أسأل الله العظيم رب العرش العظيم أن يتغمد أخي الحبيب حسني عبد الله جاد (عاشق الورد) برحمته، وأن يجعله في الفردوس الأعلى من الجنة بمنِّه وفضله وكرمه، إنه سميع مجيب.

===========

كاس وداير
ع الخلايق
يوم ف إيدك،
يوم ف إيدي
مهما تجري
الكاس ده سابق
أصله أقرب
من وريدي

والدمعة تبقى تحِز فينا
في القلوب
تترك علامة
والحزن يغلب نور عينينا
أصل دمع الحب شامة.

قضا ومكتوب
ما فيه منه
يا خلق هروب
ونمشي ف دنيا بنجمَّع
وتربتنا
ما ليها جيوب

وانا قاعد وباتذكر
خليل سابني،
وعدَّى وفات
وباتسائل مع نفسي
صحيح الـورد ولَّى ومات؟
والا احنـا ضحكة قلبنا
قاعدة بتغـزل دمعنـا؟
ومش داريين كده بحالنا
وده حالنا
حياته موات!

كتبت أرثيك وقلبي
مش مطاوعني
تفر الدمعة من عيني
تعذبني تلاوعني
يقولوا الدمع ده يمسح
جبال الحزن والحيرة
وانا دمعي يزيد حزني
ويشعل بينهم الغيرة.

أنا بابكي
لكن فرحان
وبتأمِّل
في شفيع عدنان
بيشفع لك
عند رب كريم
ملا قلبك
بنور وإيمان.

وتبقى الحرقة
في قلبي
حجارة
وأصلها سجيل
ونفس القلب
يا صاحبي
بيدعي لك
بكل جميل
برحمة
وظل من ربي
ونظرة
من رحيم رحمان
بشربة مية
م الكوثر
كده تروي
ضلوع عطشان
وصحبة
نورها يتجلّى
ويتلالى
في فضاها النور
وجنة
تمشي ف ربوعها
وبجناحك
تلف قصور
كما الطاير لقى خِلُّه
كما الأم ف إيديها وليد
كما التايه هداه ربي
كما الصايم ف يوم العيد

وجنة ربي تربتها
من المسك والعنبر
وقعدتها تنسِّينا
آلام الدنيا والمعبر
ما عاد نمرض
ولا نبكي
ولا نشكي
لمولانا
ما يبقى لنا
غير الرحمة
وشكر النعمة يلقانا
ويرضى علينا
رب الكون
وصحبتنا
تكون في رضاه
وتنسى يا حسني يا صابر
وتتبسم
سعيد بقضاه
ونتعجب
لحكمة رب خلانا
عليك نبكي
لفُرقتنا
أتاري الدمعة دي فرحة
وبتمهد لصحبتنا
ونشتاق لك
يا حبيب الورد
يا عاشق لنـور الله
ونتذكر
جميـل ودّك
وتسليمك كأنه صلاة

أنا بابكيك ويا عالِم
إذا روحك بتبكيني
في جنة خُلد يا حسني
وانا ف دنيا بتشقيني
ملايكة بكاس بتضحك لك
وانا شيطان بيسقيني
ودنيا الذنْب دي فانية
وطعم الذنب يكويني
لقيت ربك ما في أجمل
من الرحمة تواسيني
دي صحبة نور
كده تسري
مع دمي في شراييني
ده موتك والله كده محيا
وإمتى يارب تحييني؟
********

رحمك الله أخي!!