرية و القاهرة
تقديري الكبير لك
و في انتظار مزيدك دائما

**رضا الهجرسي** · 15-01-2013, 18:35

المشاركة الأصلية بواسطة منار يوسف مشاهدة المشاركة

الأديب المتألق
رضا هجرسي
تشعرني دائما بهذه الحلقات أني أشاهد مسلسل عربي
لديك موهبة في السرد رائعة و مشوقة
أعتقد أن الحلقات تدور في اسكندرية
لذا لزم التنويه

أهل القاهرة يقولون ( جني )
أهل اسكندرية يقولون ( جنيه )
و هذه من الكلمات الدراجة التي يختلف نطقها بين أهل اسكندرية و القاهرة
تقديري الكبير لك
و في انتظار مزيدك دائما

المبدعة المتألقة ..منار يوسف ..
يسعدنى دائما مرورك على أعمالى ..نعم أحداث الست كوم فى الأسكندرية وبحاول أن أضع اللهجة الأسكندرانية ..وهديتى لكى الحلقة الثانية ..أرجو أن تعجبك ..
شكرا على مرورك المثمر ..

**رضا الهجرسي** · 15-01-2013, 18:49

عيلة النزهى
الحلقة الثانية
________
مشهد 1 غرفة ضابط المباحث نهاري/داخلي

أثاث مكتب مباحث قسم
يقف أمام المكتب صول في الخمسون
(صول مجاهد) يمسك في يده يافطة
مكتب خشبية مكتوب عليها
رائد/عاصم الدرملي
رئيس المباحث
يضع اليافطة علي المكتب ويلمعها
بكمة ..يدخل الرائد عاصم وهو
رجل في الأربعون من عمره
يؤدي له مجاهد التحية العسكرية
مجاهد:حمدالله ع السلامة يا
عاصم باشا نورت مكتبك
بحرى كلة نور برجعتك ليه
ينظر عاصم للمكتب ويقلب نظره
في أرجاء الغرفة وهو يأخذ نفس
عميق ويجلس علي المكتب
عاصم:شكرا يا صول مجاهد ..يااااااه
خمستاشر سنة فاتت من آخرمرة
كنت قاعد فيها علي المكتب ده
مجاهد:والله اسكندرية خسرت سعادتك
والكل زعل لما سبتنا فجأه كده
لكن الحمدلله رجعت لنا رائد قد
الدنيا بعد ما كنت حته ملازم أول
بدبورتين ..لا هنا ولا هناك..
عاصم: بتقول أيه يا مخبول أنت.. ذى
ما أنت متغيرتش ...كلامك دبش
يضحك في تخلف
مجاهد:ههههههها مقصدش سعادتك آني
أأقصد ..
يقاطعه في غضب
عاصم:لا تقصد ولا متقصدش .. أنتوا
أتنين سيبتوني اسكندرية كلها ..
وخلتوني أهرب قبل ما تفقعولي
مرارتي ..وأموت في اديكوا..
يضحك مجاهد بتخلف
مجاهد:أيوه ..عارفه ..ابو حميدو ..
لكن مين التانى ..
عاصم:ايوووة..ابو الزفت..هو لسه عايش
ولا ربنا أفتكره و ريحنا منه ومن
بلاويه ومصايبه اللي مبتخلصش..
مجاهد:عايش سعادتك وفي كامل صحته ..
وعافيته..هي بحرى تبقي بحرى
ألا.. ببو حميد ..
عاصم :ولسه مصايبه وبلاويه ذي ما هيه
مجاهد:لا سعادتك خلاص اتهد
الجوازو العيال هدوه ..
في استغراب
عاصم:النزهى اتجوز وعنده عيال كمان..
مجاهد:وابنة الكبير سماه حميدو ..عشان
اسمة يفضل ابوحميد ..
يسمع صراخ في الخارج وصياح
يرددون ..أرهابيين ..أرهابييين ..
يختبئ مجاهد خلف كرسى المكتب
يقف عاصم مذعورا وتركز
الكاميرا علي وجهه
عاصم:أرهابيين و في القسم كمان..وفى أول
يوم ليه فى القسم ..أهلا ..

( قطع )
.................................................. ..............................................

مشهد2 محل النزهى نهاري/داخلي

محل به أصناف مختلفة من البضائع
من ملابس ومعلبات وغيره ..
يقف ضو مع زبون يعرض عليه بنطلون ..
النزهى يجلس علي مكتبه فى صدر المحل ..
يدخل رجل في نفس عمره
وهو صديق عمره ..العتر ..
يقف مرحبا به
النزهى:حبيبي ورفيق عمري وزميل
الكفاح ..أأقعد ..ولة ضو ..
واحد عناب لعمك العتر ..ولا
نخليها ثوبيا ..ولا معدتك تعبانه
العتر:خليك في شغلك يا ضو .. عارف
أنها هترسي علي مفيش ..وصلك الخبر
النزهى: خبر ..خبر أيه يا جدع ..أنا فيه
ناموسه تطير فيك يا بحرى
معلمش بيها يا جدع ..خبر أيه ده
هتلقيني عارفه قول يا جدع..
العتر:ظابط المباحث الجديد ..
النزهى:هو ايجه ظابط جديد ..من غير ما
يرجعولي وياخدوا رأي..أيه اللي
بيحصل فيكي ده يا بلد..البلد باظت
ده أني هقلب الدنيا وخليهم
يرجعوه ..ييوووه أفتكرت من مده كده
كانوا أتصلوا بيه وأنا وافقت ..
ده وله طيب وأمير وابن حلال ..
العتر:مش تعرف الأول هو مين قبل ما تشطح..
النزهى:أشطح مين يا جدع ..بقولك أني اللي
طالبه م الداخلية بالأسم .. حتي اسمه ..
اسمه ..فكرني يا جدع ..على لسانى..
العتر:عاصم الدرملي ..
النزهى:أيوه هو عاصم ال..خبرك أسود ..
عاصم ..عاصم ..
العتر:عاصم ..عاصم ..
النزهى:وماله ..ده كان حبيبي برضه..
أنت نسيت أن أنا السبب في ترقيته ..
العتر:ترقيته..ده ساب اسكندرية كلها بسببك
يا جدع بسببك ..
النزهى:بسببي أني ..كدب والله كدب وأشاعات
طلعها الحساد والحاقدين اللي ذيك ..
طب ده أنى كانت قعدتي معاه في القسم
علي طول يا جدع ..ده مكنش يستغني
عني .يستشرني وياخد رأي في أي قضيه
أنا كنت أأقعد في القسم ..أكتر ما أقعد في
بيتى يا جدع ..
العتر:لا وأنت الصادق..تقعد في الحجز ..
اكتر ما تقعد فى بيتكوا ..
عشان المشاكل اللي كنت بتعملها ..
وان كنت ناسى افكرك..
مين كان بيجيبلك العيش والحلاوة
يا جدع ..
يقف النزهى
النزهى:طب قوم بينا نسلم ع الراجل وتشوف
بعينك فرحته بيا ..ده أنا النزهى يا جدع ..
يعني بحرى وزنقة الستات تمن ..

(قطع )
.................................................. ..............................................

مشهد3 غرفة ضابط عصام نهاري/داخلي

يقف عاصم علي جانب مكتبه الأيمن
وهو مذعور ..وعلي الجانب الأيسر
تقف ميمي وهي تمسك بنت من شعرها
وتضع مسطرة علي رقبتها ..والبنت من
نفس عمرها ولكن أضخم منها ..
مريلة ميمي ممزقة ..والبنت الأخري
توجد هالة سوداء حول عينها ..
عاصم:حاضر ..حاضر..كل طلباتك هنفذها
بس ابعدي السلاح عن رقبتها ونتفاهم
ترد ميمي بلهجة المجرمين ..
ميمي:مفيش تفاهم لحد ما تجبولي حقي
آه ..أنا مكرتش علي قفايا من بت
سكرتة ذي دي ..
عاصم:حقك محفوظ ..بس ابعدي السلاح
يطول ..
ميمي:حقي يوصلني الأول ..
وبعدين نشوف حكاية السلاح يطول
دي ..هو مش انت البيه الظابط اللي
بيجيب حقوق الغلابة اللي ذي ..
ولا مش أنت ..
عاصم: أيوه يا معلمة ..أنا الظابط اللي
بيجيب حقوق الغلابة اللي ذيك
بس لازم أعرف الأول هى خدت منك أيه
..عشان أردهولك وترفعي السلاح من
علي رقبتها وتحكيلي الحكاية..
ونعمل بيهامحضر ..
تبكي ميمي بحرقة ..
ميمي:يعني لما اسيبها ..مش هتضربني
وتعلقني عالعروسة ..وتنفخني ..
عاصم:لا هضربك ولا هنفخك ..
ميمي:كلام رجالة ..ولا كلام ظباط ..
مجاهد:أتلمي يا بت..الظابط عاصم طول عمره
كلامه كلام ظباط ..
( قطع)
.................................................. ..............................................

مشهد4 شقة النزهى نهاري/داخلي
تجلس توحه تشاهد التلفزيون وفي
يدها طبق به طعام ..يدق جرس باب
الشقة كثيرا ولا تقم من مكانها ..
تخرج ام حمو من المطبخ وفي
لهجة غاضبة ..
ام حمو:اطرشتي يا بت..آه ما هو مدام بتلغي
هتردي علي حد ..حاضر يا اللي علي
الباب أنت راخر ..
تذهب وتفتح الباب ..يدخل الصول
مجاهد ماسكا دفتر في يديه ..
أم حمو:أهلا يا صول مجاهد ..خير يا خويا ..
مجاهد:لا أهلا ولا سهلا ..أني هنا في مهمه
رسمية ..
أم حمو:أيوه يا خويا ..بس النزهى مش هنا
ده في محله فى الزنقة ..روح أقبض عليه هناك
هو المتنيل هبب أيه المره دي ..
مجاهد:المرة دي أنا مش جاي للنزهى جوزك ..
أنا جاي بخصوص ..
يفتح الدفتر ويقرأ منه
مجاهد:المتهمة المجرمة الأرهابية ..
ميمي النزهى..مش ده منزل المذكورة
تضحك أم حمو
أم حمو:يوه كتك أيه يا صول مجاهد ..جيران
العمر كله ..وجاي تسأل ..
يغلق الدفتر ويتكلم بجدية
مجاهد:الكلام اللي هقولهولك ده سري للغاية ويعتبر
من أسرار الدولة العليا..وعشان العشرة والجيرة
انا هقولك ..بس وحياه ابنك حمو ما تجيبي سيرتي
قدام الظابط انى قولتلك حاجة..
تقف توحه خلف أمها ..وتضرب
أم حمو بيدها علي صدرها
أم حمو:أقول يا خويا وقعت قلبي ..بنتي جرالهاحاجه ..
تبكي توحه بتخلف والأكل في فمها
توحة :آههههه يا حبيبتي يا ختي ..
أم حمو:اكتمي يا بت..قول يا خويا..
سر الدولة في بير..

(قطع )
.................................................. ..............................................

مشهد5 محل النزهى نهاري/داخلي

ضو يقترب منهم
ضو :علي فين يا ابو حمو..
النزهى :علي القسم يا وله ..
ضو :راجع ولا بايت ..
العتر:ما بلاش يا خويا المشوار دهوه ..
النزهى:بلاش أزاي يا جدع ..الراجل
ينزلك يا بحرى والنزهى ابو الجدعنة كلها
فيكى يا اسكنرية ميرحبش بيه ..كبيرة قوي
في حقي ده بحرى كلة ياكل وشي .. ما أنت
عارف ..اللي يرضي عنه ابو حميدو ..
ترضى عنه بحرى كلها..
العتر:أنا خايف يبيتك في الحجز ذي كل مرة
النزهى:ده كان زمان يا جدع..أيام الشقاوة
يالا يا جدع ميبقاش قلبك رهيف كده
خد بالك م المحل يالة ضو ..
ضو :عيني يا ابو حمو ..بس أذا ضيفوك في
المديرية ..هسكر أني واروح ..
( قطع)
.................................................. ..............................................
مشهد6 غرفة الظابط عاصم نهاري/داخلي

يجلس عاصم علي مكتبه ويجلس
من الناحية الأخري من المكتب
ميمي والفتاة الأخري وأمامهم
عصير ليمون ترفع ميمي كوب
العصير علي فمها وتشربه دفعه
واحدة وتكرع بصوت عالي ..
عاصم:صحه وعافيه ..هه شربنا الليمون
اعصابنا هديت ..نبتدى بأه..
تقاطعه وتبكي بصوت عالي
ميمي:أيه ..هتنفخني ..
عاصم:أنفخك أيه بس ..هو أنتي كلك علي
بعضك فيكى نفخه ..بس لو لفيتي
ودورتي معايا ومكنتيش صريحة ..
ميمي: أيه ..هتنفخني ..
عاصم:ساعتها هفكر ..هه أيه الحكايه بقى ..
ميمي: الحكاية يا باشا البت دى عايزة تكرتني
علي قفايا وتضرب عوافي علي أتنين
جني ..قلت أجيبهالكوا ..تنفخوها
وترجعولي الاتنين جني
عاصم :جيباها من شعرها وحطة السلاح علي
رقبتها ..وقلبتي القسم..
كل ده عشان اتنين جني
ميمي:حقي يا باشا..عض قلبي ولا تعض
جنيهاتي
عاصم:هيه بقت جنيهاتي..والاتنين جني دول
كانت سلفاهم منك ..وضربت عوافي
عليهم يعنى ..
ميمي:حاجه ذي كده ..
ينظر إلي الفتاة الأخري
عاصم :ليه يا حبيبتي مش عايزة تديها فلوسها ..
تتكلم برقة شديدة
الفتاة:عشان يا أونكل كل البضاعة اللي أشتريتها
منها طلعت مضروبة وبايظة ..
عاصم:بضاعة أيه اللي مضروبة وبايظة ..
الفتاة:الأقلام مبتكتبش وبتقطع الورق ..البرايات
تلمه وبتقصف لقلام..الكراريس ورقها أصفر
عاصم :أهلا ..دي قضية صقع يا ست ميمي ..
تبكي ميمي بحرقة
ميمي:ايه ..هتنفخني ..
عاصم:ده أنا هنفخك وأنفخ ابوكي كمان ..
لومقلتلي جبتى البضاعة المضروبة دى منين
ومين اللي مسرحك بالبضاعة المضروبة دى .
يدخل مجاهد
مجاهد:تمام سعادتك ..ام المتهمة المجرمة الأرهابية .
عاصم:يا أهلا وسهلا ..دخلهالي ..
تدخل أم حمو فيهمس لها
مجاهد
مجاهد:أوعي تجيبي سيرة النزهى علي لسانك
وألا القسم هيولع بجاز ..قولي أم ميمي ..
يرفع مجاهد صوته
مجاهد:أم المتهمة ..خشي يا أم ميمي ..هه أم ميمي ..
عاصم:شكلك ست محترمة ..ومش وش الحاجات دى
مجاهد: أم ميمى ست كمل وسيرتها ذي الفل ..
عاصم:والست الكمل تسرح بنتها ببضاعة مضروبة ..
وتغش زمايلها ..وتبيع لهم أقلام وبرايات بايظة
أم حمو:بت مين ..وبضاعة مضروبة أيه يا باشا
عاصم:يعني عايزة تفهميني أنك متعرفيش أن بنتك
بتبيع لزمايلها أقلام وبرايات بايظة ..
تمسك ميمي وتضربها
أم حمو:أنتي يا بت جبتي الحاجات منين ..ومين اللي
مسرحك بيهم ..أنطقي يا بت ..مين ..
وألا هقطعك حتت اذا مقلتيش مين ..انطقى يا بت
مين..
يدخل النزهى فاتحا ذراعيه
ومن خلفه العتر
النزهى:ابو حمو وصل بنفسه ..أول ما سمعت
بوصول سعادتك ..جيت أرحب وأهني
تجري ميمي علي النزهى وترتمي
في حضنه وهو في ذهول تام
عندما رأي ميمي وام حمو
ميمي:ألحقني يا دادي ..الظابط هينفخني ..
يقفز عاصم واقفا
عاصم:دادي ..هو أنتي بنت النزهى ..أهلاااااااااا
والله زمان يا حبيبى وقدرى ونصيبى ..
وأنا أقول الريحة واللغوة دي مش غريبة عليا ..
بأه أنت بأه اللي بتديها توزعلك البضاعة المضروبة
علي زمايلها في المدرسة ..ألبس يا حلو
قضية تجارة في بضاعة مغشوشة ..صول مجاهد

أرميه في الحجز
يصرخ مجاهد والعتر معا
الأثنين:تاني يانزهى ..
تشد ميمي عاصم من بنطلونه
ميمي:بقول أيه يا باشا ..
هتنفخوه ..

(نهاية الحلقة)

**رضا الهجرسي** · 18-01-2013, 00:40

الحلقة الثالثة
------------

مشهد1 شقة النزهى نهارى/داخلى
صوت جرس باب الشقة
ام العربى تفتح باب الشقة
تدخل فتاة فى الثامنة عشر
جميلة نحيفة فى جسد ملفوف
تتكلم برقة شديدة ..(سميرة )
تحضن دبدوب على صدرها
سميرة: صباح الحب يا طنط ..
ام حمو: صباح ايه يا روح طنط ..الحب
الناس تقول صباح الخير ..صباح
الهنا .. لكن صباح الحب ..
تخرج ميمى من غرفتها
ميمي : ايوه يا ماما ..صباح الحب ..
تخرج توحة وراءها
توحة: فى عيد الحب ..
تقبل سميرة ميمى وتوحة
وهم يقولون
سميرة وميمى: هابى فالنتين ..
سميرة وتوحة: هابى فالنتين ..
تحتضن سميرة ام حمو
وتقبلها قائلة
سميرة :هابى فالنتين ..يا طنط ..
فى ذهول تنظر إليها
ام حمو:هباب الطين عليكم ..بنات مايصة
صحيح ..فى ايه يا بنات ..ايه
السهوكة والمياعة اللى انتوا فيها دى
فى تنهد ورقة
ميمى : الفالنتين يا ام حمو ..عيد الحب..
توحة : آآآآ ه ..عيد الحب ..
سميرة: ايوه يا طنط ..عيد الحب ..هو حمو
هنا ..
تقلدهم ام العربى
ام حمو: ايوه يا مسهوكة موجود ..عايزة منه ايه
سميرة: اديله الدبدوب الجميل ده ..
ام حمو :وابوكى بسيونى موافق ..
يدخل بسيونى والد سميرة
حاضنا دبدوب وهو رجل
تعدى الخمسين يرتدى
بدلة وكرافتة دائما ..
يعطي ام حموالدبدوب
بسيونى : وبسيونى جاى بنفسه ..يهنى بالفالنتين لأحلى
جيرة..جيرة العمر..هابى فالنتين ام حميد.
تتناول الدبدوب منه فى
ذهول
ام حمو : يخيبك راجل من دون الرجالة..
انت كمان يا عايب يا شايب
ليك فى الهبااطين ..
يخرج حمو من غرفته
ويتجة الى سميرة ويأخذ
منها الدبدوب ويتبادلا
نظرات الحب فى هيام
حمو: كل الدنيا النهاردة يا ام حمو بتحتفل
بالفالنتين ..عيد الحب ..وبيهدوا لبعض
دباديب الحب ..
تظهر عليها علامات الحزن
وتجلس وتضع يدها على
وجهها وتبكى
ام حمو : آمال الموكوس ابوكم ..
مش م الدنيا دى..
ألا ما خطر على باله يجيب لى
ولو حتة دبدوب جربان ..
يلتف حولها الجميع يواسونها
(قطع )
----------------------------------------------------------------

مشهد2 محل النزهى نهارى/داخلى
يجلس النزهى وضو يرتب
البضاعة ..يدخل العتر
العتر :صباح الحب والفالنتين يا نزهى يا خويا
مال محلك بينش كده ليه ..المحلات كلها
بتشغى زباين وبيع ..انت مجبتش
دباديب ولا ايه ..
النزهى :نسيت خالص ..والبهيم اللى معايا نسى
العتر : يالا كل سنة وانت فى حب ..
تتعوض السنة الجاية وعليك حب ..
اسيبك دلوقتى ..لحسن المحل بيشغى
زباين ..كلة عايز دباديب ..
يخرج العتر ويدخل حمو
حاملا دبدوب يضعه على
المكتب أمام ابوه..
النزهى:ايه ده يا حمو ..والله اصيل يا وله وابن
ابوك ..افتكرت ابوك فى الفالنتين يا وله
حمو : لا افتكرت ام حمو ..اللى انت ناسيها ..
الوليه قاعدة مقهورة ودمعتها على
خدها..عشان نسيتها
فى الفالنتين ..قلت افكرك ..خده معاك
وانت مروح ..اجبر بخاطر ام عيالك
يا جدع ..
النزهى :ماشى يا خويا يا حبيب امك أنت ومفتكرتش
تجيب واحد لابوك ..ماشى يا حمو ..
مردودالك يا بتاع امك ..
يخرج حمو وتدخل زبونة
تنظر فى البضاعة وترى
الدبدوب على المكتب تصرخ
الزبونة: ياى ..دبدوب جميل قوى..بكام ده يا عمو
ضو : ده مش للبيع يا امورة ..
النزهى :اسكت انت يا وله ..عجبك يا امورة ..
الزبونة: ياى يجنن ..
يشير للض ويوشوشه فى أذنه
النزهى:يطلع له بكام ده يا وله ..
ضو :ده بقليله كده ..عشرين جنى ..
النزهى :اربع ..خمسين جنى يا امورة
ده عشانك أنتى بس ..
تدفع الزبونة وتحمل الدبدوب
فرحة ..وتدخل توحة وميمى
كل منهما حاملة دبدوب ..
يضعوا الدباديب أمامه ..ويهمسون
فى أذنه ..وهو يشير بيده على عينيه
ويخرجوا من المحل ..ويدخل
طارق ..ويخطف واحد منهما
ويجرى ويجرى وراءه ..
ويعود وهو ينفخ غيظا ..ويمسك
الدبدوب الثانى فى يده خوفا ..
فيدخل على الحوت ويسحب الدبدوب
من يده..ويناوله خمسين جنيها ويخرج

(قطع )
----------------------------------------------------------------

مشهد 3 شقة النزهى نهارى/داخلى
تجلس ام حمو على كنبة
فى الصالة ..واضعة يدها
على خدها وتجلس بجانبها
توحة وميمى يربتان على
ظهرها ..وهى تشاهد التلفزيون
على شاشة التلفزيون مشهد من
فيلم (ابن حميدو ) بين أسماعيل
ياسين وزينات صدقى فى المطبخ
وهى تضع المفتاح فى صدرها
وتقول له (انسان الغاب ..طويل الناب )
تنطرام حمو يدهما فى عصبية
صارخة فى توحة..
أم حمو :ناولينى يا بت التليفون..واطلبي
الموكوس خالك ..
تطلب نمرة وتناول السماعة لأمها
أم حمو : الكلام اللى هقولهولك ده تنفذه حالا
تروح تشترى اكبر دبدوب فيكى
يا اسكندرية ..وتجيب البت شفيقة
فى ايدك ..وتكون عندى فى غمضة
عين ..فاهم ..وخليها تحنتف نفسها كده
وتخس شوية ..تخس ازاى ..معرفش
تخس ازاى ..يالا ..فى غمضة عين
تكونوا عندى ..
تناول السماعة لتوحة وميمى
تكتم ضحكتها هى وتوحة
أم حمو:آه ..أمال ايه هى البت المسهوكة
دى هتخطف الواد بدبدوب ..
وانا واقفة اتفرج ..
يدق جرس الباب
تقوم توحة وتفتح الباب
فيدخل على الحوت حاضنا
دبدوب ..يتنهد فى هيام
ويناوله لتوحة تأخذه توحة
حوت: مساء الفولنتين لاحلى موزة فيك
يا بحرى كلها ..لأ والمرسى ابو العباس
فى اسكندرية تمن ..
ترقع أم حمو بالصوت الحيانى
ام حمو:يا لاهوتااااااااى..حتى على الحوت
بيفلتن..يا حظك الهباب يا ام حمو
تقلب توحة فى الدبدوب
توحة :الدبدوب ده ..أنا شفته فين قبل كده
يدخل طفل صغير فى عمرميمي
حاضنا دبدوب ويتكلم بلدغة
الطفل :هى الآنسة ميمى موجودة ..
تنظر اليه ام حمو ..وتقع
رأسها على كتف ميمى
مغشيا عليها ..
تهجم شفيقة على باب الشقة
وتسقط الطفل فتجرى عليه ميمى
وترفعة ..وفى رقة..
ميمى: سورى سولى ..
ترتمى شفيقة وهى فتاة ممتلئة
الجسم (تخينة )على ام حمو
وهى تحتضن دبدوب كبير ..
يدخل اسماعيل وهو رجل تخطى
الخمسين ..
اسماعيل :مالها امكم يا ولاد ..مالك يا
ختى ..
تشير له بيدها على شفيقة
ام حمو :شيل الداهية دى من على
صدرى البت هتفطسنى ..
شفيقة: مالك يا عمتو ..فين حمو ..انا
جبت له دبدوب..آهه ..
(قطع )
--------------------------------------------------------------

مشهد 4 محل النزهى مساء/داخلى
يتحرك النزهى يمينا ويسارا
فى عصبية وهو يضرب كفا بكف
يدخل العتر وهو يفرك يده ..يسحبه ويجلسه
النزهى : جيت فى وقتك يا صاحبى
ورفيق عمرى ..انجد اخوك
العتر: أأمرنى يا خويا رقبتى فداك
النزهى: دبدوب ..عايز دبدوب .. حتى لو
كان نص لبه ..
العتر: كان على عينى يا خويا ..اتسحبت
وتباعت كلها ..
يدخل ضو وهو يلهث
ضو:الزنقة كلتها ما فيهاش ريحة
دبدوب واحد..تقلش مخدرات يا جدع ..
يضع النزهى يده على راسه
النزهى: يا فضحتك يا نزهى ..قدام
ولادك ..ولا ام حمو اللى مستنية
رجعتى بالدبدوب ..الله يقطع
الفالنتين ع اللى اخترعوه ..
( قطع )
----------------------------------------------------------------

مشهد 5 شقة النزهى مسائى/داخلى
تجلس ام حمو.. فى منتصف
كنبة الصالون ..وعلى يمينها شفيقة
وعلى يسارها سميرة ..ملتصقين بها
وأمامهم يجلس حمو وتوحة وميمى ..
وأخوها اسماعيل ..
تدفع ام حمو ..سميرة بيدها
ام حمو:يا بت ابعدى عنى عضمك
بيغزنى فى جنبى ..أنتى ايه
يا بت ..ابوكى مبيأكلكيش..
تحتضن شفيقة وتقبلها ..
تضحك شفيقة بتخلف
ام حمو :تعالى انتى يا بكبوظة فى
حضن عمتك ..
تحضنها شفيقة بقوة
ام حمو :بالراحة يا بنت المهبولة
هتفطسينى ..شايف يا واد
يا عربى بكبوظة احلوت
وكبرت ازاى ..مش زى
ناس مسلوعين ولحم على عضم
حمو يفتح ذراعيه على آخرهما
حمو :شايف يا ام حمو ..وهى
بكبوظة حد ميشوفهاش ..ده
يبقى اضبش اللى ميشفش
بكبوظة..
ميمى وهى تشير على دبدوب شفيقة
ميمى :ولا دبدوبها ..بكبوظة زيها
ام حمو:اخرسى يا مسحوبه من لسانك
انتى ..
تأخذ دبدوب سميرة وتلقيه على ميمى ..
ام حمو :مش احسن من المفعوص
المعفن ده ..
تجرى سميرة خارج الشقة باكية
ويجرى حمو على غرفته ضاحكا ..تدفع ام حمو شفيقة
وتشير لها أن تلحق بحمو بغرفته
واسماعيل يشجعها بيديه ..

(قطع )
--------------------------------------------------------------

مشهد 6 غرفة حمو مسائى /داخلى
يدخل حمو غرفته وهو يضحك
تدخل وراءه شفيقة وهى تحضن
دبدوبها وتغلق الباب بالمفتاح
وتضع المفتاح فى صدرها
وتقترب فى هيام من حمو
عربى يتراجع فى خوف
حمو :اعقلى يا شفيقة ..وهاتى المفتاح ..
يقولوا ايه برة ..
شفيقة:مد ايدك وخده ..لو كنت تقدر ..
خبط على الباب شديد وصوت صراخ ام حمو
ام حمو :افتح يا حميدو يا ابنى ..بلاش
فضايح ..دى بنت خالك ..استر
عليها ومتفضحاش ..
حمو: عاجبك كده ..متخلنيش اعملها وامد
ايدى ..
شفيقة: مد ايدك ..يا وحش ..يا انسان الغاب
يا طويل الناب ..
( قطع)
----------------------------------------------------------------

مشهد7 باب غرفة حمو من الخارج مسائى / داخلى
تدق ام حمو على الباب وبجانبها اسماعيل وخلفهم
ميمى وتوحة يضحكون
اسماعيل :انسان الغاب ..طويل الناب ..هو ابنك
عمل ايه فى البت ..ليه يا حمو يا بنى
تعمل كده..كنت قول..كنا جوزنهالك
ام حمو :متخافش يا خويا اللى اتكسر يتصلح .
افتح يا حمو يا حبيبى ..ولم الفضيحة
واطمن ..شفيقة ليك ..وانت لشفيقة ..
اسماعيل : مش ممكن اوافق ابدا ..دى بتقولك ..
انسان الغاب ..طويل الناب ..يعنى
شرفى ضاع ..ابنك لوث شرفى..
يا ام حمو..
تفتح ميمى وتوحة ذراعيمها
ميمى : ولا يسلم الشرف الرفيع من الأذى
توحة:حتى يراق على جوانبه الدم ..
تشدهما ام حمو من شعرهما
وتضرب رأسيهما فى بعض..
(قطع )
----------------------------------------------------------------

مشهد8 شقة النزهى مساء /داخلى
يخرج حمو من غرفتة صارخا
حمو :دبدوب سميرة ..اتسرق ..
تخرج توحة من غرفتها ووراءها ميمى
توحة:دبدوب الحوت اتسرق ..
ميمى : دبدوب سولى ..اتسرق ..
تخرج ام حمو من غرفتها
ام حمو: حتى دبدوب بكبوظة ..
اتسرق ..
يفتح الباب ويدخل طارق وهو
يصفر ويغنى ..يهجم عليه
الجميع ..ويضربونه صارخين
الجميع :فين الدباديب يا حرامى الدباديب
يدخل النزهى حاضنا اربع دباديب وهو يبتسم ..
النزهى :هابى فولانتيم.. يا ام حميدو ..
جوزك حبيبك ..وصل ومعاه الدباديب
يترك الجميع طارق يسقط على الأرض ..
ويتحركون فى تحفز ناحية النزهى ..
وهو يتراجع بخوف ..ويهجمون عليه ..

(نهاية الحلقة )

عيلة النزهى ..ست كوم

عيلة النزهى ..ست كوم

تعليق

تعليق

تعليق

تعليق

ما الذي يحدث