يا شعب مصر.. ما نفسكوش...
نرجع نعيش تانى الحياة..؟؟
نحلم ويبقى حلمنا ... طوق النجاة..؟؟
نرسم لبكرة مجدنا..
نزرع بإيدنا حبنا..
نبنى الحياة من تحتنا..
حوالينا.. بينا .. جنبنا
ويجينا فرح يضمنا...وتروح معاه..
ما نفسكوش...؟؟؟
نرجع نعيش تانى الحياة....!!
*****
يا شعب لسه فيه أمل...
مهما الحياة كانت حفر..
فيه الف فرصة للسفر..
ونروح سوا .. للمستحيل...
للحزن فيه .. مليون بديل..
بكره بينده .. يجرى أيه لو نسمعه..
فتعالوا بينا نلحقه..
دا القطر ماشى بسرعته..
واحنا هنا .. قاعدين يادوب ف محطته..
بنشد بعض .. للظلام..
ونهد بعض .. بالكلام..
ونصد بعض .. بالخصام..
والابن يقطع إيد أخوه..
والاب بيخاصم أبوه..
والقطر ف الشط البعيد... شاف سكته..
واحنا هنا ... ف مواجهته...
متكتفين..
واحنا ياشعب مسلمين..
للظلم فارد سطوته..
والحقد يحرق نبتته..
لسّانا عايشين ف الزحام..؟؟
ماتيجوا نمشى للامام..
ونحط إيدنا ف إيد ولادنا ... بالوئام
ونحط ايدنا ف إيدنا تانى ... بالسلام...
*****
ياشعب مصر...عايزين نعيش..
ونروح لرحلة جميلة نبقى زى طير
عايش بخير ...
يقدر يطير من غير ألم..
يبنى لبكرة بيت جديد..
فوق القمم..
ويغنى للفجر الوليد..
انا ابن ماضى كان سعيد...
وجدودى اصحاب الهرم..
كانوا وعاشوا ف الحياة....
اصحاب همم
*****
يا شعب مصر..
فاكرين قلوبنا لما كانت زى شط النيل بتحضن وردنا ..؟؟
والحب يروى زرعنا..
والفرحة فارشة ضلها فوق كتفنا..
كات الحياة ...
بتمد حضن كبير بيجمع شملنا..
وماكنش بينا محرومين..
وماكانش فينا مجروحين
ولا كان كبيرنا يمد ايده ف جيب صغير..
ولا كان غنى .. ولا كان فقير..
كان دينا عامل حضن دافى للفروق..
لا حد تحت .. وحد فوق..
*****
بالله عليكوا ما نفسكوش...
نرجع نعيش بالحب والخير والسلام..؟؟
ونسيبنا من كتر الكلام....
هو الخصام أيه فيدته..
هو التفرق.. والخيانة.. والضلال...
أيه معنته...
وكفانا موت...كام ميت سنة..
وكفانا خوف... عمال بيخرب عشنا
وكفانا فرقة ف قلبنا..
وكفانا دم بيروح شر فى أرضنا
دا الليل طويل...
والضلمة حطت ع النخيل..
والارض عطشت واسألوا .. عنها النجيل...
ياشعب حطم قسوته..
ياشعب رغم همومه راسم بسمته..
ياشعب رغم الدنيا .. فارض سطوته..
الحلم دا ... شيئ مستحيل..؟؟
يا شعب عيش.. دا أنت السبيل
*****
ياشعب مصر ...
الصبح بيكم ... او بدونكم..
راح يشقشق من جديد
والطير معاكم ....
راح يغنى من جديد...
يا شعب عيش ... وافرد ايديك
واكتب شهادة للحياة ... ف رموش عنيك..
مش هى دى القسوة ال تقدر تهزمك...
وتدوس عليك
*****
جمال نصير فى 3/9/2013


س