تويت
بيبص الصبح ف وش النيل
وتعوم البسمة
تقلع
تتحمى
وتعود للوش الصابح
موال
لكنه ..
مش بس حزين
شايل حلمه
على كوبري
معدي
وواخد ف إيديه
عربية يد
بتزق الشارع
وتقوله
رايح على فين
أنا و أنت يا نيل
و الحلم التايه
بين جيب مليان
و جيب بيودي
للريح
أهي دنيا
مشغوله
معموله
عشان تفضل
في مكانك
ضل مرسوم على حيط
أو ع الأسفلت
و لما تمسي أم الدنيا
تلملم تعبك
وفي حضن العتمة
تحط إيديك
مطرح ما تحط النجمة هناك
بين عين الدمعة
و عين الحلم على الشباك
بتنام وتقوم على صوتك
زي تمام لما بتحلم
تزورك كوابيس الليل
و أبوك المرمي
في حضن شوال الفل
والسل بينهش فيه
بينادي عليك
لما اتعل
و أخواتك هلاهيل
مرمية
في فراغ الهو
تجري
وتسحب عربيتك
تجري
تعلي في صوتك
يا بطاطا بنار الفرن
و الأمل المدبوح
بيدين الناس السو
بضهر عينيك بتبص
وتجري
ورا صاحبك
ورفيقك
شايل كراريسه وقلمه
رايح مدرسته ..
ماهي كانت مدرستك
قبل ما يحط الشقيان
في ضل الحيط
:يا بطاطا بنار الفرن
كم مرة شالها الطير
لفت على قد مالفت
لكن .. أبدا و لا مرة
بلت ريق الفرن
إلا من قلل الصبر الحامض
: يا بطاطا .. بنار الفرن
شالها الطير أيام و ليالي
داقت طعم الدم
نامت بين جتت الشهدا
غرفت من النيل
لجل جريح
لكن الريح النوة
عدت على ناصية حلم التحرير
قلعت على قد ما قلعت
م الصدر
عدت على قلب صغير
كان متعكز
على عربية يد
بيقول : يابطاطا بنار الفرن
يا بطاطا .. يا بطاطا
ياصغنن .. لساك في قماطة
ميتا هاتكبر
ميتا ..
و لا هاتفضل .. تشرب دمي
و دم أولادنا .. لأجل عيون أمريكا
و نبينا المرسي
يفضل ع الكرسي
في حجر المرشد
بنفس السحنة
و قلب الميتا
ميتا هاتكبر .. ميتا
ياحلم .. غصبن عن عين أمريكا
تعليق