للخلف در.. (الجزء الثانى)

للخلف در..
غمض عنيك
ما تقولش بكرة هيبقى ايه..؟؟
إفرد قفاك...
علشان هتاخد كام قلم ... هيفوقوك
علشان هتاخد كام خازوق.. هيصحصحوك
يمكن يعود فكرك .. تفوق...
ويحنطوك....
*****
للخلف در...
الحس لسانك ... وابلعه.. ليكون حرام
أصل العساكر سمها ... تسمع كلام
هو العبيد من حقها ... تنطق سكوت..؟؟
والعبد لو يكرم يثور... أو عاش يموت..
اربط إيديك ..
واقفل ودانك .. سدها
أصل العساكر قلبها ...
يغضب عليك...
عيزاك صنم
عيزاك قوالب تتبنى
وتكون .. هرم
تطلع عليك ...
توصل لآخر مجدها
لو كان عليك
*****
للخلف در..
إنسى القانون
أنسى المروءة والشهامة والاصول
وامشى ف حياتك بالساطور
أو عيش كأنك ..أى تور
تاخد حقوقك وباديك
اذا كان قاضيك ... مفروض عليك..!!
اذا كان حاميك ... سارق عنيك
اذا كان عساكرك كلها ... رابطين إديك
*****
للخلف در
وارجع هتلقى هناك ملوك...
مستاسدين ..
قاعدين على قلب الغلابة فى أرضهم...
مستأمرين..
وتلاقى أمرا وناس كتير... متعصبين
بيحاربوا مين..؟؟
دين ربنا..
مستسلمين
خدام مصالحهم .. هواهم .. كرشهم
خدام عدو شعبهم
*****
إرجع يا شعب وطيع أوامر جلاديك
ستين سنة للخلف در..
متعصبين ..
إرجع وبوس إيد ال كاتب عزته
ف رموش عنيك
اركع لراسم بهجتة
بدموع عنيك
*****

جمال نصير فى 18/7/2013



وللحديث بقية....

للخلف در.. (الجزء الثالث)
للخلف در...
إرجع يا مصرى ميت سنة...
علشان تفاهة فكرتك...
علشان غشاوة ... وجهتك
ما تقولش دين
ما تقولش دولة مسلمة
فيها الشريعة الحاكمة
خليك ف عصر الفجر كمل سكتك
خللى التخلف .. والتحجر .. والوضاعة ...
كعبتك
*****
يا شعب دور..
دور معاك كل القيم..
كل المبادئ والمشاعر والذمم
دور معاك كل الهمم ...
أنسى القيم ..
زى العدم...
وانسى السياسة ومكرها
دول ناس بتحرق بعضها
من غير ندم..
وانسى القضاء
أصبح بلاء
إهرب ف أهلك أو عشيرتك ..واهجرة
أصل القانون دا ف عصرنا ..
أصبح وباء
*****
يا شعب دور.. إسمع أوامر عسكرك
وارجع لعصر الفبركة
والمهيصة ..
والمرقصة..
والرشوة قبل الفزلكة..
إرجع لعصر الطبالين .. من غير ذمم
إعلام مضلل .. كذبته ..
زى الورم..
ورم الخباثة والوقاحة ... والسقم...
*****
إرجع لعسكر كرهك ..
ف المسلمين
باعوا البلاد .. للمعتدين
سابوا العدو ف حضنهم
لكن شعوبهم .. ارضهم
للمجرمين
باعوا السودان ...
وف سوريا باركوا .. السفاحين
باعوا تراب القدس
بس بدون تمن...
*****
للخلف در..
إنسى العلام..
إنسى الكلام..
إنسى النظافة والطهارة والسلام..
إنسى الحلال
ما عدش يفرق أى حاجة م الضلال..
والخلق تايهه فى أكلها
او ناس نيام على ودنها
ارجع وعيش ف الصحرا مش محتاج بشر...
إنسى البشر...
*****
للخلف در
نزل كتافك وارمى راسك تحت طين
بعد العساكر لجموك هيكون هناك ناس طيبين..؟؟
او حتى ناس عايشة الامل...
مستنيين..
هتعيش وليه؟؟؟
غير لما ترجع مصرنا..
م المعتدين..
*****
قال العساكر للبلد .. الخلف در
دارت معاهم .... بعض ناس
والمجرمين
والبلطجية وناس نهارهم ....
ليل وكاس
والمقلوبين على شكلهم ...
الِرجْل ... راس...
سمعوا الاوامر كلهم
قالوا – تمام - من غير نقاش
لبس العساكر مخهم
نفس المقاس..!!
صبحت وجوهم مرتبة..
والراس .. مداس
*****
للخلف در..
ياشعب ملهوش ف الفرح
عايش على صوت التخلف ....
والتدهور...
والتدنى ...
وراضى تانى .. يتجرح
تحلف ببكرة وأنت نايم ..
وللا خايف...
وللا غايب .. ف الطرح
تحلم ف يوم الفرح باصص ... لو طرح..
ما هو انت مصرى وضهر دهرك من الفكاكة ...
إتسلخ..

*****

جمال نصير

وللحديث بقية...

شكرا لأستاذ احمد ... رينا كريم...ورحمن رحيم

للخلف در.. (الجزء الرابع)

للخلف در...
هتلاقى ف كهوف الضلام...
إعلام كفيف ... بيضللك
يكذب عليك .. ويتوهك..
هتلاقى أحفاد السفالة والندالة والحقارة ترصدك
تنده عليك
وتمد حضن كبير تدارى بيه عليك
ما حب فيك...
او خوف عليك
دى بتعاديك ..
من غير ماتشعر تسجنك
تقطع ايديك
وتلوث الدم ال ماشى بين عروقك بالضلال
وتحط بيك وسط الخيال
يمسح ضميرك .. من وجودك..
من طريقك..
ويجاريك
فرض طريقه وخدعته..
ما بين عنيك
*****
للخلف در...
إرجع يا مصرى ميت سنة...
اصل البلاد اتوزعت
فيه ناس ... بقر
أو قول وحوش متحكمة..
ماصة البشر .. من دمها
فيه ناس بتركع للبيادة ...تعزها
أصل البيادة .. أصلها
عايزة الحياة من غير هدف
من غير ضمير.. يحكم لها
والرب يبقى هو الهوى
وتعيش باى حياة.. وشكل .. واى لون
مش حاسة بالناس الغلابة جنبها
والدين بعيد عن اى حاجة تخصها
وهناك بشر...
حبة غلابة همها.. من غلبها
تمشى الحياة من غير تعب
والدين يكون هو الشريعة وعرفها
والرب هو الله .. ومالك أمرها
والخير طريقها وأرضها..
شوف انت نفسك مين ف دول....
وساعتها قرر فين تروح...
للخلف در.. كام ميت سنة
أو للامام ...
وتاخد معاك..
مصر الغريقة فى جهلها
ترفعها للشط القريب
وتاخدها للبر الحبيب
تزرع فى قلب الخوف ... امل
تزرع فرح
وتلم شعب جريح وتمسح دمعته
تمسح همومه وقسوته
*****
جمال نصير
وللحديث بقية.....

للخلف در.. (الجزء الخامس)

للخلف در...
إرجع يا مصرى ميت سنة...
هتلاقى مصر اتقسمت حبة دول...
دولة بشر..
ودول كتير... تنطح وترفس كالبقر...
دولة عقول متحضرة..
ودول كتير زى العجول ...
ترعى وآخر حدها ... ف المزبلة...
دولة قلوب متجمعة
على دين الهى يلمها
ودول كتير متفرقة
على الف قلب ..يلمها
على الف شر ودين شيطانى يوزها...
دولة شيوخ..متسيسه
والدنيا أكبر هم ليها ..
مفلسه..
ودول كتير متعسكرة..
مليانة حقد وغدر قاسى .. معكرة

*****
للخلف در...
هتلاقى مصر مقسمة..
حبة دقون متوهمه
ان التدين بس شعر ... ف وشها
والحقد أسود من قرون الشر .. راسم قلبها
حبة وجوه ناعمة وفارش وشها
لون التدين والطيابة ... ونور مشعلل قلبها
وتروح لمين؟؟؟ وتقول يا مين؟؟
للدقن وللا للتدين مهما كان ....
شكله ولونه ومظهره ؟؟
*****
للخلف در...
هتلاقى شعب بيرفض النعمة بايديه
جاتله الحياة مابين عنيه
لكن رفض ..
قَبَل التمرد ع الحياة..
رفض الكرامة والعزيمة والامل
ورفض يكون إنسان بإيده معوله
انسان بايده .. مأكله
وبيد تانيه فيه سلاحه ...
ومشربه...
انسان بيسعى لدينه رامى توكله
لله .. وعارف سكته
انسان بيعبد حاكمه
مع انه عارف قصة (الفرعون) وعارف أخرته..
لكن مصمم يعبد الفرعون ويعبد جزمته

*****
للخلف در..
هتلاقى شعب الجهل واكل جتته
الحقد حارق جثته...
الظلم ناضح فوق جبينة وغلبه مالى جتته ...
وبرغم دا ..
حالف ما يترك سكته
حالف ليفضل فى الضلالة لحد آخر لحظته
وتلاقى ناس
مش اى ناس
صوتهم ضعيف..
لكن قلوبهم بالايمان زى الجبل
هتلاقى نورهم بين عنيهم والامل
صوتهم ضعيف جنب النعيق
صوتهم نغم وسط الزعيق
خليك معاهم .. جنبهم
ما تخفش من صوت الديابة .. مهما كان ليهم عدد
فالديب جبان ..
لو عاش ومات.. هيظل ديب
بس الاسد لو مات .. أسد..
حتى الاسد لو مات .. أسد..
*****


جمال نصير
وللحديث بقية.....

للخلف در

سيمفونية رائعة ..

متابع ،،،

الأخ الشاعر القدير جمال نصير
السلام عليكم ورحمة الله
للخلف در----وأراني أمام سمفونية حمأة شاعرية
تعزف بأبجدية القلب--وأوتار الناي هذا ما
عودنا عليه الشاعر جمال من جمال وجرأة
الحروف القوية الصريحة بلا مواربة وبرؤيا
ورأي منذ دخوله الملتقى--لعله الصدق والمبدأ
كنت جميلاً دوماً في تلحين ما تراه من
مواضيع تدعو للأنصات والتبصر وما زلت
كما قال أخي الشاعر أحمد علي هنا سمفونية
عزف على اوتار عاشق ومعشوق يخاف علية
عندما يخيم الصمت دوماً ينطق الجلال والكبار
حرف قوي--وانسياب شعري وشعوري سلسل
وشاعر عظيم ينطق وقد خيم الصمت -لانتظار
ما سيكون!!-------أحيي قلمك الرائع الشاعر جمال
نصير-----------الإنسان مبدأ-حياك وحفظك جمال
أتمنى لك الأمن والأمان -ولمصر العزيزة الاستقرار
في رحاب الحق والشرعية والامان
وكل عام وأنت مبدع بألف خير


أ ( حتى الأسد لو مات أسد) الشاعر جمال نصير

شهادة اعتز بها.من عزيز.. ولى الشرف فى متابعتكم ..شكرا لكم

شاعرتنا الكريمة والشجاعة غالية.. عندما ياتى الدعم من فلسطين فلا عجب .. لاننا نته\علم من اطفالكم معنى الصمود وراء الحق فى وجه الطغيان .. تعلمنا من مدرسة الكفاح الفلسطينية معنى القوة رغم قله الحيلة ... فكم من حجر قهر دبابات يختفى خلفها حبابرة مدججين بالسلاح... وها انا ذا اتجرع القهر فى بلدى التى طالما حلمت فيه بالحرية والديموقراطية وبدولة يكون شراعها الدين .. وكلما اقتربنا خطوة للامام نجد من يجرنا للخلف الاف الخطوات .. يجرنا للديكتاتورية والعبودية والخواء.. ةها نحن نتجرع وسنتجرع اكثر والايام حبلى بالمفاجآت السيئة نتيحة لجهل امه تم تجهيلها عمدا.. كى يحققوا ما يريدون بدعم الجهلاء .. شكرا لمرورك

أنا وبلا أي رتوش أرى أن صندوق الاقتراع
مهما كانت إفرازاته فله الفصل في الامر
رفضه والاحتكام للنار والبارود والفوضى
حيث لا يسمع الفرد الا نفسه صعب جداً
ونحن في فلسطين ندفع ثمن ذلك-والخسران
الوحيد شعبنا المغلوب على أمرة حتى الجسارة
فيه فلقها الخلاف والانقسام لعل الله لا يحكم عليكم
يمثل ما وصلنا لها من نتائج--تفرز ما يقزز والشعب
هو الضحية
تحياتي -----ولمصر يركع المجد والله المستعان

القوى والواثق فى نفسه لا يخشى صندوق الاقتراع ... فهو بمثابة المبايعة التى كانت فى عهد الخلافة الراشدة وما بعدها .. انت تختارنى اذا فانت تبايعنى .. ولكن عندنا فى دولنا العربية فلا نعرف الادمية ولا نعرف الحرية ولا نعرف ان نحترم آراء الاخرين .. نحن فى بلادنا العربية تدار البلاد بنفس طريقة ادارة البيوت (سى السيد) القوى يفرض رأيه على الضعيف.. وتأتى حكامنا على ظهور الدبابات ... وليس للارادة قيمة .. وليس للحرية قيمة .. وليس للانسانية قيمة .. وللاسف فكل هذا لا يصب فى الوقت الحالى الا فى خدمة الصهاينة .. فهم يحتفلون بذلك فى نفس الوقت الذى تسال فيه دماؤنا وكرامتنا وعروبتنا على التراب.. واما ما يحدث عندكم على المستوى السياسى فهو خلاف يحكمة العدو الصهيونى ويمسك زمامه.. ويعرف كيف يتحكم فى الخيوط .. ولكن الشعب المكافح الحر هو من يدفع التمن .. ورغم ذلك فهو فى نظرى شعب علم الاحرار وعلم الثوار وعلم النساء كيف يربين اجيالا من المجاهدين .. وان كانت تضيع ثوراتهم على ايدى الحكام .. - لا سامحهم الله - فلهم تحية الجهاد
..... شكرا اديبتنا

للخلف در.. (الجزء السادس)

للخلف در..
يا شعب نايم ف العسل
نايم بتحلم... بالكسل
والفرصة لما جات اليك
وتفوق وتصحى م الهبل..
غمضت عينك .. كالكفيف
حالف لتمشى فى حسرتك
وتحط جزمة عسكرك...
فوق جبهتك
ماهو انت واطى ما يرفعك...
غير الذلل
*****

للخلف در...
هتلاقى دولة للقانون ... من غير قانون
هتلاقى بس البلطجة
فيها القوى ... ليه الامان
اما الشريف... ملهوش مكان
هتلاقى دولة يفترض.. دولة ايمان
من غير ايمان..
هتلاقى دولة علمانية ويفترض...
دولة علوم ..
من غير علوم
والجهل فيها يحترم ...
هو النجوم...هتلاقى دولة عشوائية ف كل شئ
من رجلها..
ولحد أخر شعر طالعة ف مخها...

*****
للخلف در...
هتلاقى ماضى جميل وحاضر... طعمه مر..
هتلاقى طيبة بس تايهه وسط شر
هتلاقى دين .. من غير تدين أو ضمير
هتلاقى شر ف قلب خير
هتلاقى بين الجهل علم بيستجير...
هتلاقى بين الفقر ... ظلم بينكتب
هتلاقى حب .. بينشطب
هتلاقى ناس رجعت تجوع ... من غير سبب..

*****
للخلف در..
هتلاقى كام علمانى او ليبرالى او شيطانى واقف ف الظلام
مستنى ترجع ليه وياخدك للحرام
مستنى ياخدك بالكلام
وبصوت شيطانى يحتويك
راح ينشر الفوضى وياخدك من ايديك
وتلاقى نفسك ف الفساد...
مضحوك عليك
*****
للخلف در..
هتلاقى.. دنيا انحلال
والبعض غارق فيها تايه ف الضلال..
ولكل واحد دنيته
ولكل جاهل ... عزبته
ولكل خاين .. سطوته

*****
جمال نصير
وللحديث بقية.....