ياأهل الدلتا
ويا أهل الصعيد
ويا أهل مصر الطيبين
للأسف الشديد؛؛
؛فين الوقار
فين التقاليد
الله يرحم الحمارة
والتليس والدبارة
ومشى الخطارة
والجمل
ومشى القدم
والسفر الطويل
والزاد القليل
والصبر الجميل
الله الله
على الناس الطيبين
**** **** *****
فين زمان
وناس زمان
وزمن عمى عتمان
وقميص جدى الكتان
من غير زراير ولا اقطان
صابر وماسك عالزمام
فيه أجدع من كده رجال
*****
ياسلام
عالفول
والعدس المظلوم
عمدة وخالى أطيان
كان زمان يا سلام
عمنا بصل شيخ الغفر
والحج لمون هوة المأمور
والاكلة تمام وتملى العيون
*****
ياسلام
عنطزة وفنطزة
وعنترة كدابة
ناس غاويه شكل
وناس غاويه موضه
ضاعت النفوس
ورحلت معاها الهيبة
رقص وخفه وجلع
وزمن الخلخال إنعدم
وسكنا زمن
الزيطة
والزمبليطه
والمسخرة كدابة
شيكا
بيكا
هزى يا ويكا
رقصينى يا مزيكا
تيكا
بيكا
زيطى يا ويكا
كله تحت الموضه
*****
يا سلام
تلاقى نفسك عالبال
بمجرد الاتصال
صافى مالضرايب
من غير دمغه
طالما عارف الحال
وليه الدمغة
وانت من أهل الحال
يا سلام عل
موضة
الهش
هش
والبش
بش
ضاع زمن المش
والدود أبو قرون
من عهد قارون
لامش ولا فول
ولا العدس المظلوم
مفيش أحسن من كدة أصول
غير عمى المحمول
؛؛؛؛يا سلام
******
يا سلام
على عمى العريان
لايهش
ولاينش
وجعان وعريان
ولاقادر يبص فىالغربال
تقوله كيف الحال؛؛؟
يقولك كله تمام
ياعينى عالرجال
و الفاس
إللى وقع فى الراس

والدنيا صبحت بصل
وقلقاس
ياسلام عالناس
بس الموضة
ورحنا فى زمن الزيطه
والثورة قامت بص الصبر
ورايحه تفض الزيطه