تويت
مشتاقه بجد لضل التوت
والبط بيلعب ف الترعه
وخبيز الفرن ف نص الدار
والكل بقلب عمار يسعى
مشتاقة أشوف الإيد ع الفاس
والطيبه عرقها ف وش الناس
واللمه الحلوه ف قلب الغيط
مشتاقه أدوّر ع الفرخه
ألاقيها ف قلب العشة هناك
راقده على البيض
مشتاقه لصوت فعلا طيّب
ف عشيه بيحكيلنا الحواديت
مشتاقه أسيب الدار مفتوح
وما اخافش عليه أي ديابه
نرجع ف أمان زي ما كُنّا
وعيون تحمينا وبتصونّا
وما احسش إن احنا ف غابه
مشتاقه يعود النيل إنسان
بيبوس الأرض ويرويها
وكأنه فارسها اللي حاميها
وسنابل دهبيه بتطرح
نتلم ونلعب حواليها
مشتاقه الناس ترجع عيله
يتلموا الظهر ف ضُليله
وف أي مكان التقييله
مش فارقه بجد
مشتاقة قلوب الناس تتمد
بحصيرة صيف أوسع م الأرض
مع أي مناسبه نشوف لمّه
بتشارك والدعوات عامه
مشتاقه ما احسش بالضلمه
وتعودي يا مصر
تعليق