يا ليام ...

رممت ليام بنغمة
وحرف ضاوي
ومشيت لكدام
...
تلفت وحشة الشوق
وحب طافي
فزحمة لسقام
...
كتبت حكاية جديدة
وزان وقوافي
ودارت رحى لكلام
...
عليت صور لمحبة
لفوق...لفوق
وخطفت من الشمس
خيط دافي
يسخن عشنا عل الدوام
...
لقيت حرف فرمش الكلمة
سايل دمعة
ومسحت ..
ولميت ..
ولفيت الشقا فكتانة بيضة
ودفنتو بلا رجعة
....
وخديت الحرف لحضني
بسمة ..
من شفايف الكلمة طالة
حكمة..
وزرعت في فدان لكلام
ينبت العز
فصدر القصيدة
حروف بيضة
ملبوسة حب وسلام
...
وعلاه ... وعلاه
يا ليام طولتي الغيبة
والحب غريبة
شادة فشباك الزمان
حتى وليت غريب
بين حروفي
...
راني مسامح يا ليام
وليوم رجعتي
ضواية ...
وورود زاهية فجناني
وحروفي عنكتني
وكالت آه .. آه ..
وشحال الفراق صعيب
...
وآه ..وآه يا ولفي
ونشطت الكانة
ياك ليوم تفهم لغانا
وكليمات مرسومة
بلون جديد
مرشوم بالولف
...
ويا سعدي بك يا ليام
نمشيوا رفاكة
لساحة لرسام
ونعاودو الخط
بل شرط
ونتولدو من جديد توام

عبدالعالي الوالي 2013/07/31​